ബെംഗളൂരു : ബിജെപി എംപി തേജസ്വി സൂര്യയെ വധിക്കാന് പോപ്പുലര് ഫ്രണ്ടിന്റെ ഗൂഢാലോചന നടത്തിയതായി കണ്ടെത്തല്. പൗരത്വ ഭേദഗതി നിയമവുമായി ബന്ധപ്പെട്ട് കഴിഞ്ഞ മാസ 22ന് നടന്ന റാലിക്കിടെ കൊലപ്പെടുത്താനാണ് ഇവര് പദ്ധതിയിട്ടത്. ഇതുമായി ബന്ധപ്പെട്ട് ആറ് പേര് ബെംഗളൂരു പോലീസിന്റെ പിടിയിലായിട്ടുണ്ട്. സ്വകാര്യ മാധ്യമമാണ് ഇതുസംബന്ധിച്ച റിപ്പോര്ട്ട് പുറത്തുവിട്ടത്.
ബിജെപി അനുകൂലിയും നടനുമായ ചക്രവര്ത്തി സുലിബെലേയും വധിക്കാന് അക്രമികള് പദ്ധതി തയ്യാറാക്കിയിരുന്നു. അറസ്റ്റിലായതില് എസ്ഡിപിഐ പ്രവര്ത്തകരായ സാദ്ഖി, അക്ബര് എന്നിവര് ഉള്പ്പെടും. സെയ്ദ്, ഇര്ഫാന്, സനൗള്ള, അമീന് എന്നിവരാണ് അറസ്റ്റിലായ ബാക്കിയുള്ളവര് കര്ണ്ണാടക ടൂറിസം മന്ത്രിയാണ് ഇതുസംബന്ധിച്ചുള്ള വാര്ത്ത പുറത്തുവിട്ടത്. അതേസമയം അതുമായി ബന്ധപ്പെട്ട് സംസ്ഥാന ആഭ്യന്തര വകുപ്പും ബെംഗളൂരു പോലീസും കൃത്യസമയത്ത് തക്ക നടപടി സ്വീകരിച്ചെന്നും മന്ത്രി രവി അറിയിച്ചു. അതേസമയം എസ്ഡിപിഐ പോലെ തീവ്ര മനോഭാവമുള്ള സംഘടനയ്ക്ക് നിരോധനം കൊണ്ടുവരണമെന്നും അദ്ദേഹം ആവശ്യപ്പെട്ടു.
പൗരത്വ ഭേദഗതി നിയമത്തെ അനുകൂലിച്ച് ബിജെപിയുടേയും ആര്എസ്എസിന്റേയും നേതൃത്വത്തില് റാലി നടത്തുന്നതിനിടെ ഇവര് മോട്ടോര്ബെക്കുകളില് എത്തിയിരുന്നു. സംശയാസ്പദമായ സാഹചര്യത്തില് ഇവരെ കണ്ടതോടെ പോലീസ് അറസ്റ്റ് ചെയ്യുകയായിരുന്നു. തുടര്ന്ന് വിശദമായി നടത്തിയ ചോദ്യം ചെയ്യലിലാണ് തേജസ്വി സൂര്യയേയും സിലിബെലേയും കൊലപ്പെടുത്താനെത്തിയ അക്രമികളാണെന്ന് വെളിപ്പെടുത്തിയത്.
പൗരത്വ ഭേദഗതി നിയമത്തെ അനുകൂലിച്ചുകൊണ്ടുള്ള തേജസ്വി സൂര്യയുടേയും സുലിബെലെയുടേയും നടപടിയിലുള്ള അമര്ഷത്താലാണ് വധിക്കാന് തീരുമാനിച്ചതെന്ന് അക്രമികള് വെളിപ്പെടുത്തി. പൗരത്വ ഭേദഗതി നിയമത്തില് ജനങ്ങള്ക്കുള്ള തെറ്റിദ്ധാരണ അകറ്റുന്നതും ബോധവത്കരണം നടത്തുന്നതിനുമായാണ് ഡിസംബര് 22ന് ബെംഗളൂരുവില് റാലി നടത്തിയത്. തേജസ്വി സൂര്യയും സുലിബെലെയും ഇതില് പങ്കെടുക്കുകയും ചെയ്തിരുന്നു.
