തിരുവനന്തപുരം: സംസ്ഥാന സര്ക്കാര് സംഘടിപ്പിക്കുന്ന ലോക കേരള സഭയുടെ ഭാഗമായി സര്ക്കാരിന്റെ കീഴിലുള്ള സംസ്ഥാന മീഡിയ അക്കാഡമിയുടെ ലോക കേരള മാധ്യമ സഭയില് പാനലിസ്റ്റായ തട്ടിപ്പു കേസ് പ്രതിയും. മാരകരോഗമെന്നു നുണപറഞ്ഞു സോഷ്യല് മീഡിയ വഴി പണംതട്ടിപ്പ് നടത്തിയ കേസിലെ മുഖ്യ പ്രതിയും സിപിഎം സൈബര് സഖാവുമായ സുനിത ദേവദാസാണ് പരിപാടിയുടെ ഭാഗമായുള്ള സംവാദത്തില് പാനലിസ്റ്റായി പങ്കെടുക്കുന്നത്. ക്യാനഡയില് താമസിക്കുന്ന സുനിത ദേവദാസ് ഈ പരിപാടിയില് പങ്കെടുക്കാനായാണു തിരുവനന്തപുരത്ത് എത്തിയത്. ഡെലിഗേറ്റായി സ്വന്തം ചെലവില് മാധ്യമപ്രവര്ത്തകര്ക്ക് പരിപാടിയില് പങ്കെടുക്കാന് സാധിക്കുമെങ്കിലും സുനിതയുടെ പേര് ഔദ്യോഗിക പാനലിസ്റ്റായി നോട്ടീസില് ഉള്പ്പെടുത്തിയിട്ടുണ്ട്. ഇതിനര്ത്ഥം പരിപാടിയിലേക്ക് സുനിതയുടെ മീഡിയ അക്കാഡമി ചെലവു സഹിതം നല്കി ക്ഷണിച്ചു എന്നാണ്. മുഖ്യമന്ത്രി പിണറായി വിജയന് ഉദ്ഘാടനം ചെയ്ത പരിപാടിയില് പ്രശ്സതരായ മുതിര്ന്ന മാധ്യമപ്രവര്ത്തകര് അതിഥികളായി എത്തിയിട്ടുണ്ട്. ഇതിനിടെയിലാണ് തട്ടിപ്പുകേസിലെ പ്രതിയെ പാനലിസ്റ്റിലായി ഉള്പ്പെടുത്തിയത്.
നവകേരളത്തിന്റെ ആഗോള പരിപ്രേക്ഷ്യം എന്ന സംവാദത്തിലാണ് സുനിതയെ പാനസ്റ്റിലായി ഉള്പ്പെടുത്തിയത്. സന്തോഷ് ജോര്ജ് കുളങ്ങരയാണ് സംവാദത്തിന്റെ മോഡറേറ്റര്. മാധ്യമപ്രവര്ത്തകരായ രാജേഷ് പിള്ള, ഡോ. ജോര്ജ് എം. കാക്കനാട്ട്, സുനില് ട്രൈസ്റ്റാര്, മധു കൊട്ടാരക്കര, ജോസ് പുതുശേരി എന്നിവരാണ് മറ്റു പാനലിസ്റ്റിലുകള്. ലോകമെമ്പാടുമുള്ള പ്രശസ്ത മാധ്യമപ്രവര്ത്തകരെ ആദരിക്കുകയും പരിപാടിയില് ഉള്പ്പെടുത്തുകയും ചെയ്ത ലോക കേരള മാധ്യമ സഭയില് തട്ടിപ്പുകേസ് പ്രതിയെ ഉള്പ്പെടുത്തിയതില് മാധ്യമപ്രവര്ത്തകര്ക്കിടയിലും അമര്ഷമുണ്ട്. പരിപാടിയുടെ ഉദ്ഘാടനം മുഖ്യമന്ത്രിയും സമാപന സമ്മേളന ഉദ്ഘാടനം മന്ത്രി കടകംപള്ളി സുരേന്ദ്രനുമാണ്.
മാരകരോഗമെന്നു നുണപറഞ്ഞു സോഷ്യല് മീഡിയ വഴി പണംതട്ടിപ്പ് നടത്തിയ കേസില് തിരുവനന്തപുരം സ്വദേശിയുടെ പരാതിയുടെ അടിസ്ഥാനത്തില് മാരാരിക്കുളം പോലീസാണ് കേസ് എടുത്തിരിക്കുന്നത്. ഐപിസി 420, 34 വകുപ്പുകള് പ്രകാരമാണ് കേസെടുത്തത്. സുനിത കേരളത്തില് എത്തിയതിനാല് ഈ കേസില് പോലീസ് എന്തു നടപടി സ്വീകരിക്കും എന്നതും ശ്രദ്ധേയാണ്.
നേരത്തെ തട്ടിപ്പ് കൈയോടെ പിടിച്ചപ്പോള് പണം തിരികെ നല്കുമെന്ന് സുനിത ദേവദാസ് പറഞ്ഞിരുന്നു. ആലപ്പുഴ മാരാരിക്കുളം സ്വദേശിയായ വനിതാ സഖാവാണ് തട്ടിപ്പിന് നേതൃത്വം നല്കിയത്. തനിക്ക് ക്യാന്സറാണെന്നും കുടുംബത്തിന്റെ ദയനീയ അവസ്ഥയും അടക്കം വിവരിച്ച് ഫേസ്ബുക്കില് ഇവര് പോസ്റ്റിടുകയായിരുന്നു. ഒപ്പം, തലമുണ്ഡനം ചെയ്ത ചിത്രവും ഉണ്ടായിരുന്നു. ഇതിന്റെ ചുവടുപിടിച്ചാണ് സൈബര് സഖാക്കള് പിരിവ് തുടങ്ങിയത്. കാനഡയില് താമസിക്കുന്ന സുനിത ദേവദാസാണ് ഈ പിരിവിന് ചുക്കാന് പിടിച്ചതെന്നും ആരോപണം ഉയര്ന്നിരുന്നു. സുനിത വനിത സഖാവിന്റെ അക്കൗണ്ടിലേക്ക് പണം ഇടണമെന്ന് സോഷ്യല് മീഡിയ വഴി വ്യാപക പ്രചരണം നടത്തിയിരുന്നു. ഇതിന്റെ അടിസ്ഥാനത്തില് ലക്ഷങ്ങളാണ് അക്കൗണ്ടിലേക്ക് വന്നത്.
സിപിഎം അനുഭാവമുള്ളവര് വനിത സഖാവിന്റെ അക്കൗണ്ട് നമ്പര് അടക്കം ചില ഗ്രൂപ്പുകളില് പോസ്റ്റ് ചെയ്യുകയും ചെയ്തിരുന്നു. തുടര്ന്ന് ഇതില് സംശയം തോന്നിയ ചിലര് നടത്തിയ അന്വേഷണത്തില് വനിത സഖാവിന് ക്യാന്സര് പോയിട്ട് ജലദോഷം പോലുമില്ലെന്ന് വ്യക്തമായത്. ഇതോടെ സിപിഎം സംഘത്തിന്റെ തട്ടിപ്പ് പുറത്തായി. തുടര്ന്ന് സോഷ്യല് മീഡിയയില് വന് പ്രതിഷേധങ്ങള് അന്ന് ഉയര്ന്നിരുന്നു. പണം നല്കിയവരെല്ലാം തട്ടിപ്പിനെതിരേ രംഗത്തെത്തി. വിഷയം വിവാദമായതോടെ വനിത സഖാവും പോസ്റ്റ് മുക്കി. എന്നാല്, സഹായിച്ചവരെല്ലാം പണം തിരികെ ആവശ്യപ്പെട്ട് രംഗത്തു വരുകയായിരുന്നു. ഇവര് തന്നെയാണ് പോലീസിന് കഴിഞ്ഞ ദിവസം പരാതിയും നല്കിയത്.
കള്ളം പുറത്തായതോടെ പണംപിരിവിന് നേതൃത്വം നല്കിയ സുനിത വീണ്ടും നന്മമരം ചമഞ്ഞ് സോഷ്യല് മീഡിയിയില് എത്തിയിരുന്നു. തനിക്ക് തട്ടിപ്പിനെ കുറിച്ച് അറിവില്ലെന്ന് സുനിത സോഷ്യല് മീഡിയയില് ന്യായീകരിച്ചിരുന്നു. തട്ടിപ്പിലൂടെ കിട്ടിയ പണം ഉപയോഗിച്ച് മാരാരിക്കുളത്തെ വനിത സഖാവ് കാര് അടക്കം വാങ്ങിയെന്നുള്ള റിപ്പോര്ട്ടുകള് പുറത്തുവന്നിരുന്നു. സുനിതക്കെതിരെ ലഭിച്ച പരാതിയില് പ്രാഥമിക അന്വേഷണം നടത്തിയ ശേഷമാണ് പോലീസ് എഫ്ഐആര് രജിസ്റ്റര് ചെയ്തിരിക്കുന്നത്.
