ന്യൂദല്ഹി: പാക്ക് മുന് മന്ത്രി റഹ്മാന് മാലിക്ക് ട്വിറ്ററില് മണ്ടത്തരം വിളമ്പുന്നത് തുടരുന്നു. ഇന്ത്യക്കെതിരേ എന്തെങ്കിലും ട്വീറ്റ് ചെയ്യാന് ലഭിച്ചാന് മറിച്ചൊരു ചിന്ത ഇല്ലാതെ പലപ്പോഴും അബദ്ധങ്ങള് ട്വീറ്റ് ചെയ്യുകയും പിന്നീട് ഡിലീറ്റ് ചെയ്യുകയുമാണ് പാക് മുന്മന്ത്രിയുടെ പതിവ്. ഇത്തവണയും അതു തന്നെ സംഭവിച്ചു. പാക്കിസ്ഥാന് മുന് മന്ത്രി റഹ്മാന് മാലിക് ഇന്ത്യയിലെ പൗരത്വ ഭേദഗതി നിയമ വിരുദ്ധ പ്രക്ഷോഭകരായി മൂന്നു പോണ് താരങ്ങളുടെ ചിത്രങ്ങള് റീട്വീറ്റ് ചെയ്തത്. റഹ്മാന് മാലിക് തന്റെ ട്വീറ്റ് ഡിലീറ്റ് ചെയ്തെങ്കിലും അത് സോഷ്യല് മീഡിയയില് വൈറലായി. ‘അക്ഷയ്’ എന്ന ഇന്ത്യന് ട്വിറ്റര് ഉപയോക്താവ് മൂന്ന് പോണ് താരങ്ങളുടെ ഫോട്ടോകള് സിഎഎ വിരുദ്ധ (പൗരത്വ ഭേദഗതി നിയമം) പ്രതിഷേധക്കാരായി പോസ്റ്റ് ചെയ്യുകയും റഹ്മാന് മാലിക്കിനെ ടാഗ് ചെയ്യുകയും ചെയ്തു. അക്ഷയ് ട്വീറ്റ് ചെയ്തത് ഇങ്ങനെ, ‘സെന് റഹ്മാന് മാലിക് സര്, ഇന്ത്യന് പ്രാദേശിക സിനിമകളിലെ സ്വാധീനമുള്ള നടിമാര് ഹിജാബ് ധരിച്ച് പൗരത്വ ഭേദഗതി ബില്ലിനെ എതിര്ക്കുന്ന ഇന്ത്യന് മുസ്ലിംകളോട് ഐക്യദാര്ഢ്യം പ്രകടിപ്പിക്കുന്നു. അവര്ക്ക് സല്യൂട്ട്. മോദി ഉടന് രാജിവയ്ക്കും.’
പാക്കിസ്ഥാന് റഹ്മാന് മാലിക് ഈ പോസ്റ്റ് റീട്വീറ്റ് ചെയ്തത് ഈ കുറിപ്പോടെയാണ്, ‘ദൈവം അവരെ അനുഗ്രഹിക്കട്ടെ.’ പിന്നീട് ആളുകള് വലിയ തെറ്റ് ചൂണ്ടിക്കാണിച്ചതോടെ ട്വീറ്റ് നീക്കം ചെയ്തെങ്കിലും പാക് മുന്മന്ത്രിയുടെ മണ്ടത്തരം ഇതിനകം വൈറലായി. ഇന്ത്യന് ട്വിറ്റര് അക്കൗണ്ടുകാര് പലപ്പോഴും കബളിപ്പിക്കാന് ഉപയോഗിക്കുന്നത് റഹ്മാന് മാലിക്കിനെയാണ്.
നേരത്തേ, റഹ്മാന് മാലിക്ക് ഇന്ത്യക്കാരന്റെ ട്രോള് ചതിയില് പെട്ടിരുന്നു. @ബീയിങ് ഹ്യൂമര് എന്ന വളരെ അധികം ഫോളോവേഴ്സുള്ള ട്വിറ്റര് ഐഡിയാണ് പാക് മുന്മന്ത്രിയെ ശരിക്കും പറ്റിച്ചത്. കശ്മീരിലെ 370ാം വകുപ്പ് റദ്ദാക്കിയതിനെതിരേയും പ്രധാനമന്ത്രി മോദിക്കെതിരേയും നിലപാട് എടുത്ത പി. ചിദംബരത്തെ സിബിഐ അറസ്റ്റ് ചെയ്തെന്നായിരുന്നു റഹ്മാന് മാലിക്കിന്റെ ട്വീറ്റ്. ഇതിനു മറുപടിയായാണു ബീയിങ് ഹ്യൂമര് എന്ന ഐഡി താങ്കള് പറഞ്ഞത് ശരിയാണെന്നും ഒപ്പം ഒരാളെ പോലീസ് വളഞ്ഞു വച്ചു ഒരു മുറിയില് മര്ദിക്കുന്ന ഒരു ചിത്രവും പോസ്റ്റ് ചെയ്തത്. ഇതു കണ്ട് ആവേശത്തോടെ റഹ്മാന് മാലിക് കൂടുതല് തെളിവ് തരാനും തന്നയാളുടെ വിവരങ്ങള് താന് രഹസ്യമായി സൂക്ഷിക്കാമെന്നും അറിയിച്ചത്.
സിബിഐ ഓഫിസില് ചിദംബരത്തെ മര്ദിക്കുന്ന ദൃശ്യമാണെന്നും തന്റെ പേര് വെളിപ്പെടുത്തരുതെന്നും ബീയിങ് ഹ്യൂമര് വീണ്ടും ആവശ്യപ്പെട്ടപ്പോള് റഹ്മാന് മാലിക് അതു സമ്മതിക്കുകയും ചെയ്തു. ചിദംബരത്തെ മര്ദിക്കുന്നതിന്റെ കൂടുതല് വ്യക്തമായ ചിത്രങ്ങള് തരാനും ചിദംബരത്തിന്റെ കുടുംബാംഗങ്ങളുടെ ആരുടെ എങ്കിലും വാട്സ്ആപ്പ് നമ്പര് തരാനും റഹ്മാന് മാലിക് ആവശ്യപ്പെട്ടു. എന്നാല്, ആരുടേയും നമ്പര് ഇല്ലെന്നും താങ്കള് ഈ ചിത്രം പരസ്യമായി ട്വിറ്ററില് പോസ്റ്റ് ചെയ്താല് നമ്പര് ഉള്ളവര് കൈമാറുമെന്നും ബീയിങ് ഹ്യൂമര് മറുപടി നല്കി. ഒപ്പം, ഈ ചിത്രം പുറത്തുവന്നാല് ചിദംബരത്തിനെതിരായ പോലീസ് അതിക്രമം നിയന്ത്രിക്കാന് ആകുമെന്നും ബീയിങ് ഹ്യൂമര്. ഇതിനു മറുപടിയായി ആണ് ഈ ചിത്രം താന് യുണൈറ്റഡ് നേഷന്സിനു അയച്ചു കൊടുക്കാമെന്നും റഹ്മാന് മാലിക്ക് അറിയിച്ചത്. ഇതും അബദ്ധമാണെന്നും മനസിലായതോടെ ട്വീറ്റ് പിന്വലിച്ചിരുന്നു.
തൊട്ടുപിന്നാലെ, കശ്മീര് വിഷയത്തെ പരാമര്ശിച്ചും പ്രധാനമന്ത്രി നരേന്ദ്ര മോദിയെ വിമര്ശിച്ചുമുള്ള ട്വീറ്റില് ഐക്യരാഷ്ട്രസഭയ്ക്ക് (യുഎന്) പകരമായി യുനോ(യുഎന്ഒ) കാര്ഡ് ഗെയിമിനെ ടാഗുചെയ്തും റഹ്മാന് മാലിക്ക് രംഗത്തെത്തിയിരുന്നു. പരിഹാസങ്ങളുമായി റീട്വീറ്റുകളും, കമ്മന്റുകളും എത്തിയപ്പോള് ട്വീറ്റ് മാറ്റി ആള് മുങ്ങി.
