ന്യൂദല്ഹി: മറ്റേതൊരു സര്ക്കാരിനേക്കാളും വിമര്ശനം നേരിടുന്ന സര്ക്കാരാണ് നരേന്ദ്ര മോദി സര്ക്കാരെന്ന് കേന്ദ്ര ആഭ്യന്തര മന്ത്രി അമിത് ഷാ. സര്ക്കാരിനെ വിമര്ശിക്കാന് ആളുകള്ക്ക് ഭയമാണെന്ന വ്യവസായി രാഹുല് ബജാജിന്റെ പ്രസ്താവനയ്ക്ക് മറുപടി നല്കുകയായിരുന്നു അദ്ദേഹം. വിമര്ശനങ്ങളെ വിഷയാടിസ്ഥാനത്തില് കാണാനാണ് കേന്ദ്ര സര്ക്കാരിന്റെ ആഗ്രഹമെന്നും പ്രശ്നങ്ങളുണ്ടെങ്കില് അതു പരിഹരിക്കപ്പെടണമെന്നാണ് ആത്മാര്ഥമായ ആഗ്രഹമെന്നും ഷാ പറഞ്ഞു.
മുംബൈയില് ഇക്കണോമിക് ടൈംസ് നടത്തിയ ഉച്ചകോടിയിലായിരുന്നു രാഷ്ട്രീയ ഉദ്യേശങ്ങളോടെയുള്ള രാഹുല് ബജാജിന്റെ ചോദ്യം. രാജ്യത്ത് കോര്പ്പറേറ്റുകള്ക്കിടയില് ഭീതിയുടെ സാഹചര്യമുണ്ടെന്നായിരുന്നു ബജാജിന്റെ പ്രസ്താവന. മറ്റു വ്യവസായി സുഹൃത്തുക്കള് ആരും തന്നെ ഇക്കാര്യം പറയില്ലെന്നറിയാം. അതിനാലാണ് ഈ തുറന്നുപറച്ചില്. രണ്ടാം യുപിഎ ഭരണകാലത്ത് ഞങ്ങള്ക്ക് ആരെ വേണമെങ്കിലും വിമര്ശിക്കാമായിരുന്നു. എന്നാലിപ്പോള് ഈ സര്ക്കാരിനെ വിമര്ശിച്ചാല് അതുള്ക്കൊള്ളുമെന്ന ആത്മവിശ്വാസമില്ല, രാഹുല് ബജാജ് പറഞ്ഞു.
രാജ്യത്താകെ അസഹിഷ്ണുതയുടെ കാറ്റുണ്ടെന്നും ആള്ക്കൂട്ട കൊലപാതകങ്ങളും പ്രജ്ഞാസിങ് താക്കൂറിന്റെ പ്രസ്താവനയും വിവരിച്ച് ബജാജ് രാഷ്ട്രീയ ചോദ്യമെറിഞ്ഞപ്പോള്, അതിനെ അതേ രീതിയില് തന്നെ അമിത് ഷാ മറുപടി നല്കി. അത്തരം എന്തെങ്കിലും സാഹചര്യമുണ്ടെന്ന് തോന്നുന്നുവെങ്കില് അതില്ലാതാക്കാനാണ് ശ്രമമെന്ന് ഷാ പറഞ്ഞു. ആരും തന്നെ പരിഭ്രമിക്കേണ്ടതോ പേടിക്കേണ്ടതോ ആയ യാതൊരു സാഹചര്യവുമില്ല. ബിജെപിസര്ക്കാര് യാതൊരുവിധ വിമര്ശനങ്ങളെയും ഭയക്കുന്നില്ല. ആര്ക്കും വിമര്ശനങ്ങളുന്നയിക്കാം. ഉന്നയിച്ച വിഷയങ്ങള് പരിശോധിച്ച് സ്വയം പരിഷ്ക്കരിക്കപ്പെടുന്ന സര്ക്കാരാണിത്, ഷാ പറഞ്ഞു.
ആള്ക്കൂട്ട കൊലപാതകങ്ങള് മുമ്പും രാജ്യത്ത് നിരവധി തവണ ഉണ്ടായിട്ടുണ്ട്. ഇപ്പോള് സംഭവിച്ചതിനേക്കാള് അധികമാണ് മറ്റു സര്ക്കാരുകളുടെ കാലത്തുണ്ടായത്. ആള്ക്കൂട്ട കൊലപാതകങ്ങളില് നിരവധി പേര് ശിക്ഷിക്കപ്പെടുന്നുണ്ടെന്നും അതൊന്നും മാധ്യമങ്ങള് ശ്രദ്ധിക്കപ്പെടുന്ന വിധം പ്രസിദ്ധീകരിക്കാറില്ലെന്നും ഷാ ചൂണ്ടിക്കാട്ടി.
പ്രജ്ഞാ സിങ് താക്കൂറിന്റെ ഗോഡ്സെ പരാമര്ശത്തില് ബിജെപിയുടെ മുതിര്ന്ന നേതാക്കളെല്ലാം തന്നെ ശക്തമായ വിമര്ശനം അഴിച്ചുവിടുകയും അവര്ക്കെതിരെ നടപടി സ്വീകരിക്കുകയും ചെയ്തിട്ടുണ്ട്. എന്നാല് പ്രജ്ഞാ താക്കൂര് ദേശസ്നേഹിയെന്ന് വിളിച്ചത് ഗോഡ്സെയാണോ ഉദ്ധംസിങിനെയാണോ എന്നതു സംബന്ധിച്ച് ആശയക്കുഴപ്പമുണ്ടായിട്ടു പോലും അവരോട് നിരുപാധികം മാപ്പ് പറയാനാണ് പാര്ട്ടിയും സര്ക്കാരും ആവശ്യപ്പെട്ടതെന്നും അമിത് ഷാ പറഞ്ഞു.
