തിരുവനന്തപുരം: ചെറുപ്പത്തിലെ സമ്പന്നതയെ നേടാനും ഉയര്ന്ന ജീവിതം നയിക്കാനുമാണ് ഋഷിമാര് നമ്മെ പഠിപ്പിച്ചതെന്ന് സ്വാമി ചിദാനന്ദപുരി. ആര്ഷവിദ്യാപ്രതിഷ്ഠാനത്തിന്റെ ആഭിമുഖ്യത്തില് പുത്തരിക്കണ്ടത്ത് നടക്കുന്ന ധര്മപ്രഭാഷണ പരമ്പരയില് ധര്മം എന്നവിഷയത്തെ അധികരിച്ച് സംസാരിക്കുകയായിരുന്നു അദ്ദേഹം.
ഐശ്വര്യത്തിനും യശസ്സിനും വേണ്ടി ഗുരുനാഥന്മാര് പോലും പ്രാര്ത്ഥിച്ചിരുന്നു. അതിനാല് തന്നെ സമര്ത്ഥവും സമ്പന്നവുമായിരുന്നു നമ്മുടെ ഭാരതം. നൂറില്പരം വര്ഷങ്ങള് കൊണ്ട് 70 ട്രില്ല്യണ് ഡോളറാണ് ബ്രിട്ടീഷുകാര് ഇവിടുന്ന് കടത്തിക്കൊണ്ടുപോയത്. പ്രാണികളുടെ അഭ്യൂദയത്തിനും നിശ്രേയസിനും എന്താണോ കാരണമാകുന്നത് അതാണ് ധര്മ്മം എന്നാണ് ഭാരതഭാഷ്യത്തില് ശങ്കരചാര്യര് പറയുന്നത്. പ്രാണികളുടെ എല്ലാതരത്തിലുമുള്ള ഉയര്ച്ചയാണ് അഭ്യൂദയം, എല്ലാ പാരതന്ത്ര്യങ്ങളില് നിന്നുമുള്ള മോചനമാണ് നിശ്രേയസ്. അത് ജീവിച്ചിരിക്കുമ്പോഴാണ് ഉണ്ടാകേണ്ടത്.
നമ്മുടെ ജീവിതത്തില് അനുഭവിക്കുന്ന സുഖത്തെക്കുറിച്ചാണ് സനാതന ധര്മം പറയുന്നത്. എന്നാല് മരണശേഷമുള്ള സുഖത്തെകുറിച്ചാണ് ചിലര് പറയുന്നത്. സ്വര്ഗത്തെക്കുറിച്ച് മരിച്ചവരല്ല ജീവിച്ചിരിക്കുന്നവരാണ് എഴുതിയിട്ടുള്ളത് അതിനാല് നമുക്ക് അത് വിശ്വസിക്കാന് കഴിയില്ല. മരണശേഷം എന്താണെന്നും എവിടെയാണെന്നും നമുക്ക് അറിയില്ല. സമസ്ത പ്രപഞ്ചവും ധര്മ്മത്തെ അനുസരിച്ച് കഴിയുന്നു. സ്വജീവിതത്തില് ധര്മം ആചരിക്കുന്നതിലൂടെ മാത്രമെ നമുക്ക് ലക്ഷ്യത്തിലെത്താന് സാധിക്കുവെന്നും സ്വാമി പറഞ്ഞു.
