തിരുവനന്തപുരം: ഹൈന്ദവസമൂഹം ഒന്നിക്കേണ്ടത് കാലഘട്ടത്തിന്റെ ആവശ്യമാണെന്ന് ഹിന്ദു ഐക്യവേദി സംസ്ഥാന അധ്യക്ഷ കെ.പി. ശശികല ടീച്ചര്. കിഴക്കേക്കോട്ട പ്രിയദര്ശിനി ഹാളില് ഹിന്ദു ഐക്യവേദി ജില്ലാ സമിതിയുടെ കുടുംബസംഗമ ചടങ്ങ് ഉദ്ഘാടനം ചെയ്യുകയായിരുന്നു അവര്. ഇന്നത്തെ സാഹചര്യത്തില് വിവിധതരത്തിലുള്ള വെല്ലുവിളികളാണ് ഹൈന്ദവസമൂഹം നേരിടുന്നത്. അതൊക്കെ തരണം ചെയ്യണമെങ്കില് ഹൈന്ദവസമൂഹം ഒന്നിക്കണം. വെല്ലുവിളികളുടെ തീവ്രതയും ഭാവഭേദങ്ങളും മനസ്സിലാക്കി പ്രതികരിക്കാന് സജ്ജമാകണം.
ഒരുകാലത്ത് നമ്മുടെ രാജാക്കന്മാരുടെ അന്തസ്സായിരുന്നു ചതുരംഗപ്പട. കാലാളും തേരും ആനയും കുതിരയുമൊക്കെ അവര്ക്ക് വിജയം നേടിക്കൊടുത്തെങ്കിലും പാനിപ്പട്ട് യുദ്ധത്തില് രാജാക്കന്മാര്ക്ക് കീഴടങ്ങേണ്ടിവന്നത് മുഗളന്മാരുപയോഗിച്ച പീരങ്കി ഇല്ലാത്തതുകൊണ്ടാണ്. അന്ന് സംഭവിച്ച അടിമത്തമാണ് ഇന്നും തുടരുന്നത്. ഈ സ്ഥിതിഗതികള് മാറണം. ഹിന്ദുവിനെതിരെ ഉയര്ത്തുന്ന ആയുധങ്ങളെ മനസ്സിലാക്കി മുന്നോട്ടുപോയില്ലെങ്കില് വിജയിക്കാന് കഴിയില്ല. അതുകൊണ്ടുതന്നെ അറിവിനും സമ്പത്തിനും പുറമെ ആര്ക്കുമുന്നിലും അടിയറവ് വയ്ക്കാത്ത ഹൈന്ദവസമൂഹമാണ് നമുക്ക് വേണ്ടത്.
ഹൈന്ദവ ശാക്തീകരണത്തിലൂടെ ഉണരുന്ന ഹിന്ദുവിന്റെ പൊരുതുന്ന സംഘടനയാണ് ഹിന്ദു ഐക്യവേദിയെന്നു ശശികല ടീച്ചര് പറഞ്ഞു. ഓരോ പ്രവര്ത്തകനും രൂപപ്പെടുന്നതും അംഗീകരിക്കപ്പെടുന്നതും അവരുടെ കുടുംബത്തില് നിന്നാണ്. അവര് നല്കുന്ന അംഗീകാരത്തിന് പൊതുസമൂഹത്തില് നിന്നും കിട്ടുന്ന അംഗീകാരത്തേക്കാള് മഹത്വമാണുള്ളത്. സമൂഹത്തിന് വേണ്ടി നമ്മെ വിട്ടുനല്കുന്ന സമര്പ്പണ മനോഭാവവും ത്യാഗവും ഓരോ പ്രവര്ത്തകരും അടുത്തറിയണം. സാമൂഹിക പ്രവര്ത്തനത്തോടൊപ്പം അവരുടെ കുടുംബങ്ങളുമായി ചെലവിടുന്ന നിമിഷങ്ങള്ക്ക് ലക്ഷങ്ങളേക്കാള് തിളക്കമാണുള്ളതെന്നും ശശികല ടീച്ചര് പറഞ്ഞു.
ഹിന്ദു ഐക്യവേദി ജില്ലാ പ്രസിഡന്റ് കെ.എന്. രത്നകുമാര് അധ്യക്ഷത വഹിച്ച ചടങ്ങില് ഹിന്ദു ഐക്യവേദിയുടെ ആസ്ഥാന നിര്മാണത്തിനായി ശേഖരിച്ച ഫണ്ടുകള് ജില്ലയിലെ വിവിധയിടങ്ങളില് നിന്നെത്തിയ പ്രവര്ത്തകര് ശശികല ടീച്ചര്ക്ക് കൈമാറി. സംസ്ഥാന ജനറല്സെക്രട്ടറി കെ.പി. ഹരിദാസ്, സംഘടനാ സെക്രട്ടറി സി. ബാബു, സഹ സംഘടനാ സെക്രട്ടറി ശശികുമാര്, സെക്രട്ടറി കെ. പ്രഭാകരന്, ട്രഷറര്മാരായ അരവിന്ദാക്ഷന്, ജ്യോതീന്ദ്രകുമാര്, സമിതിയംഗം തമ്പാനൂര് സന്ദീപ്, ജില്ലാ ജനറല് സെക്രട്ടറി വഴയില ഉണ്ണി, രക്ഷാധികാരി ശിവശങ്കരപിള്ള, മഹിളാ ഐക്യവേദി ജില്ലാ പ്രസിഡന്റ് സൂര്യാപ്രേം, ജനറല് സെക്രട്ടറിമാരായ ജീനബാബു, വിദ്യ സംസാരിച്ചു.
