ന്യൂഡല്ഹി: ഭാരതത്തിലെ കര, നാവിക, വ്യോമ സേനകളെ ഏകോപിപ്പിക്കുന്നതിനുള്ള പ്രതിരോധമേധാവിയെ (ചീഫ് ഓഫ് ഡിഫന്സ് സ്റ്റാഫ്-സി.ഡി.എസ്.) നിയമിക്കാന് മന്ത്രിസഭ തീരുമാനിച്ചു. അപ്പോയിന്റ്മെന്റ്സ് കമ്മിറ്റിയാണ് ഉപദേഷ്ടാവിനെ തീരുമാനിക്കുക. ഇപ്പോഴത്തെ കരസേനാ മേധാവി ജനറല് ബിപിന് റാവത്ത് ഈ മാസം 31 ന് വിരമിക്കുമ്പോള് അദ്ദേഹത്തെ ആദ്യത്തെ സിഡിഎസ് ആയി നിയമിക്കുമെന്നാണു പുറത്തുവരുന്ന റിപ്പോര്ട്ട്. നിലവിലുള്ള മൂന്ന് സേനാമേധാവികള്ക്കും തുല്യമായ നാല് നക്ഷത്ര റാങ്കിലുള്ള ഉദ്യോഗസ്ഥനായിരിക്കും സിഡിഎസ് എന്ന് മന്ത്രിസഭായോഗത്തിനു ശേഷം കേന്ദ്രമന്ത്രി പ്രകാശ് ജാവഡേക്കര് പറഞ്ഞു.
പ്രതിരോധമന്ത്രാലയത്തില് പുതിയതായി രൂപം നല്കുന്ന സൈനികകാര്യ വകുപ്പിന്റെ സെക്രട്ടറിയായാവും സി.ഡി.എസ്. പ്രവര്ത്തിക്കുക. കേന്ദ്രസര്ക്കാരിലെ മറ്റു സെക്രട്ടറിമാര്ക്കുള്ള സാമ്പത്തികാധികാരവും ഉണ്ടാകും. മൂന്നു സേനാമേധാവികള്ക്കു തന്നെയായിരിക്കും അതതു സേനകളുടെ നിയന്ത്രണാധികാരം. ഭരണകാര്യങ്ങളില് മാത്രമാണു പ്രതിരോധമേധാവിക്ക് ഇടപെടാനാവൂ. സംയുക്തസേനാസമിതിയുടെ സ്ഥിരം അധ്യക്ഷനും അദ്ദേഹമായിരിക്കും. സൈനികകാര്യങ്ങളില് സര്ക്കാരിന് ഉപദേശം നല്കാന് അധികാരമുള്ള ഉദ്യോഗസ്ഥനായിരിക്കും സി.ഡി.എസ്.
1999-ല് കാര്ഗില് യുദ്ധത്തിനുശേഷം നിയോഗിക്കപ്പെട്ട കെ. സുബ്രഹ്മണ്യം കമ്മിറ്റി നിര്ദേശിച്ച ആശയം 20 വര്ഷത്തിനുശേഷം പ്രധാനമന്ത്രി നരേന്ദ്ര മോദിയാണ് യാഥാര്ത്ഥമാക്കിയത്. സ്വാതന്ത്ര്യദിനത്തില് ചെങ്കോട്ടയില് രാജ്യത്തെ അഭിസംബോധന ചെയ്യവേ പ്രധാനമന്ത്രി നരേന്ദ്രമോദി ഇക്കാര്യം പറഞ്ഞിരുന്നു.
