ന്യൂദല്ഹി: പ്രതിപക്ഷ പാര്ട്ടികളുടെ വ്യാജ പ്രചാരണത്തെ തുടര്ന്ന് രാജ്യത്തിന്റെ വിവിധ ഭാഗങ്ങളിലുണ്ടായ കലാപങ്ങള് കെട്ടടങ്ങിത്തുടങ്ങിയതായി കേന്ദ്ര ആഭ്യന്തരമന്ത്രാലയത്തിന്റെ വിലയിരുത്തല്. മുസ്ലീങ്ങളെ ഇന്ത്യയില് നിന്ന് പുറത്താക്കാന് പോകുന്നുവെന്ന കള്ളപ്രചാരണം വിശ്വസിച്ച് ന്യൂനപക്ഷ ജനവിഭാഗം തെരുവിലിറങ്ങുകയും വിവിധ നഗരങ്ങളില് അക്രമങ്ങള് അരങ്ങേറുകയും ചെയ്തിരുന്നു. എന്നാല് യാഥാര്ത്ഥ്യം തിരിച്ചറിഞ്ഞതോടെ മുസ്ലിം ജനവിഭാഗം പ്രക്ഷോഭ രംഗത്ത് നിന്ന് പിന്തിരിഞ്ഞതായി കേന്ദ്രആഭ്യന്തരമന്ത്രാലയത്തിന് ലഭിച്ച റിപ്പോര്ട്ടുകള് വ്യക്തമാക്കുന്നു. പ്രധാനമന്ത്രി നരേന്ദ്രമോദിയുടെ നേതൃത്വത്തില് കേന്ദ്രസര്ക്കാരും ബിജെപിയും യാഥാര്ത്ഥ്യങ്ങളും വസ്തുതകളും വ്യക്തമാക്കി പ്രചാരണം ആരംഭിച്ചതും ജനങ്ങളില് നിന്ന് തെറ്റിദ്ധാരണ അകലാന് കാരണമായി.
പൗരത്വ ഭേദഗതി നിയമം നടപ്പായതോടെ മുസ്ലീങ്ങളെ ഇന്ത്യയില് നിന്ന് പുറത്താക്കാന് പോകുന്നുവെന്ന പ്രചാരണം തെറ്റാണെന്ന് മുസ്ലിം സമൂഹത്തിന് ബോധ്യപ്പെട്ടുകഴിഞ്ഞു. ദല്ഹി ഇമാമും അജ്മീര് ദര്ഗ ഷെരീഫും ഷിയാ പണ്ഡിതന് മൗലാന ജാവദും നടത്തിയ പ്രസ്താവനകള് മുസ്ലിം ജനതയെ യാഥാര്ഥ്യം തിരിച്ചറിയാന് സഹായിച്ചു. സമര രംഗത്തുനിന്നും മുസ്ലിം സമൂഹം പിന്തിരിഞ്ഞതോടെ ജമാ അത്തെ ഇസ്ലാമിക്കാരും കമ്യൂണിസ്റ്റുകാരും ചില കോണ്ഗ്രസ്സുകാരും മാത്രമായി രംഗത്ത്. ഇത്തരക്കാരുടെ കുതന്ത്രങ്ങളാണ് കുറച്ച് ദിവസങ്ങളെങ്കിലും മുസ്ലിം സമൂഹത്തെ തെറ്റിദ്ധരിപ്പിച്ചത്.
ദല്ഹിയിലും സമീപ സംസ്ഥാനങ്ങളിലും ദിവസങ്ങളായി തുടര്ന്ന സമരങ്ങള് വെള്ളിയാഴ്ചയോടെ ഏതാണ്ട് അവസാനിച്ച നിലയിലാണ്. ജാമിയാ മിലിയ ഇസ്ലാമിയ സര്വകലാശാലയുടെ ഗേറ്റില് അമ്പതോളം വിദ്യാര്ത്ഥികള് മാത്രമാണ് നിലവില് പ്രതിഷേധിക്കാനുള്ളത്. രാജ്യത്തെല്ലായിടത്തും സമരങ്ങള് അവസാനിക്കുമ്പോള് കോണ്ഗ്രസ് രാജ്ഘട്ടില് ഇന്നലെ സത്യാഗ്രഹ സമരം ആരംഭിച്ചിട്ടുണ്ട്. വിദേശ സന്ദര്ശനം കഴിഞ്ഞ് മടങ്ങിയെത്തിയ രാഹുല് ഗാന്ധിയെ മാധ്യമങ്ങള്ക്ക് മുമ്പില് അവതരിപ്പിക്കുന്നതിനാണ് കോണ്ഗ്രസ് രാജ്ഘട്ടില് തട്ടിക്കൂട്ട് സമരം നടത്തിയത്. കോണ്ഗ്രസ് സമരത്തിന് ആളില്ലാതിരുന്നത് തന്നെ സമരത്തിന് ജനപിന്തുണ കുറഞ്ഞതിന്റെ തെളിവായി.
ചെന്നൈയിലും കൊച്ചിയിലും മാത്രമാണ് ഇന്നലെ പൗരത്വ നിയമ ഭേദഗതിക്കെതിരെ സമരം നടന്നത്. എന്നാല് കൊല്ക്കത്തയില് പൗരത്വ നിയമ ഭേദഗതിയെ അനുകൂലിച്ചും മമതാ ബാനര്ജി സര്ക്കാരിന്റെ ഭീഷണിയെ മറികടന്നും പതിനായിരങ്ങള് ബിജെപി റാലിയില് അണിനിരന്നു. ദേശീയ വര്ക്കിങ് പ്രസിഡന്റ് ജെ.പി നദ്ദയുടെ നേതൃത്വത്തിലായിരുന്നു കൊല്ക്കത്തയിലെ റാലി. രാജ്യത്തെ ആയിരം കേന്ദ്രങ്ങളില് മഹാറാലികള് നടത്തിയും വീടുകള് കയറി പൗരത്വ നിയമഭേദഗതിയെപ്പറ്റി അവബോധം സൃഷ്ടിക്കാനുമാണ് ബിജെപിയുടെ തീരുമാനം. ഒരുമാസം നീണ്ടുനില്ക്കുന്ന പ്രചാരണ പരിപാടികള് രാജ്യവ്യാപകമായി ആരംഭിച്ചിട്ടുണ്ട്.
