കോഴിക്കോട്:പൗരത്വ ഭേദഗതി നിയമം സംസ്ഥാനത്ത് നടപ്പാക്കില്ലെന്ന മുഖ്യമന്ത്രി പിണറായി വിജയന്റെ പ്രഖ്യാപനത്തിന് രൂക്ഷ വിമര്‍ശനവുമാിയി ബിജെപി സംസ്ഥാന വൈസ് പ്രസിഡന്റ് എ.പി. അബ്ദുള്ളക്കുട്ടി. പൗരത്വ നിയമ ഭേദഗതിയുമായി ബന്ധപ്പെട്ടുള്ള വിവാദങ്ങളില്‍ വിശദീകരണം നല്‍കുന്നതിന് മുക്കത്ത് സംഘടിപ്പിച്ച ദേശഭക്തി സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ദേശീയ പൗരത്വ രജിസ്റ്ററും പൗരത്വ ഭേദഗതി നിയമവും സംസ്ഥാനത്ത് നടപ്പാക്കില്ലെന്ന് പറയാന്‍ അത് പിണറായിയുടെ ഭാര്യയുടെ ഉത്തരവല്ലെന്ന്അബ്ദുള്ളക്കുട്ടി.ലോക്‌സഭയും രാജ്യസഭയും കടന്ന് രാഷ്‌ട്രപതി ഒപ്പിട്ട നിയമമാണത്. ആ നിയമം നടപ്പിലാക്കാന്‍ കഴിയില്ലെങ്കില്‍ മുഖ്യമന്ത്രി പദം രാജിവച്ചു പാര്‍ട്ടി സെക്രട്ടറി പണിക്കു പോകണമെന്നും അബ്ദുള്ളക്കുട്ടി. ഇന്ത്യയിലെ പോലെ മത സ്വാതന്ത്ര്യമുള്ള രാജ്യം ലോകത്ത് വേറെ എവിടെയുമില്ല. കേന്ദ്ര സര്‍ക്കാരിന് എതിരെയുള്ള പച്ചയായ രാഷ്‌ട്രീയമാണ് സംസ്ഥാനത്തെ മുസ്ലിം പള്ളികളില്‍ ഇമാം പറയുന്നത്. ഭൂരിപക്ഷത്തിന്റെ പീഡനം സമീപരാജ്യങ്ങളില്‍ ഏറ്റുവാങ്ങി ഇന്ത്യയിലെത്തുന്നവര്‍ക്കുള്ള കാരുണ്യമാണ് പൗരത്വനിയമഭേദഗതി.
മുന്‍ മുഖ്യമന്ത്രി വി.എസ്. അച്യുതാനന്ദന്റെ അത്രയും മുസ്ലിം വിരോധമുള്ള രാഷ്‌ട്രീയക്കാരന്‍ കേരളത്തില്‍ ഇല്ലെന്നും അബ്ദുള്ളക്കുട്ടി ആരോപിച്ചു. ഹിന്ദുക്കള്‍ ഭൂരിപക്ഷമായി രാജ്യത്ത് തുടരുന്നിടത്തോളം കാലം മതേതരത്വം നിലനില്‍ക്കും. എന്നാല്‍, ന്യൂനപക്ഷം ഭൂരിപക്ഷമായാല്‍ മതേതരത്വം തകരുമെന്നും അബ്ദുള്ളക്കുട്ടി പറഞ്ഞു.
