ശിവഗിരി: ശിവഗിരിയില് വന്ന് ദര്ശനം നടത്തി പ്രാര്ത്ഥിച്ചതുകൊണ്ട് കാര്യമില്ലെന്നും ഗുരുദേവ വചനങ്ങള് നമ്മുടെ ജീവിതത്തില് പ്രാവര്ത്തികമാക്കി അത് കുട്ടികള്ക്ക് പകര്ന്നു നല്കണമെന്നും ഉപരാഷ്ട്രപതി എം. വെങ്കയ്യ നായിഡു. എന്നാല് മാത്രമേ സമൂഹത്തില് മാറ്റങ്ങളുണ്ടാക്കാന് കഴിയൂയെന്നും അദ്ദേഹം പറഞ്ഞു. 87-ാമത് ശിവഗിരി തീര്ത്ഥാടനം ഉദ്ഘാടനം ചെയ്യുകയായിരുന്നു അദ്ദേഹം.
തൊട്ടുകൂടായ്മയും ജാതിവിവേചനവുമില്ലാതാകാന് സമൂഹത്തിന്റെ മനോഭാവത്തില് മാറ്റം വരണം. ഇത് നിയമ നിര്മ്മാണം മാത്രം കൊണ്ട് സാധിക്കില്ല. ബ്രാഹ്മണനും പറയനും മനുഷ്യസ്ത്രീക്ക് പിറന്നവരാണ്. ഒരേ ജാതിയാണ്. ഏത് മതമായാലും നമ്മുടെ രാജ്യം പുരോഗമിക്കുകയാണ് വേണ്ടത്. ഗുരുവിന്റെ വാക്കുകള്ക്ക് എന്നത്തേക്കാളും പ്രസക്തതയുള്ള സന്ദര്ഭമാണിത്. മിശ്രവിവാഹവും മിശ്രഭോജനവും ഗുരുദേവന് പ്രോത്സാഹിപ്പിച്ചു. ഗാന്ധിജിയും ഗുരുദേവനും
ജാതീയത അവസാനിപ്പിക്കുന്നതിനെക്കുറിച്ച് ചര്ച്ച ചെയ്തിരുന്നു. അയിത്തോച്ചാടനത്തിനുള്ള ഗാന്ധിജിയുടെ പരിശ്രമങ്ങള്ക്ക് ഈ കൂടിക്കാഴ്ച പ്രചോദനമായി.
മതം എന്നത് ഒരു ആരാധന രീതിയും സംസ്കാരം ജീവിത രീതിയുമാണ്. മലയാളികള് മാതൃഭാഷയില് അഭിമാനിക്കണം. മലയാളം അറിയുന്നവരോടെല്ലാം മലയാളത്തിലേ സംസാരിക്കാവൂ. മറ്റ് ഭാഷകള് പഠിക്കുന്നത് നല്ലതാണ്. പക്ഷെ മറ്റു ഭാഷകള് കണ്ണട മാത്രമാണ്. നമ്മുടെ കണ്ണും കാഴ്ചശക്തിയും മാതൃഭാഷയാണെന്നും അതില്ലാതെ കണ്ണടകൊണ്ട് കാര്യമില്ലെന്നും ഉപരാഷ്ട്രപതി പറഞ്ഞു
വിദ്യാസമ്പാദനവും അത് മറ്റുള്ളവക്ക് പകര്ന്നു നല്കലുമാണ് ശിവഗിരി തീഥാടനത്തിന്റെ ലക്ഷ്യമെന്ന് ഗുരു പറഞ്ഞിട്ടുണ്ട്. ശ്രീനാരായണ ഗുരു മഹാനായ സന്ന്യാസി മാത്രമല്ല, തത്വചിന്തകനും വിപ്ലവകാരിയായ മനുഷ്യത്വവാദിയും സാമൂഹിക പരിഷ്കര്ത്താവുമായിരുന്നു. ഹിന്ദുസന്ന്യാസിയായിരുന്നെങ്കിലും മറ്റെല്ലാ മതങ്ങളെയും ഒരു പോലെ പരിഗണിച്ചിരുന്നു. ശ്രീനാരായണ ഗുരുവിനേക്കാള് ആധ്യാത്മിക ചൈതന്യമുള്ള ആരെയും കണ്ടിട്ടില്ലെന്നാണ് 1922ല് വര്ക്കലയിലെത്തി ഗുരുവിനെ കണ്ട രവീന്ദ്രനാഥ ടാഗോര് പറഞ്ഞതെന്നും ഉപരാഷ്ട്രപതി പറഞ്ഞു.
വികസനകാര്യത്തില് നഗരങ്ങള് പുരോഗമിക്കുേമ്പാള് ഗ്രാമങ്ങള് പിന്നോട്ടടിക്കുകയാണ്. ഇത്തരം ആശങ്കകള് പരിഹരിക്കാന് ഗുരുദേവ ദര്ശനങ്ങള്ക്കാകും. ഏത് മതത്തില്പ്പെട്ടയാളാണെങ്കിലും ഭാരതീയരാണെന്ന ബോധം എല്ലാവരിലുമുണ്ടാകണമെന്നും അദ്ദേഹം കൂട്ടിച്ചേര്ത്തു.
ശിവഗിരി മഠം പ്രസിദ്ധീകരിക്കുന്ന ഗുരുദേവ കൃതികളുടെയും സ്വാമി വിശുദ്ധാനന്ദ രചിച്ച ‘ജീവിതം ധന്യമാകട്ടെ’ എന്ന പുസ്തകവും വെങ്കയ്യ നായിഡു പ്രകാശനം ചെയ്തു. മഹാസമാധിയിലെത്തി പ്രാര്ത്ഥിച്ച ശേഷമാണ് ഉപരാഷ്ട്രപതി ഉദ്ഘാടന വേദിയിലെത്തിയത്.
ഇന്ന് രാവിലെ ആറിന് അലങ്കരിച്ച ഗുരുദേവ റിക്ഷയുമായുള്ള ശിവഗിരി പ്രദക്ഷിണത്തോടെ തീര്ത്ഥാടന ഘോഷയാത്രയ്ക്ക് തുടക്കമാകും. തുടര്ന്ന് നാനൂറിലധികം പദയാത്രകള് ശിവഗിരിയിലെത്തും. ഇന്നത്തെ തീര്ത്ഥാടന സമ്മേളനം മുഖ്യമന്ത്രി പിണറായി വിജയന് ഉദ്ഘാടനം ചെയ്യും. നാളെ തീര്ത്ഥാടനം സമാപിക്കും. സമാപന സമ്മേളനം കേന്ദ്രമന്ത്രി ആര്.കെ. സിങ് ഉദ്ഘാടനം ചെയ്യും.
ശിവഗിരി തീര്ത്ഥാടന സമ്മേളനം ഉദ്ഘാടനം ചെയ്യാനെത്തിയ ഉപരാഷ്ട്രപതി എം. വെങ്കയ്യ നായിഡു വേദിയിലേക്ക് വരുന്നു
