കണ്ണൂര്: കണ്ണൂരില് പോലീസുകാരന്റെ ആത്മഹത്യാശ്രമം. പോലീസ് ഹെഡ് ക്വാര്ട്ടേഴ്സില് ജോലി ചെയ്യുന്ന പോലീസുകാരനാണ് കണ്ണൂര് റെയില്വേ സ്റ്റേഷനില് ആത്മഹത്യയ്ക്കു ശ്രമിച്ചത്. റെയില്വേ പോലീസാണ് ഇയാളെ രക്ഷപ്പെടുത്തിയത്. ഇന്നലെ രാവിലെയാണ് സംഭവം.
നേരത്തെ ഒരു മന്ത്രിക്കെതിരെ സോഷ്യല് മീഡിയയില് പ്രചരിച്ചിരുന്ന ട്രോള് ഷെയര് ചെയ്തതിന്റെ പേരില് ഇദ്ദേഹത്തെ സസ്പെന്ഡ് ചെയ്തിരുന്നു. എന്നാല് പിന്നീട് തിരിച്ചെടുക്കുകയും കണ്ണൂര് എആര് ക്യാമ്പില് ജോലിയില് പ്രവേശിപ്പിക്കുകയുമായിരുന്നു. അഞ്ചുമാസത്തോളമായി ശമ്പളം ലഭിക്കാത്തതിനെ തുടര്ന്ന് ഏറെ മാനസിക പ്രയാസമുള്ളതായി പറയുന്നു. കഴിഞ്ഞ ദിവസം ഏഴിമലയില് രാഷ്ട്രപതി എത്തിയതിനെ തുടര്ന്നുണ്ടായിരുന്ന ഡ്യൂട്ടിയില് ഇദ്ദേഹവുമുണ്ടായിരുന്നു. തിരിച്ചെത്തിയശേഷം വിശ്രമം പോലും അനുവദിക്കാതെ ഇന്ന് എആര് ക്യാമ്പില് പാറാവ് ഡ്യൂട്ടിക്ക് നിയോഗിക്കുകയായിരുന്നു.
അടുത്ത വര്ഷം വിരമിക്കാനിരിക്കെ ഏറെ സീനിയറായ ഈ ഉദ്യോഗസ്ഥനെ പാറാവ് ഡ്യൂട്ടിക്ക് നിയോഗിച്ചതില് പ്രതിഷേധമുയര്ന്നിരുന്നു. ഇതേത്തുടര്ന്ന് ഡ്യൂട്ടി എടുക്കാനും ഇദ്ദേഹം തയ്യാറായില്ല. എനിക്ക് ശാരീരിക ക്ഷീണമുണ്ടെന്നും ഡോക്ടറെ കാണണമെന്ന് പറഞ്ഞ് അവധിക്ക് ആവശ്യപ്പെട്ടെങ്കിലും അധികൃതര് ലീവ് അനുവദിച്ചില്ല. ഡ്യൂട്ടിക്ക് ഹാജരായില്ലെങ്കില് പിആര് നല്കുമെന്ന ഭീഷണിയും മുഴക്കിയിരുന്നു.
നിലവില് രണ്ടു പണിഷ്മെന്റ് റോള് നിലവിരിക്കേ അടുത്ത വര്ഷം വിരമിക്കാനിരിക്കെ വീണ്ടും ഇത്തരം ശിക്ഷാനടപടികള് നല്കുന്നത് ആനുകൂല്യങ്ങള് ഉള്പ്പെടെയുള്ളവയ്ക്ക് തടസം നേരിടുമെന്ന് വന്നതോടെ ഇദ്ദേഹം മാനസിക സംഘര്ഷത്തിലാവുകയായിരുന്നു. തുടര്ന്ന് റെയില്വേ പാളത്തിലൂടെ നടക്കുന്നതിനിടെ റെയില്വേ പോലീസിലുണ്ടായിരുന്ന സഹപ്രവര്ത്തകര് ഇദ്ദേഹത്തെ കണ്ട് വിവരം അന്വേഷിച്ചതോടെ ഇദ്ദേഹം പൊട്ടികരഞ്ഞുകൊണ്ട് സംഭവങ്ങള് വിവരിക്കുകയായിരുന്നു.
എആര് അസി. കമാന്ഡറെയും പോലീസ് അസോസിയേഷന് ഭാരവാഹികളെയും വിവരങ്ങള് അറിയിച്ചിട്ടുണ്ട്.
