ആലപ്പുഴ: പാടത്ത് പണിയെടുക്കാന് തൊഴിലാളികളെ കിട്ടാനില്ലാതെ കര്ഷകര് വലയുന്നു. ഇതരസംസ്ഥാന തൊഴിലാളികളാണ് ഇപ്പോള് ആശ്രയം. തൊഴിലുറപ്പ് ജോലികള് നിര്ത്തിവയ്ക്കണമെന്നും ആവശ്യമുയരുന്നു. കുട്ടനാട്ടില് തൊഴിലാളി ക്ഷാമം രൂക്ഷമാകുന്നത് കാര്ഷികമേഖലയില് പ്രതിസന്ധിക്കിടയാക്കുന്നു. നേരത്തെ കൊയ്ത്തുയന്ത്രം നിലവില് വരുന്നതിനു തൊട്ടുമുമ്പ് കുട്ടനാടന് കര്ഷകര് നേരിട്ടിരുന്നതിനു സമാന സാഹചര്യമാണ് ഇപ്പോഴുള്ളത്.
ഇത്തവണ പുഞ്ചകൃഷി ആരംഭിച്ചതോടെയാണ് കാര്ഷിക മേഖലയില് തൊഴിലാളിക്ഷാമം അതിരൂക്ഷമാകുന്നത്. കുട്ടനാട്ടില് നിന്നുള്ളവര് തൊഴിലുറപ്പ് പദ്ധതിയുള്പ്പെടെയുള്ള മറ്റു തൊഴില് മേഖലകളിലേക്കു തിരിഞ്ഞതാണ് കാര്ഷികമേഖലയിലെ തൊഴിലാളി ക്ഷാമത്തിനു കാരണം. അതേസമയം, പ്രാവീണ്യമുള്ള തദ്ദേശ തൊഴിലാളികളെ കിട്ടാതായതോടെ ഈ മേഖലയില് വിദഗ്ധരല്ലാത്ത ഇതരസംസ്ഥാന തൊഴിലാളികളെ ആശ്രയിക്കാന് കര്ഷകര് നിര്ബന്ധിതരാകുന്നു.
തൊഴിലാളിക്ഷാമം രൂക്ഷമായ സാഹചര്യത്തില് തൊഴിലുറപ്പ് ജോലികള് ഒരു മാസത്തേക്ക് നിര്ത്തിവയ്ക്കണമെന്ന് കര്ഷകരും, വിവിധ രാഷ്ട്രീയ പാര്ട്ടികളും വരെ ആവശ്യപ്പെട്ട് തുടങ്ങി. നടീല്, കളപറിക്കല് ജോലികള് വ്യാപകമായി നടക്കുന്ന സമയത്ത് തൊഴിലാളികളെ കിട്ടാതെ കര്ഷകര് പരക്കം പായുകയാണ്. താരതമ്യേന അധ്വാന ഭാരം കുറഞ്ഞ ജോലികളാണ് തൊഴിലുറപ്പിലുള്ളത്. അതിനാലാണ് തൊഴിലാളികള് ആ മേഖലയിലേക്ക് ആകര്ഷിക്കപ്പെടുന്നത്.
കായല്മേഖലയിലും പാടശേഖരങ്ങളിലും കര്ഷകര് ഇത്തവണ വ്യാപകമായി ഇതരസംസ്ഥാന തൊഴിലാളികളെയാണ് ജോലിക്ക് നിയോഗിച്ചത്. വരമ്പുവെട്ടല്, ചാലുതെളിക്കല് തുടങ്ങിയ ജോലികള്ക്കാണ് ഇതരസംസ്ഥാന തൊഴിലാളികളെ കര്ഷകര് ആശ്രയിക്കുന്നത്. കുട്ടനാട്ടില് നിന്നുള്ള തൊഴിലാളികള് ഇപ്പോള് ദിവസം ആയിരം രൂപ വരെയാണ് ആവശ്യപ്പെടുന്നത്.
അഞ്ചു മുതല് ആറു മണിക്കൂര് വരെയാണ് നാട്ടുകാരായ തൊഴിലാളികള് പാടത്ത് പണിയെടുക്കുന്നത്. അതേസമയം, ഇതരസംസംസ്ഥാന തൊഴിലാളികള് എട്ടു മണിക്കൂര് ജോലി ചെയ്യും. പണിയിലെ പ്രാവീണ്യമില്ലായ്മ ജോലിയുടെ വേഗത്തെയും പൂര്ണതയെയും ബാധിക്കുന്നു. നാടന് തൊഴിലാളികളെ അപേക്ഷിച്ച് വേതനം കുറവാണെന്നത് കര്ഷകര്ക്ക് ആശ്വാസകരമാണ്. എട്ടുമണിക്കൂര് ജോലിക്ക് 700 മുതല് 750 രൂപയാണ് ഇവര്ക്കു കൂലി. ആലപ്പുഴ ജില്ലയില് മാത്രം കര്ഷകത്തൊഴിലാളി ക്ഷേമനിധി ബോര്ഡില് അംഗങ്ങളായിട്ടുള്ളത് ഒരു ലക്ഷത്തിലേറെ പേരാണ്. ഇവരില് നാലിലൊന്നു പേരെങ്കിലും പണിക്കിറങ്ങിയാല് കാര്ഷിക മേഖലയിലെ തൊഴിലാളി പ്രശ്നത്തിന് പരിഹാരമാകും. ക്ഷേമനിധിയില് വിഹിതം അടയ്ക്കുകയും മറ്റു തൊഴിലുകള് ചെയ്യുന്നതുമാണ് പ്രതിസന്ധിയാകുന്നത്.
