ന്യൂദല്ഹി: പ്രതികൂല കാലാവസ്ഥയിലും അര്പ്പണബോധത്തോടെ ജോലി ചെയ്യുന്ന സൈനികര്ക്ക് പ്രണാമം അര്പ്പിച്ച് കരസേന മേധാവി ബിപിന് റാവത്ത്. പല ഭൂപ്രദേശങ്ങളിലും മൈനസ് പത്തു മുതല് 45 വരെയാണ് കാലാവസ്ഥ. കടുത്ത തണുപ്പിലും രാജ്യത്തിനായി അര്പ്പണ മനസോടെ ജോലി ചെയ്യുന്ന സൈനികരെ നാം പ്രണമിക്കണമെന്നും അദ്ദേഹം പറഞ്ഞു.
ചെറിയ തണുപ്പില് പോലും നമ്മള് ജാക്കറ്റ് ധരിക്കുന്നു, തൊപ്പികള് ഉപയോഗിക്കുന്നു, കമ്പിളി പുതപ്പുകള് ഉപയോഗിക്കുന്നു. മഞ്ഞുമൂടിയ സിയാച്ചിന് പര്വതശിഖരങ്ങളില് ജോലി ചെയ്യുന്ന സൈനികരെ നാം ഒരു നിമിഷമെങ്കിലും ഓര്ക്കണം.
കാര്ഗില്, ദ്രാസ്, മുഷോഖ്, ഉറി പോലുള്ള സ്ഥലങ്ങളിലെ തണുപ്പ് അതികഠിനമാണ്. മഴ പോലെ മഞ്ഞ് പെയ്യുന്ന ലഡാക്ക് പോലുള്ള സ്ഥലങ്ങളിലെ സൈനികര്ക്കൊപ്പമാണ് തന്റെ മനസ്. ഹിമപര്വതങ്ങള്ക്കിടയില് ഓരോ ദിവസവും കഴിച്ചുകൂട്ടുന്ന സൈനികരുടെ മാനസികാവസ്ഥ താന് മനസിലാക്കുന്നെന്നും അദ്ദേഹം പറഞ്ഞു.
മഞ്ഞുമൂടിയ പ്രദേശങ്ങളെ ഭയക്കാതെ അവിടങ്ങളിലേക്ക് സ്വയം ജോലി ചെയ്യാന് അവസരം ചോദിക്കുന്ന സൈനികരുടെ നാടാണ് നമ്മുടേത്. പ്രതികൂല സാഹചര്യങ്ങളില് നേതൃസ്ഥാനം ഏറ്റെടുക്കാന് ഭാരതത്തിലെ സൈനികര് മടിക്കാറില്ല. ആദ്യം നീ, പിന്നീട് ഞാന് എന്നതിനപ്പുറം നമ്മള് ഒന്നിച്ച് എന്നതാണ് നമ്മുടെ സൈനികരുടെ ആപ്തവാക്യമെന്നും അദ്ദേഹം പറഞ്ഞു.
