ന്യൂദല്ഹി: രാജ്യത്തിന്റെ ഭാവിക്കായി തന്റെ സേവനം ഉപയോഗപ്പെടുത്തുമെന്നും ഇന്ത്യയുടെ സുരക്ഷക്കായി പുതിയ യുദ്ധതന്ത്രം ആസൂത്രണം ചെയ്യുമെന്നും സംയുക്ത സേന മേധാവി ബിപിന് റാവത്ത്. പ്രഥമ സംയുക്ത സേന മേധാവി എന്ന പദവി ഏറെ ഉത്തരവാദിത്തങ്ങളുള്ളതാണെന്നും ജനറല് ബിപിന് റാവത്ത് പറഞ്ഞു. ദല്ഹിയിലെ നാഷനല് വാര് മെമ്മോറിയലില് പ്രണാമമര്പ്പിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
കരസേന മേധാവിയെന്ന നിലയില് തന്റെ കര്ത്തവ്യം നിറവേറ്റാന് കഴിഞ്ഞതില് സംതൃപ്തിയുണ്ട്. രാജ്യത്തിന്റെ ഭാവിക്കായി പ്രവര്ത്തിക്കാന് കഴിയുമെന്ന പ്രതീക്ഷയിലാണെന്നും ബിപിന് റാവത്ത് പറഞ്ഞു.
കരസേന മേധാവി പദവിയില് നിന്നും സ്ഥാനമൊഴിഞ്ഞ ജനറല് ബിപിന് റാവത്ത് ഇന്നുതന്നെ സംയുക്ത സേന മേധാവിയായി ചുമതലയേല്ക്കും. മൂന്നു സേന വിഭാഗങ്ങളെയും കൂട്ടിയിണക്കുന്ന ഏകോപിത കേന്ദ്രമെന്ന നിലയില് സംയുക്ത സേന മേധാവിയും (സി.ഡി.എസ്) ഓഫിസും പ്രവര്ത്തിക്കും. സൈനിക മേധാവിയുടെ വിരമിക്കല് പ്രായം 62ല്നിന്ന് 65 ആയി ഉയര്ത്തിയാണ് റാവത്തിനെ സംയുക്ത സേന മേധാവിയായി നിയമിച്ചത്. ഇതുവഴി അദ്ദേഹത്തിന് 2023 വരെ പദവി വഹിക്കാം. ലഫ്. ജനറല് എം.എം. നരവനെയാണ് പുതിയ കരസേന മേധാവി.
