തിരുവനന്തപുരം: ശബരിമലയില്‍ ആചാരലംഘനം നടത്തിയതിന്റെ വാര്‍ഷിക ദിനത്തില്‍ വീണ്ടും ശബരിമലയിലേക്ക് കൂട്ടായി എത്തുമെന്ന് പ്രഖ്യാപിച്ച നവോത്ഥാനക്കാര്‍ ഒടുവില്‍ പിന്മാറി. കോടതി ഉത്തരവില്ലാതെ വന്നാല്‍ പ്രതിഷേധക്കാരല്ല, തങ്ങളാകും തടഞ്ഞ് തിരിച്ചയക്കുകയെന്നു പോലീസ് വ്യക്തമാക്കിയതോടെയാണു ശബരിമലയില്‍ പ്രവേശിക്കുന്നതിന്റെ ഭാഗമായുള്ള നിലയ്‌ക്കല്‍ മാര്‍ച്ചില്‍ നിന്നു നവോത്ഥാനക്കാര്‍ അറിയിച്ചത്.
വിഷയവുമായി ബന്ധപ്പട്ട് ആലപ്പുഴയില്‍ വാര്‍ഷിക പരിപാടി സംഘടിപ്പിക്കാനാണ് നവോത്ഥാന കേരളം സ്ത്രീപക്ഷ കൂട്ടായ്‌മയുടെ തീരുമാനം. ഇതു സംബന്ധിച്ച ഫേസ്ബുക്ക് പോസ്റ്റില്‍ ഇങ്ങനെ പറയുന്നു- ജനുവരി രണ്ടിന് ശബരിമല യുവതീപ്രവേശനത്തിന്റെ ഒന്നാം വാര്‍ഷികം നവോത്ഥാന കേരളം സ്ത്രീപക്ഷ കൂട്ടായ്‌മ ആലപ്പുഴയില്‍ വെച്ച് വിപുലമായി ആഘോഷിക്കുന്നതിനൊപ്പം ഭാവിപരിപാടികള്‍ പ്രഖ്യാപിക്കുന്നുമുണ്ട്. എന്തെല്ലാം പ്രതിബന്ധങ്ങള്‍ ഉണ്ടായാലും ശബരിമല സ്ത്രീപ്രവേശനത്തില്‍ നിന്നു ഞങ്ങള്‍ പിന്നോട്ടില്ല. ജനുവരി രണ്ടിന് സുരക്ഷ നല്‍കാന്‍ പോലീസ് വിസമ്മതിക്കുന്നതിനാല്‍ ഞങ്ങള്‍ തീയതി മുന്‍കൂട്ടി പ്രഖ്യാപിക്കാതെ തന്നെ ശബരിമല പ്രവേശനത്തിന് ശ്രമിക്കും. മണ്ഡല കാലം കഴിഞ്ഞാലും സ്ത്രീകളുടെ സുഗമമായ സഞ്ചാര സ്വാതന്ത്ര്യം ഉറപ്പാക്കുന്നതുവരെ ഒരു ദീര്‍ഘകാല അജണ്ടയായി ഞങ്ങള്‍ ഈ സമരം തുടരും.
ശബരിമല വിഷയവുമായി ബന്ധപ്പെട്ട് സുപ്രീംകോടതിയില്‍ നമ്മുടെ പ്രവര്‍ത്തകരായ രണ്ടു സ്ത്രീകള്‍ നല്‍കിയ കേസുകളില്‍ ഒന്ന് അവര്‍ക്ക് കുടുംബ സമേതം പോകുന്നതിനും ഒരെണ്ണം എല്ലാസ്ത്രീകള്‍ക്കും സുരക്ഷ ഉറപ്പാക്കണം എന്നും ആവശ്യപ്പെട്ടായിരുന്നു എന്ന് എല്ലാവര്‍ക്കും അറിയാമല്ലോ? ആ കേസുകളില്‍ ഉണ്ടായ വിധിയില്‍ 2018 സെപ്റ്റംബര്‍ 28 ലെ വിധിക്ക് സ്‌റ്റേയില്ലെന്നും ശബരിമല വിഷയം വൈകാരിക പ്രശ്‌നമാണെന്നും പോലീസ് സംരക്ഷണം ഇപ്പോള്‍ നല്‍കാനാവില്ലെന്നും സമാധാനപരമായി പോകാമെന്നുള്ള സ്ത്രീകള്‍ക്ക് പോകാം എന്നുമുള്ള ഒരുവിചിത്ര ഉത്തരവാണല്ലോ? ഉണ്ടായത്.
അതുകൊണ്ട് ഒരു പ്രക്ഷോഭം എന്നരീതിയില്‍ പോകുന്നത് കോടതിയെ ധിക്കരിക്കല്‍ ആകുമെന്നതിനാല്‍ സമാധാനപരമായി മുന്നറിയിപ്പ് കൂടാതെ പോകാനാണ് ഞങ്ങളുടെ തീരുമാനം. മുന്‍പ് ഒരു പ്രക്ഷോഭം എന്നോണം ജനുവരി രണ്ടിന് നിലയ്‌ക്കലേക്ക് സ്ത്രീകളെ സംഘടിപ്പിച്ച് ഒരു മാര്‍ച്ച് ആണ് ഉദ്ദേശിച്ചിരുന്നത്.
ഇനി ഞങ്ങള്‍ സമാധാനപരമായി പോകാന്‍ ശ്രമിക്കും. സമാധാനം ലംഘിക്കാന്‍ വരുന്നവരെ നേരിടാനും സമാധാനം പാലിക്കാനും സമാധാനപാലകരും അതിന് ഉത്തരവാദിത്വപ്പെട്ട സര്‍ക്കാരും ശ്രമിച്ചാല്‍ മതി. ഞങ്ങള്‍ക്ക് പ്രത്യേക സുരക്ഷയൊന്നും ആരും നല്‍കേണ്ടതില്ല.ഒരു പൗര എന്നനിലയില്‍ ഉള്ള സുരക്ഷ നല്‍കിയാല്‍ മതിയാകും. എന്തയാലും ഞങ്ങള്‍ ശബരിമല സ്ത്രീപ്രവേശന വിഷയത്തില്‍നിന്നും പിന്നോട്ടില്ല. നാളെ ആലപ്പുഴയില്‍ നടക്കുന്ന പരിപാടിയില്‍ ആചാരലംഘനം നടത്തിയ ബിന്ദു അമ്മിണി, കനക ദുര്‍ഗയും പങ്കെടുക്കുമെന്നും ഇവര്‍ വ്യക്തമാക്കുന്നു.
