ഇന്ത്യയുടെ ആദ്യ സംയുക്ത സൈനിക മേധാവിയായി കരസേനയുടെ മുന് തലവന് ബിപിന് റാവത്ത് ഇന്ന് ചുമതലയേല്ക്കുമ്പോള് അത് പുതിയ മാറ്റങ്ങള്ക്കു വഴിയൊരുക്കും. അദ്ദേഹം ഇതിന് മുമ്പ് വഹിച്ച പദവികളിലൊക്കെയും കാഴ്ചവച്ച നേതൃപാടവത്തില് ആര്ക്കും തെല്ലും സംശയമില്ല. അതുകൊണ്ടുതന്നെയാണ് ചീഫ് ഓഫ് ഡിഫന്സ് സ്റ്റാഫ്(സിഡിഎസ്) എന്ന പുതിയ പദവിയില് ബിപിന് റാവത്തിനെ കേന്ദ്ര സര്ക്കാര് നിയമിച്ചതും.
രാജ്യസുരക്ഷയുടെ കാര്യത്തില് മൂന്ന് സേനാ വിഭാഗങ്ങളേയും ഏകോപിപ്പിച്ച് കൊണ്ടുപോവുക എന്ന ഭാരിച്ച ഉത്തരവാദിത്തമാണ് റാവത്തിന് നിറവേറ്റാനുള്ളത്. സേനയുടെ പ്രവര്ത്തനം കൂടുതല് മെച്ചപ്പെടുത്തുക എന്നതാണ് ലക്ഷ്യം. മൂന്ന് വര്ഷത്തേയ്ക്കാണ് നിയമനം. 1999 ല് കാര്ഗില് യുദ്ധത്തിലെ പിഴവുകള് അന്വേഷിച്ച ഉന്നതതല സമിതിയാണ് മൂന്ന് സേനകളുടേയും ഏകോപന മേധാവിയായി ചീഫ് ഓഫ് ഡിഫന്സ് സ്്റ്റാഫിനെ നിയമിക്കണമെന്ന ശുപാര്ശ മുന്നോട്ടുവച്ചത്.
മൂന്ന് സേനകളുടേയും സംയുക്ത കമാന്ഡ് സിഡിഎസിന്റെ നിയന്ത്രണത്തിലാവും. രാജ്യത്തെ പ്രഥമ സംയുക്ത തിയേറ്റര് കമാന്ഡ് മൂന്ന് വര്ഷത്തിനുള്ളില് രൂപീകരിക്കും. മൂന്ന് സേനാമേധാവികള്ക്കും മുകളിലായിരിക്കും സിഡിഎസ്. അതുകൊണ്ടുതന്നെ ഈ പദവി അത്യന്തം വെല്ലുവിളികള് നിറഞ്ഞതുമാണ്. നിലവില് 19 കമാന്ഡുകളാണുള്ളത്. ഇതിന് പുറമെയുള്ളവയാണ് ആന്ഡമാന് ആന്ഡ് നിക്കോബാര് കമാന്ഡ്, സ്ട്രാറ്റജിക് ഫോഴ്സ് കമാന്ഡ് എന്നിവ. ഇവയെയെല്ലാം ഒറ്റക്കുടക്കീഴില് ആക്കുക എന്ന ദൗത്യമാണ് സിഡിഎസിന് ചെയ്യാനുള്ളത്. പ്രതിരോധ മന്ത്രാലയം രൂപീകരിക്കുന്ന സൈനികകാര്യ വിഭാഗത്തിന്റെ തലവനും സംയുക്ത സൈനിക മേധാവിയായിരിക്കും. പ്രതിരോധ മന്ത്രിയെ സുപ്രധാന കാര്യങ്ങള് നേരിട്ട് അറിയിക്കുന്നതിനുള്ള അധികാരവും സിഡിഎസിന് ഉണ്ടായിരിക്കും. പ്രതിരോധമന്ത്രിയുടെ മുഖ്യപ്രതിരോധ ഉപദേഷ്ടാവും ഇദ്ദേഹമായിരിക്കും.
മൂന്ന് സേനകളുടേയും ആസൂത്രണം, പരിശീലനം എന്നിവയുടെയെല്ലാം മേല്നോട്ടവും സിഡിഎസിനായിരിക്കും. ഇത്തരത്തില് രാജ്യത്തിന്റെ പ്രതിരോധ മേഖലയെ ശക്തിപ്പെടുത്തുക, രാജ്യസുരക്ഷയെ മുന്നിര്ത്തിയുള്ള നടപടികള് ഏകോപിപ്പിക്കുക തുടങ്ങി നിരവധി ഉത്തരവാദിത്തങ്ങളാണ് ബിപിന് റാവത്തിനെ കാത്തിരിക്കുന്നത്.
1978 ല് പതിനൊന്നാം ഗൂര്ഖാ റൈഫിള്സിന്റെ അഞ്ചാം ബറ്റാലിയനില് ലഫ്റ്റനന്റ് പദവിയില് പ്രവേശിച്ച റാവത്ത് ഉത്തരാഖണ്ഡ് സ്വദേശിയാണ്. 2016 ഡിസംബറിലാണ് കരസേനയുടെ 27-ാമത് മേധാവിയായി ചുമതലയേറ്റത്. ഷിംലയിലെ സെന്റ് എഡ്വേര്ഡ് സ്കൂളിലായിരുന്നു പഠനം. രാജ്യ സുരക്ഷ, നേതൃപാടവം എന്നിവ സംബന്ധിച്ച് നിരവധി ലേഖനങ്ങള് വിവിധ ആനുകാലികങ്ങളില് പ്രസിദ്ധീകരിച്ചിട്ടുണ്ട്. മദ്രാസ് സര്വ്വകലാശാലയില് നിന്നും ഡിഫന്സ് സ്റ്റഡീസില് എംഫില് നേടിയിട്ടുണ്ട്. കമ്പ്യൂട്ടര് സ്റ്റഡീസ്, മാനേജ്മെന്റ് എന്നീ വിഷയങ്ങളില് ഡിപ്ലോമയും കരസ്ഥമാക്കിയിട്ടുണ്ട്. മീററ്റിലെ ചൗധരി ചരണ് സിങ് സര്വ്വകലാശാലയില് നിന്നും മിലിറ്ററി മീഡിയ സ്ട്രാറ്റജിക് സ്റ്റഡീസ് ഗവേഷണം പൂര്ത്തിയാക്കി ഡോക്ടറേറ്റിനും അര്ഹനായി.
