ന്യൂദല്ഹി: രാമക്ഷേത്ര വിഷയത്തില് പൊതുജനാഭിപ്രായം സ്വരൂപിക്കലും ബോധവല്ക്കരണം നടത്തലുമാണ് ആര്എസ്എസ് ചെയ്തതെന്ന് സര്സംഘചാലക് മോഹന് ഭാഗവത്. രാമക്ഷേത്ര നിര്മാണത്തെക്കുറിച്ച് സുപ്രീംകോടതി അന്തിമ വിധി പ്രഖ്യാപിച്ചതോടെ ആര്എസ്എസിന്റെ പ്രവര്ത്തനങ്ങള് ഫലം കണ്ടു.
ഇനി അയോധ്യയില് സര്ക്കാരും പുതുതായി രൂപികരിക്കുന്ന ട്രസ്റ്റുമാണ് രാമക്ഷേത്ര നിര്മാണം നടത്തേണ്ടത്. ആര്എസ്എസിന്റെ ഊഴം അവസാനിച്ചെങ്കിലും പരിവാറിന്റെ കീഴിലുള്ള മറ്റൊരു സംഘടനയായ വിഎച്ച്പിയുടെ ദൗത്യം അവസാനിച്ചിട്ടില്ലെന്നും മോഹന് ഭാഗവത് പറഞ്ഞു. രാമ ക്ഷേത്രം പൂര്ത്തിയാകും വരെ അവര് ദൗത്യം തുടരുമെന്നും അദേഹം പറഞ്ഞു. മൊറാദാബാദിലെ പ്രാന്തപ്രചാരകരുമായി നടത്തിയ കൂടിക്കാഴ്ചയിലാണ് മോഹന് ഭാഗവത് ഇക്കാര്യം പറഞ്ഞത്.
ജനസംഖ്യ നിയന്ത്രിക്കുന്നതിന് നിയമം കൊണ്ടുവരണമെന്ന് അദേഹം വ്യക്തമാക്കി. ഭാരതം വളര്ന്നുകൊണ്ടിരിക്കുന്ന് രാഷ്ട്രമായതിനാല് അനിയന്ത്രിത ജനസംഖ്യ വര്ധനവ് അതിന് ഗുണകരമാകില്ലെന്ന് അദ്ദേഹം പറഞ്ഞു. രണ്ടുകുട്ടികള് മതിയെന്ന് വ്യവസ്ഥ ചെയ്യുന്ന ജനസംഖ്യ നിയന്ത്രണ നിയമം കൊണ്ടുവരേണ്ടത് ഏറ്റവും അത്യാവശ്യമായ കാര്യമാണ്. എല്ലാ വിഭാഗം ജനങ്ങള്ക്കും ബാധകമാകുന്നതായിരിക്കണം ഈ നിയമം. ഏതെങ്കിലുമൊരു മതവിഭാഗവുമായി ബന്ധപ്പെട്ടതല്ല മുന്നോട്ടുവെച്ചിട്ടുള്ള ഈ നിര്ദ്ദേശമെന്നും സര്സംഘചാലക് പറഞ്ഞു. ഇക്കാര്യത്തില് അന്തിമ തീരുമാനം സര്ക്കാരാണ് കൈക്കൊള്ളേണ്ടതെന്നും അദ്ദേഹം വ്യക്തമാക്കി.
