കൊച്ചി: ദേശീയ പൗരത്വ നിയമ ഭേദഗതി രാജ്യതാല്‍പര്യത്തിനാണെന്നും സ്വാഗതം ചെയ്യുന്നുവെന്നും പ്രഖ്യാപിച്ച് മാധ്യമപ്രവര്‍ത്തകര്‍ എറണാകുളം കച്ചേരിപ്പടിയിലെ ഗാന്ധി പ്രതിമാ മണ്ഡപത്തില്‍ സംഗമിച്ചു. ചില മാധ്യമങ്ങളില്‍ നടക്കുന്ന കുപ്രചാരണം തെറ്റിദ്ധാരണ പരത്തുന്നുവെന്ന് സംഗമം ചൂണ്ടിക്കാട്ടി.
പിഎസ്‌സി മുന്‍ ചെയര്‍മാനും മുന്‍ പത്രപ്രവര്‍ത്തകനുമായ ഡോ. കെ.എസ്. രാധാകൃഷ്ണന്‍ ഉദ്ഘാടനം ചെയ്തു. റൂളും റൈറ്റും തമ്മിലുള്ള വ്യത്യാസം അറിയാത്തവരാണ് പൗരത്വ നിയമത്തെ എതിര്‍ക്കുന്നതെന്ന് അദ്ദേഹം പറഞ്ഞു. പൗരന്റെ അവകാശം റൈറ്റാണ്. അത് കോടതി നടപടികളിലൂടെ റദ്ദാക്കാം. ഉദാഹരണത്തിന് കുറ്റകൃത്യത്തില്‍ വധശിക്ഷ വിധിച്ചാല്‍ അയാളുടെ ജീവിക്കാനുള്ള അവകാശം റദ്ദാക്കിയശേഷമാണ് അത് നടപ്പാക്കുന്നത്. എന്നാല്‍ റൂള്‍, നിയമം അങ്ങനെയല്ല. പൗരത്വം അത്തരത്തിലാണ്. അത് റദ്ദാക്കാന്‍ കഴിയില്ല. ഈ നിയമം ഒരു രാജ്യത്തുനിന്ന് മറ്റൊരു രാജ്യത്തേക്ക് വിസയും പാസ്‌പോര്‍ട്ടും ഇല്ലാതെ വന്നിട്ടുള്ളവര്‍ക്ക് പൗരത്വം നല്‍കുന്നതില്‍ ഇളവു വരുത്താനാണ് ഈ നിയമ ഭേദഗതി. മൂന്ന് മതരാഷ്‌ട്രങ്ങളില്‍നിന്ന് അവിടത്തെ മത പീഡനം സഹിക്കാന്‍ വയ്യാതെ രക്ഷപ്പെട്ട് അഭയാര്‍ഥികളായി വരുന്നവര്‍ക്ക്, നിലവിലുള്ള പൗരത്വ നിയമത്തില്‍ ഇളവു വരുത്തി, പൗരത്വം കൊടുക്കാന്‍ തീരുമാനിച്ചതാണ് നിയമം. നിലവിലുള്ള നിയമത്തിലെ ഭേദഗതി മാത്രമാണ് ഇത്, പക്ഷേ ചിലര്‍ തെറ്റിദ്ധരിപ്പിക്കുകയാണ്, രാധാകൃഷ്ണന്‍ പറഞ്ഞു.
മാധ്യമ പ്രവര്‍ത്തകര്‍ക്ക് മറ്റു പൗരന്മാരില്‍നിന്ന് വ്യത്യസ്തമായ അധികാരമോ അവകാശമോ ഇല്ല. മാധ്യമ പ്രവര്‍ത്തകരായി തീവ്രാവാദികള്‍ കടക്കാന്‍ സാധ്യതയെന്ന് അറിവു കിട്ടിയാല്‍ സുരക്ഷാ ഉദ്യോഗസ്ഥര്‍ ആവശ്യപ്പെടുമ്പോള്‍ തിരിച്ചറിയല്‍ രേഖ കാണിക്കേണ്ടിവരും. മൈക്കും ക്യാമറയും ആ രേഖയല്ല. നിയമങ്ങള്‍ അനുസരിക്കാതെ, നിരന്തരമായി തെറ്റിദ്ധാരണ പുലര്‍ത്തുന്ന വാര്‍ത്തകള്‍ പരത്തുന്ന മാധ്യമ പ്രവര്‍ത്തനം രാജ്യദ്രോഹമാണ്. അതിനെതിരേ വ്യാപകമായ പ്രതിഷേധം ഉണ്ടാകണം, രാധാകൃഷ്ണന്‍ പറഞ്ഞു. പൗരത്വ നിയമ ഭേദഗതി ഒരു മനുഷ്യരുടേയും ഒരവകാശത്തേയും ലംഘിക്കാത്തതാണ്. മറിച്ചുള്ള പ്രചാരണം ദുരുപദിഷ്ടിതമാണ്. രാജ്യത്തെ ഛിന്നഭിന്നമാക്കാനാണ്. രാജ്യദ്രോഹമാണ്. അതിനെതിരേ ഉയരുന്ന മാധ്യമപ്രവര്‍ത്തകരുടെ പ്രതിഷേധത്തെ പിന്തുണയ്‌ക്കുന്നു, അദ്ദേഹം പറഞ്ഞു. ഈ പ്രതിഷേധം മാധ്യമപ്രവര്‍ത്തകര്‍ക്കോ, മാധ്യമ പ്രവര്‍ത്തക സംഘടനകള്‍ക്കോ എതിരല്ല, മറിച്ച് ആരുടെയൊക്കെയോ പ്രേരണയില്‍ കുപ്രചാരണങ്ങള്‍ അറിഞ്ഞോ അറിയാതെയോ നടത്തുന്ന ചില മാധ്യമപ്രവര്‍ത്തകര്‍ക്കുകൂടി യാഥാര്‍ഥ്യം ബോധ്യപ്പെടുത്താനുള്ള ശ്രമമാണെന്ന് ജന്മഭൂമി ഡെപ്യൂട്ടി എഡിറ്റര്‍ കാവാലം ശശികുമാര്‍ പറഞ്ഞു.
രാജേഷ് ചന്ദ്രന്‍ (ജനം ടിവി ഓണ്‍ലൈന്‍), ജിജീഷ് കരുണാകരന്‍ (ജനം ടിവി), റോഷന്‍ പള്ളുരുത്തി (ജന്മഭൂമി) എന്നിവര്‍ സംസാരിച്ചു.
