ബെംഗളൂരു: കര്ണാടകത്തിലെ 15 നിയമസഭാ മണ്ഡലങ്ങളിലേക്ക് നടന്ന ഉപതെരഞ്ഞെടുപ്പിന്റെ വിധി ഇന്നറിയാം. രാവിലെ എട്ടിന് വോട്ടെണ്ണല് ആരംഭിക്കും. ഒന്പത് മണിയോടെ ആദ്യ ഫല സൂചനകള് അറിയാം. ഉച്ചയോടെ 15 മണ്ഡലങ്ങളിലെയും ഫലം പുറത്തുവരും.
തെരഞ്ഞെടുപ്പിന് ശേഷം ബെംഗളൂരുവിലെ വോട്ടെണ്ണല് കേന്ദ്രങ്ങളില് പോലീസ് സുരക്ഷ ശക്തമാക്കി. വോട്ടെടുപ്പ് നടന്ന ശിവാജിനഗര്, മഹാലക്ഷ്മി ലേ ഔട്ട്, കെആര് പുരം, യശ്വന്ത്പുര എന്നിവിടങ്ങളിലായി ഇന്ന് 13,000 പോലീസ് ഉദ്യോഗസ്ഥരെ വിന്യസിക്കുമെന്ന് സിറ്റി പോലീസ് കമ്മീഷണര് ഭാസ്കര് റാവു പറഞ്ഞു. 15 മണ്ഡലങ്ങളിലായി 62.18 ശതമാനം പോളിങ്ങാണ് ആകെ രേഖപ്പെടുത്തിയത്. എക്സിറ്റ് പോള് പ്രവചനങ്ങളെല്ലാം ബിജെപിക്ക് അനുകൂലമായതിനാല് സ്ഥാനാര്ത്ഥികളും നേതാക്കളും ആത്മവിശ്വാസത്തിലാണ്. 15 മണ്ഡലങ്ങളിലെ തെരഞ്ഞെടുപ്പ് ഫലം പുറത്തുവരുന്നതോടെ സഭയിലെ അംഗസംഖ്യ 222 ആയി ഉയരും. സംസ്ഥാനത്ത് അധികാരത്തിലുള്ള ബിജെപി സര്ക്കാരിന് സഭയില് കേവല ഭൂരിപക്ഷം ലഭിക്കണമെങ്കില് ആറു സീറ്റില് വിജയം അനിവാര്യമാണ്. 224 അംഗ നിയമസഭയില് 17 എംഎല്എമാരെ അയോഗ്യരാക്കിയതോടെ 207 അംഗങ്ങളാണ് ഇപ്പോള് സഭയിലുള്ളത്.
ബിജെപി-106, കോണ്ഗ്രസ്-67, ജെഡിഎസ്-34 എന്നതാണ് ഇപ്പോഴത്തെ കക്ഷിനില. കേവല ഭൂരിപക്ഷത്തിന് കുറഞ്ഞത് ആറു പേരുടെ പിന്തുണ കൂടി വേണ്ടിയിരിക്കെ 10-12 സീറ്റില് ഉറപ്പായും ജയിക്കുമെന്ന് ബിജെപി വക്താവ് ജി. മധുസൂദന് പറഞ്ഞു.
