കണ്ണൂര്: ആകാശവിസ്മയം തീര്ത്ത് രൂപം കൊണ്ട നൂറ്റാണ്ടിലെ വലിയ സൂര്യഗ്രഹണത്തിന് ജില്ലയുടെ വിവിധ ഭാഗങ്ങളില് സാക്ഷിയായത് ആയിരങ്ങള്. ഇന്നലെ രാവിലെ എട്ട് മണിയോടെയാണ് കേരളത്തില് ഗ്രഹണം കണ്ട് തുടങ്ങിയത്. ഒമ്പതരയോടെ വലയ ഗ്രഹണം പാരമ്യത്തിലെത്തി. പതിനൊന്നരയോടെ ഗ്രഹണം അവസാനിച്ചു. ജില്ലയില് 9.24 മുതല് 9.29 വരെയാണ് ദൃശ്യം പാരമ്യത്തിലെത്തിയത്. സൂര്യഗ്രഹണത്തെ അടുത്തറിയാന് ജില്ലാ പഞ്ചായത്തടക്കമുളള വിവിധ സ്ഥാപനങ്ങളുടേയും സംഘടനകളുടേയും നേതൃത്വത്തില് സൂര്യഗ്രഹണം ദര്ശിക്കാന് വിപുലമായ സൗകര്യങ്ങള് ഏര്പ്പെടുത്തിയിരുന്നു.
കണ്ണൂര് ടൗണ് സ്ക്വയറില് റിട്ട. ഐഎസ്ആര്ഒ ശാസത്രജ്ഞന് പി.എം. സിദ്ധാര്ത്ഥന് വലയസൂര്യഗ്രഹണത്തെക്കുറിച്ച് വിശദീകരിച്ചു. ജില്ലാ പഞ്ചായത്ത് പ്രസിഡന്റ് കെ.വി. സുമേഷ്, മേയര് സുമ ബാലകൃഷ്ണന്, കലക്ടര് ടി.വി. സുഭാഷ്, കണ്ണൂര് യൂണിവേഴ്സിറ്റി വൈസ് ചാന്സിലര് പ്രൊഫ.ഗോപിനാഥ്, ജയബാലന് മാസ്റ്റര്, അജിത്ത് മാട്ടൂല്, പി.കെ. ബൈജു, ടി. ഗംഗാധരന്, ഒ.എം. ശങ്കരന്, കെ. വിനോദ് കുമാര് എന്നിവരും പങ്കെടുത്തു.
സൂര്യഗ്രഹണം നിരീക്ഷിക്കുവാനുള്ള നിരീക്ഷണ കേന്ദ്രം ബ്രേക്ക് ത്രൂ സയന്സ് സൊസൈറ്റിയുടെ ആഭിമുഖ്യത്തില് കണ്ണൂര് പോലീസ് മൈതാനിയില് രാവിലെ 8 മുതല് 11 മണി വരെ സംഘടിപ്പിച്ചു. സുരക്ഷിതമായ സൗരഫില്റ്ററുകള് ഉപയോഗിച്ചുകൊണ്ടാണ് നിരീക്ഷണം നടന്നത്. ബ്രേക്ക് ത്രൂ സയന്സ് സൊസൈറ്റി ജില്ലാ പ്രസിഡന്റ് പ്രൊഫ. കെ.പി. സജി നിരീക്ഷണ പരിപാടിക്ക് നേതൃത്വം വഹിച്ചുകൊണ്ട് സംസാരിച്ചു. ജില്ലാ പ്രവര്ത്തകരായ അഡ്വക്കേറ്റ്. പി.സി. വിവേക്, രാമചന്ദ്രന്, അഖില് മുരളി, സുജ്ന, രാജിനി, സബില രാജേഷ്, രമ്യ വിവേക്, രാജേഷ് തുടങ്ങിയവര് സാങ്കേതിക സഹായം നല്കി. കുട്ടികളും മുതിര്ന്നവരുമുള്പ്പെടെ നിരവധി പേരാണ് രാവിലെ മുതല് സൂര്യഗ്രഹണം നേരില് കാണാനെത്തിയത്.
കൂത്തുപറമ്പ്: ജെസിഐ കുത്തുപറമ്പിന്റെ ആഭിമുഖ്യത്തില് സൂര്യഗ്രഹണ നിരീക്ഷണവും ,ബോധവത്കരണ ക്ലാസ്സും സംഘടിപ്പിച്ചു. മുന്സിപ്പാലിറ്റി ഗ്രൗണ്ടില് നടത്തിയ പരിപാടി മുന്സിപ്പല് ചെയര്മാന് എം. സുകുമാരന് ഉദ്ഘാടനം നിര്വഹിച്ചു. ജയപ്രകാശ് പന്തക്ക ക്ലാസെടുത്തു. 50 ഓളം വിദ്യാര്ത്ഥികളും അദ്ധ്യാപകരും രക്ഷിതാക്കളും പ്രവര്ത്തകരും പങ്കെടുത്തു ഡോ:ശബാന ബീഗം, പ്രജേഷ്, പി.കെ.ലിബിന്, അഖിലേഷ്, ദീപക് കുമാര്, പ്രകാശന് എന്നിവര് സംസാരിച്ചു.
