ന്യൂദല്ഹി: ഭാരതത്തെ അപമാനിച്ച് കോണ്ഗ്രസ് നേതാവ് രാഹുല് ഗാന്ധി നടത്തിയ പ്രസ്താവനക്കെതിരെ രൂക്ഷവിമര്ശനവുമായി ഉപരാഷ്ട്രപതി എം. വെങ്കയ്യാ നായിഡു. ഇന്ത്യ റേപ്പ് കാപിറ്റലാണെന്ന പരാമര്ശം ഒരിക്കലും ശരിയല്ല. സ്വന്തം രാജ്യത്തെ അപകീര്ത്തിപ്പെടുത്തരുതെന്നും ഇത്തരം ആക്രമണങ്ങളെ രാഷ്ട്രീയവത്കരിക്കരുതെന്നും അദേഹം പറഞ്ഞു. ഇന്ത്യ ലോകത്തിനു മുന്നില് ബലാത്സംഗ തലസ്ഥാനമായാണ് അറിയപ്പെടുന്നതെന്നു വെള്ളമുണ്ടയില് നടന്ന മാനന്തവാടി നിയോജകമണ്ഡലം കണ്വെന്ഷനില് ഇന്നലെ രാഹുല് ആരോപിച്ചിരുന്നു. ഇതിന് മറുപടിയായാണ് ഉപരാഷ്ട്രപതി തന്നെ ഇന്ന് രംഗത്തുവന്നത്.
പുണെയില് നടന്ന ഒരു ചടങ്ങില് സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്. രാഹുലിന്റെ പേര് എടുത്ത് പരാമര്ശിക്കാതെയാണ് ഉപരാഷ്ട്രപതി വിമര്ശനം ഉന്നയിച്ചത്. ഇന്ത്യക്കു ചീത്തപ്പേര് വന്നുകൊണ്ടിരിക്കുകയാണ്. ആരോ പറഞ്ഞു ഇന്ത്യ എന്തിന്റെയോ തലസ്ഥാനമാണെന്നോ മറ്റോ. ഞാന് അതിനെക്കുറിച്ച് ഒന്നും പറയുന്നില്ല. പക്ഷേ നമ്മുടെ രാജ്യത്തെ ഒരിക്കലും അപകീര്ത്തിപ്പെടുത്താന് പാടില്ല. അത്തരം ആക്രമണങ്ങളെ രാഷ്ട്രീയവത്കരിക്കരുതെന്നും വെങ്കയ്യാ നായിഡു പറഞ്ഞു. സ്ത്രീകളെ അമ്മയായും സഹോദരിയായും കാണുന്നതാണ് ഭാരതത്തിന്റെ പാരമ്പര്യമെന്നും അദേഹം പറഞ്ഞു.
