കൊച്ചി: പൗരത്വ ഭേദഗതി നിയമത്തിന്റെ വസ്തുതകള് വ്യക്തമാക്കി പ്രധാനമന്ത്രി നരേന്ദ്രമോദി നടത്തിയ പ്രസംഗത്തിലെ ഭാഗങ്ങള് ഉദ്ധരിച്ച് അവഹേളിച്ച് ചലച്ചിത്ര അക്കാദമി ചെയര്മാനും സംവിധായകനുമായ കമാലുദ്ദീന്. നിങ്ങള് എന്നെ വെറുത്തോളൂ, രാജ്യത്തെ വെറുക്കരുതെ എന്ന പ്രധാനമന്ത്രി നരേന്ദ്രമോദിയുടെ പ്രസ്താവനക്കെതിരെയാണ് കമല് സംസാരിച്ചത്.
ഞങ്ങള്ക്ക് നരേന്ദ്ര മോദിയോട് വെറുപ്പാണ്. ഞങ്ങള് ഇന്ത്യയെ സ്നേഹിക്കുന്നു. അതുകൊണ്ട് തന്നെ നിങ്ങളെ വെറുക്കാതിരിക്കാന് ഞങ്ങള്ക്ക് കഴിയില്ല. ജനാധിപത്യ-മതേതരത്വ മൂല്യങ്ങളില് വിശ്വസിക്കുന്ന ഒരു ജനതയ്ക്ക് ഇങ്ങനെയൊരു പ്രത്യയശാസ്ത്രവുമായി നടക്കുന്ന പ്രധാനമന്ത്രിയെ വെറുക്കാതിരിക്കാന് കഴിയില്ല എന്നുതന്നെയാണ് പറയാനുള്ളതെന്ന് കമല് പറഞ്ഞു. നരേന്ദ്ര മോദിക്കെതിരെയും അദ്ദേഹത്തിന്റെ പ്രത്യയശാസ്ത്രങ്ങള്ക്കെതിരെയും സമരം ചെയ്തുകൊണ്ടിരിക്കുമെന്നും കമല് കൂട്ടിച്ചേര്ത്തു. പൗരത്വ ഭേദഗതി നിയമത്തോടും പൗരത്വ രജിസ്റ്ററിനോടും വിയോജിപ്പ് രേഖപ്പെടുത്തി കൊച്ചിയില് നടക്കുന്ന ലോങ് മാര്ച്ചിലാണ് കമല് ഇക്കാര്യം പറഞ്ഞത്. ഉച്ചയ്ക്ക് രണ്ടിന് എറണാകുളം കലൂര് സ്റ്റേഡിയത്തില്നിന്ന് ആരംഭിച്ച മാര്ച്ച് ഷിപ്പ്യാര്ഡില് അവസാനിച്ചു.
