മൊറിഗാവ് : കേന്ദ്ര സര്ക്കാരിന്റെ പൗരത്വ ബില്ലനെ അനുകൂലിച്ച് അസമില് തെരുവുകളിലിറങ്ങി പതിനായിരങ്ങള്. പൗരത്വ നിയമ ഭേദഗതിയെ അനുകൂലിച്ചുകൊണ്ട് മൊറിഗാവ് ജില്ലയിലെ ജാഗിറോഡില് വന് റാലിയും സംഘടിപ്പിച്ചു.
മുഖ്യമന്ത്രി സര്ബാനന്ദ സോനോവാളിന്റെ നേതൃത്വം നല്കിയ റാലിയില് 50,000ല് അധികം ആളുകള് പങ്കെടുത്തു. അസമിലെ ജനങ്ങള്ക്ക് സമാധാനവും പുരോഗതിയും വേണമെന്ന് റാലിയെ അഭിസംബോധന ചെയ്ത് സംസാരിക്കവേ മുഖ്യമന്ത്രി അറിയിച്ചു. പൗരത്വ നിയമത്തില് കേന്ദ്ര സര്ക്കാരിനെ അനുകൂലിക്കുകയാണ് ചെയ്യുന്നത്. സര്ക്കാരിനോടുള്ള വിശ്വാസമാണ് ഇവര് വ്യക്തമാക്കുന്നത്. ഇതില് അസമിലെ ജനങ്ങള്ക്ക് നന്ദി പറയുന്നതായും സോനോവാള് അറിയിച്ചു.
അതേസമയം ആയിരം വാക്കുകളേക്കാള് ശക്തമാണ് ചിത്രം. ഈ ചിത്രങ്ങള് നിങ്ങളോട് സംസാരിക്കുമെന്നാണ് ബിജെപി നേതാവ് ഹിമന്ത് ബിസ്വ ശര്മ്മ റാലിയുടെ ചിത്രങ്ങള് ട്വിറ്ററില് പങ്കുവെച്ച് വ്യക്തമാക്കിയത്. ജാഗി റോഡ് കോളേജ് ഗ്രൗണ്ടില് നിന്നും നാലു കിലോമീറ്റര് ദൂരെ കഹിക്കുച്ചി എല്പി സ്കൂളിലാണ് സമാപിച്ചത്. റാലിയില് സംസ്ഥാനത്തെ നിരവധി നേതാക്കളും പങ്കെടുത്തു.
പൗരത്വ ഭേദഗതി നിയമത്തിനെതിരെ അസമില് വന് പ്രതിഷേധങ്ങള് ഉടലെടുക്കുന്നതായുള്ള വാര്ത്തകള് പുറത്തുവന്നതിനു പിന്നാലെയാണ് ഇത്രയും വന് ജനാവലി കേന്ദ്ര സര്ക്കാരിനെ പിന്തുണച്ച് രംഗത്ത് എത്തിയിരിക്കുന്നത്. ഇത്തരത്തില് രാജ്യത്തിന്റെ വിവിധ സംസ്ഥാനങ്ങളില് പതിനായിരങ്ങളെ അണിനിരത്താന് കഴിയുന്നത് വലിയ കാര്യമാണ്. സമാധാന പരമായ റാലികള് സംഘടിപ്പിക്കാന് സാധിക്കുന്നത് ബിജെപിക്ക് ലഭിക്കുന്ന പിന്തുണയുടെ ഭാഗമാണെന്നും നേതാക്കള് കൂട്ടിച്ചേര്ത്തു.
