തൃശൂര്: കേരളത്തിലെമ്പാടും നിരവധി ആരാധകരുള്ള ഗുരുവായൂര് പദ്മനാഭനും വലിയ കേശവനും ഉത്സവ എഴുന്നള്ളിപ്പുകളില് വിലക്കേര്പ്പെടുത്തിയ വനംവകുപ്പിന്റെ നടപടിയില് വ്യാപക പ്രതിഷേധം.
ആരോഗ്യ പ്രശ്നങ്ങളില്ലാത്ത ആനകള്ക്ക് ഒരു പരിശോധനയുമില്ലാതെ നിരോധനമേര്പ്പെടുത്തിയതിനെതിരെ കേരള എലിഫെന്റ് ഓണേഴ്സ് ഫെഡറേഷനും ആരാധകവൃന്ദവും രംഗത്തെത്തി. കഴിഞ്ഞ രാത്രിയിലാണ് ഉത്തരവിറങ്ങിയത്. ഏകാദശിയോടനുബന്ധിച്ച് ഗുരുവായൂര് കേശവന് അനുസ്മരണത്തില് ഗുരുവായൂര് പദ്മനാഭന് പങ്കെടുത്തിരുന്നു. വര്ഷങ്ങളായി ഗുരുവായൂര് കേശവന് അനുസ്മരണത്തില് കേശവന്റെ പ്രതിമയില് ഹാരമണിയിച്ച് പുഷ്പാര്ച്ചന നടത്തുന്നത് ഗുരുവായൂര് ആനത്തറവാട്ടിലെ കാരണവര് കൂടിയായ പദ്മനാഭനാണ്. എന്നാല്, അനുസ്മരണ ചടങ്ങില് വലിയ കേശവനെ പങ്കെടുപ്പിച്ചിരുന്നില്ല. അനുസ്മരണ ചടങ്ങിനു ശേഷം അര്ദ്ധരാത്രിയിലാണ് ഗജവീരന്മാര്ക്ക് വിലക്കേര്പ്പെടുത്തിയത്.
23ന് ചേര്ന്ന ജില്ലാ നാട്ടാന നിരീക്ഷണ സമിതി യോഗം പദ്മനാഭന് പാദരോഗവും വലിയ കേശവന് ക്ഷയരോഗവുമുണ്ടെന്ന് വിലയിരുത്തിയിരുന്നു. സമിതി ചെയര്മാന് കൂടിയായ ജില്ലാ കളക്ടര് ഇക്കാര്യം പരിശോധിക്കാന് നി
ര്ദേശിച്ചതാണ് വിലക്കിനിടയാക്കിയത്. കളക്ടറുടെ നിര്ദേശത്തിന്റെ അടിസ്ഥാനത്തില് അസി. ഫോറസ്റ്റ് കണ്സര്വേറ്ററാണ് ഗജരാജന്മാരുടെ എഴുന്നള്ളിപ്പ് വിലക്കിയത്. മൃഗസംരക്ഷണ വകുപ്പിലെ ഡോക്ടര്മാര് അടങ്ങുന്ന സംഘം പരിശോധിച്ച് വ്യക്തത വരുത്തുന്നത് വരെ എഴുന്നള്ളിപ്പ് ഉള്പ്പെടെ ഒരു ചടങ്ങിനും രണ്ടു ആനകളെയും ഉപയോഗിക്കരുതെന്നാണ് നിര്ദേശം.
ഗുരുവായൂര് പദ്മനാഭനും വലിയ കേശവനും ആരോഗ്യ പ്രശ്നങ്ങളുണ്ടെന്ന അഭിപ്രായം യോഗ തീരുമാനമായി മാറ്റി ഗജവീരന്മാര്ക്ക് വിലക്കേര്പ്പെടുത്തിയത് പ്രതിഷേധാര്ഹവും നീതിക്ക് നിരക്കാത്തതുമായ നടപടിയാണെന്ന് കേരള എലിഫെന്റ് ഓണേഴ്സ് ഫെഡറേഷന് കുറ്റപ്പെടുത്തി.
അതേസമയം ഗുരുവായൂര് പദ്മനാഭനും വലിയ കേശവനും വിലക്കേര്പ്പെടുത്തിയ വനംവകുപ്പിന്റെ ഉത്തരവ് ലഭിച്ചിട്ടില്ലെന്ന് ഗുരുവായൂര് ദേവസ്വം അഡ്മിനിസ്ട്രേറ്റര് എസ്.വി. ശിശിര് ജന്മഭൂമിയോട് പ്രതികരിച്ചു. ഗജവീരന്മാരെ എഴുന്നള്ളിക്കുന്നതിന് നിലവില് വിലക്കില്ല. അഡീഷണല് ചീഫ് കണ്സര്വേറ്ററുടെ അനുമതിയുള്ളതിനാല് ആനകളെ എഴുന്നള്ളിക്കാവുന്നതാണ്. ഗുരുവായൂര് പദ്മനാഭനെ ക്ഷേത്ര ചടങ്ങുകളില് ഇപ്പോഴും പങ്കെടുപ്പിക്കുന്നുണ്ട്. ഗജവീരന്മാരെ എഴുന്നള്ളിക്കുന്നതിന് വിലക്കേര്പ്പെടുത്തിയ വനംവകുപ്പിന്റെ ഉത്തരവ് രേഖാമൂലം കൈമാറിയാല് ആവശ്യമായ നിയമ നടപടികള് സ്വീകരിക്കും. തുടര് തീരുമാനമെടുക്കുന്നതിന് വിഷയം വിദഗ്ധ സമിതിക്ക് വിടും.
ഗുരുവായൂര് ദേവസ്വം ആനത്തറവാട്ടിലെ ആനകള്ക്ക് അസുഖമുണ്ടെന്ന് വരുത്തി തീര്ത്ത് എഴുന്നള്ളിപ്പുകളില് നിന്ന് ഒഴിവാക്കാനുള്ള ഗൂഢശ്രമമാണ് നടപടിക്ക് പിന്നിലെന്ന് സംശയിക്കുന്നതായും ദേവസ്വം അഡ്മിനിസ്ട്രേറ്റര് ചൂണ്ടിക്കാട്ടി.
