ജൈവവൈവിധ്യ സംരക്ഷണ ബോധവത്കരണത്തിലൂടെ ജനശ്രദ്ധ ആകര്ഷിക്കുകയാണ് വസന്തോത്സവത്തില് സംസ്ഥാന ജൈവവൈവിധ്യ വകുപ്പ് ഒരുക്കിയ സ്റ്റോള് . ആവാസ വ്യവസ്ഥിതി , കാലാവസ്ഥാ വ്യതിയാനം, സമുദ്ര ജീവജാലങ്ങള്, കേരളത്തിന്റെ തനത് കന്നുകാലികള് തുടങ്ങി വിവിധ ‘ വിഷയങ്ങളെ സംബന്ധിച്ച വിവരങ്ങള് ഇവിടെ പ്രദര്ശിപ്പിച്ചിട്ടുണ്ട് . കാലാവസ്ഥ വ്യതിയാനവും സസ്യങ്ങളില് അതുണ്ടാക്കുന്ന മാറ്റങ്ങളും സംബന്ധിച്ച് കാഴ്ച്ചക്കാര്ക്ക് അറിവ് പകരുന്നു. ലോകത്തെ വിവിധ ഇനം സസ്യങ്ങള്, ചിത്രശലഭങ്ങള് എന്നിവയുടെ ചിത്ര പ്രദര്ശനവുമുണ്ട്.
വകുപ്പിന് കീഴില് വള്ളക്കടവില് സ്ഥിതി ചെയ്യുന്ന ഇന്ത്യയിലെ തന്നെ ആദ്യ ജൈവവൈവിധ്യ മ്യൂസിയമായ കേരള ജൈവ വൈവിധ്യ മ്യൂസിയത്തിനെ കുറിച്ചുള്ള വീഡിയോ പ്രദര്ശനമാണ് സ്റ്റാളിനെ ആകര്ഷകമാക്കുന്ന മറ്റൊരു ഘടകം. ജൈവ വൈവിധ്യ വകുപ്പ് പ്രസിദ്ധീകരിക്കുന്ന പത്തൊന്പതോളം പുസ്തകങ്ങളുടെ വില്പനയും സ്റ്റാളില് ഒരുക്കിയിരിക്കുന്നു. കേരളത്തിലെ വൃക്ഷങ്ങള്, കണ്ടല്കാടുകള് , സസ്യ വൈവിധ്യം, ഉഭയജീവികള്, തുടങ്ങിയവയെ സംബന്ധിച്ച പുസ്തകങ്ങള് മിതമായ നിരക്കില് നല്കുന്നത് കൊണ്ടു തന്നെ ആവശ്യക്കാരും ഏറെ.
കൗതുകമായി ഈറ്റയില് തീര്ത്ത കരകൗശല വസ്തുക്കള്
കനകക്കുന്നില് നടക്കുന്ന വസന്തോത്സവം പുഷ്പമേളയില് ഈറ്റയില് തീര്ത്ത ഉത്പന്നങ്ങള് ഒരുക്കി കാണികളെ ആകര്ഷിക്കുകയാണ് ഉത്തരവാദിത്വ ടൂറിസം മിഷന്റെ സ്റ്റാള്. ഈറ്റ കൊണ്ടു നിര്മ്മിച്ച കരകൗശല വസ്തുക്കളാണ് ഈ സ്റ്റാളിനെ വ്യത്യസ്തമാക്കുന്നത്. പെന് സ്റ്റാന്റ്റ് , മെഴുകുതിരി സ്റ്റാന്റ്, ലാബ് ഷെയ്ഡ്, വിശറി, ട്രേ തുടങ്ങി 30 രൂപ മുതല് 280 രൂപ വരെയുള്ള വിവിധ ഉത്പന്നങ്ങളാണ് ഇവിടെയുള്ളത്. ഈറ്റയോടൊപ്പം മുളയില് തീര്ത്ത നിരവധി ഉത്പന്നങ്ങളും ഉണ്ട്.
കരകൗശല ഉത്പന്നങ്ങള്ക്ക് പുറമെ മിഷന്റെ കീഴിലുള്ള കൈത്തറി യൂണിറ്റിലെ ഉത്പന്നങ്ങളും സ്റ്റാളില് വില്പനയ്ക്കുണ്ട്. കേരള സാരി, സെറ്റും മുണ്ടും, ചുരിധാര്, ദോത്തി തുടങ്ങിയവയാണ് ഒരുക്കിയിരിക്കുന്നത്. പട്ടുനൂല് പുഴുവില് നിന്നും തനതായി എടുത്ത പട്ട് ഉപയോഗിച്ച് നെയ്തെടുത്ത പട്ടുസാരികള്ക്കും ആവശ്യക്കാര് ഏറെയുണ്ട്. കൈത്തറി സഞ്ചിയാണ് ഇവിടത്തെ മറ്റൊരു ആകര്ഷണം. പ്ലാസ്റ്റിക്ക് നിരോധനം കര്ശനമായതിനാല് കൈത്തറി സഞ്ചിയുടെ വില്പനയും തകൃതിയായി നടക്കുന്നു.. മഞ്ചവിള യൂണിറ്റിലെ കൈത്തറി വസ്ത്രങ്ങളാണ് ഇവിടെ പ്രദര്ശനത്തിനുള്ളത്.
അലങ്കാര സസ്യങ്ങളുടെ ശേഖരവുമായി വസന്തോത്സവം
അലങ്കാര സസ്യങ്ങളെ ഏറെ ഇഷ്ടപ്പെടുന്ന മലയാളികള്ക്ക് അവയെ കൂടുതല് അടുത്തറിയാനും വാങ്ങാനും അവസരമൊരുക്കുകയാണ് വസന്തോത്സവം പുഷ്പമേള. അഗ്ളോമിയ , ഡിഫന്ബത്തിയ ക്രോട്ടണ്, ഡ്രസീന, മറാന്ത, പെപ്പറോമിയ തുടങ്ങി ഇനത്തില്പ്പെട്ടവയാണ് ഇവിടെ പ്രദര്ശനത്തിനുള്ളത്. വീടിനുള്ളിലും പുറത്തും വളര്ത്താന് കഴിയുന്ന 50 രൂപ മുതല് 400 രൂപ വരെയുള്ള സസ്യങ്ങള് വിപണനത്തിനുണ്ട്.
ഇന്ത്യന് വംശജരല്ലെങ്കിലും പ്രത്യേകമായ പരിചരണം ആവശ്യമില്ലാത്തതിനാല് ഇവയ്ക്ക് ആവശ്യക്കാരും ഏറെയാണ്. ലീഫി ഓര്ണമെന്റല് വിഭാഗത്തില്പ്പെട്ട ഇവ പരിമിധമായ സ്ഥലത്ത് വളര്ത്തിയെടുക്കാവുന്നതാണ്. രോഗം വന്നാല് ആ ഭാഗം മുറിച്ചു മാറ്റിയാല് അതിന് പരിഹാരമാകുമെന്നതും ഇവയുടെ മൂല്യം കൂട്ടുന്നു. ജവഹര്ലാല് നെഹ്റു ബൊട്ടാണിക്കല് ഗാര്ഡനാണ് വസന്തോത്സവത്തില് ഇവയുടെ പ്രദര്ശനം ഒരുക്കിയിരിക്കുന്നത്.
