ബാംഗ്ലൂര്: കോണ്ഗ്രസ്സിനെ രൂക്ഷമായി വിമര്ശിച്ച് ബിജെപി എംപി തേജസ്വി സൂര്യ. കോണ്ഗ്രസ് മുസ്ലീം യുവാക്കളുടെ ജീവന്വെച്ചാണ് കളിക്കുന്നത് എന്ന് അദ്ദേഹം പറഞ്ഞു. പ്രതിഷേധങ്ങള് അരങ്ങേറുന്നത് തെറ്റിദ്ധാരണയുടെ പുറത്താണെന്നും പൗരത്വ ഭേദഗതി നിയമം എന്താണെന്ന് മനസ്സിലാക്കി നല്കാന് എല്ലാവരും ബാധ്യസ്ഥരാണെന്നും തേജസ്വി കൂട്ടിച്ചേര്ത്തു.
അതിര്ത്തിക്കപ്പുറം പീഡനങ്ങള് അനുഭവിക്കുന്ന സഹോദരങ്ങളെ ഭാരതത്തിലേക്ക് സ്വാഗതം ചെയ്യുന്നതായി പറഞ്ഞ അദ്ദേഹം അവരുടെ വരവിനെ ആഘോഷമാക്കിതീര്ക്കാന് എല്ലാവരും പങ്കാളികളാകണമെന്നും ആവശ്യപ്പെട്ടു. പാകിസ്ഥാനിലെയും ബംഗ്ലാദേശിലെയും ഉള്പ്പെടെയുള്ള അയല് രാജ്യങ്ങളിലെ ഹിന്ദുക്കള് അടക്കമുള്ള അവിടുത്തെ ന്യൂനപക്ഷങ്ങളുടെ അവസ്ഥ വളരെ ദയനീയമാണെന്നും നാലഞ്ച് തലമുറകളായി അവര് ഇന്ത്യന് പൗരന്മാരാകാന് ആശിച്ചു നില്ക്കുകയാണെന്നും അദ്ദേഹം പറഞ്ഞു.
നിയമത്തെ കുറിച്ചുള്ള ഒരു വിഭാഗം ജനതയുടെ അജ്ഞത മുതലെടുത്ത് കോണ്ഗ്രസ് നേതാക്കളാണ് പ്രശ്നങ്ങള് സൃഷ്ടിക്കുന്നതെന്നും അതിനെ തങ്ങള് പ്രതിരോധിച്ചാല് പ്രതിപക്ഷത്തിന് താങ്ങാവുന്നതിനും അപ്പുറമായിരിക്കുമെന്നും തേജസ്വി കൂട്ടിച്ചേര്ത്തു. ബാഗ്ലൂരില് ബിജെപിയുടെ ആഭിമുഖ്യത്തില് സംഘടിപ്പിച്ച പൗരത്വ നിയമ അനുകൂല റാലിയിലായിരുന്നു തേജസ്വി സൂര്യയുടെ പ്രതികരണം. ദേശീയ പൗരത്വ രജിസ്റ്ററിനേയും പൗരത്വ നിയമത്തേയും അനുകൂലിച്ച് ആയിരങ്ങളാണ് കഴിഞ്ഞ ദിവസം ബാംഗ്ലൂരിലെ തെരുവുകളില് അണിനിരന്നത്.
