ദല്ലി: വെള്ളിയാഴ്ച വൈകുന്നേരം ദല്ലിയിലെ ധര്യാഗഞ്ച് പോലീസ് സ്റ്റേഷന് പരിധിയില് കലാപം സൃഷ്ടിക്കുകയും വാഹനങ്ങള് കത്തിക്കുകയും ചെയ്തതിന് പോലീസ് പിടിയിലായ പതിനഞ്ചുപേര് നല്കിയ ജാമ്യാപേക്ഷ ദല്ലിയിലെ തീസ് ഹസാരി കോടതി തിങ്കളാഴ്ച തള്ളി. ശനിയാഴ്ച രാവിലെ അറസ്റ്റു ചെയ്യപ്പെട്ട ഇവര് കഴിഞ്ഞ രണ്ടു ദിവസമായി ജൂഡീഷ്യല് കസ്റ്റഡിയിലായിരുന്നു. ഐപിസി 436,120 ബി, 353, 323 എന്നീ വകുപ്പുകള് പ്രകാരമാണ് അറസ്റ്റ് ചെയ്യപ്പെട്ടത്.
കലാപകാരികള് ധര്യാഗഞ്ച് പോലീസ് സ്റ്റേഷന് ആക്രമിക്കുകയും കല്ലേറിലും മറ്റുമായി 17 പോലീസുകാര്ക്ക് പരിക്കേല്ക്കുകയും ചെയ്തതായി പോലീസ് കോടതിയെ ബോധിപ്പിച്ചു. പ്രതികള്ക്കായി ഹാജരാക്കപ്പെട്ട അഡ്വ. റിബേക്കാ ജോണ് പ്രതികള് വളരെ അടിസ്ഥാനപരമായ ചുറ്റുപാടുകളില് നിന്നും ഉള്ളവരാണെന്നും കത്തിക്കപ്പെട്ട വാഹനങ്ങള് പൊതുവകയല്ല സ്വകാര്യ വ്യക്തികളുടേതാണ് എന്ന് വാദിക്കുകയും ചെയ്തു. എന്നാല് കോടതി പ്രതിഭാഗത്തിന്റെ വാദങ്ങള് തള്ളുകയും പ്രതികള്ക്ക് ജാമ്യം നിഷേധിക്കുകയുമായിരുന്നു.
കഴിഞ്ഞ വെള്ളിയാഴ്ചയാണ് പൗരത്വ നിയമത്തിനെതിരെ രാജ്യ തലസ്ഥാനമായ ദല്ലിയില് ഏറ്റവും വലിയ കലാപങ്ങള് അരങ്ങേറിയത്. പൊതു സ്ഥാപനങ്ങളും സ്വകാര്യ വാഹനങ്ങളും വ്യപകമായി കലാപകാരികള് അഗ്നിക്കിരയാക്കിയിരുന്നു.
