തിരുവനന്തപുരം: ശബരിമല വിഷയത്തില് നവോത്ഥാനവും വനിതാ മതിലുമായി മുന്നിട്ടിറങ്ങിയ ഇടതു യുവജന സംഘടന നിറംമാറ്റി രംഗത്ത്. ഇത്തവണ വിശ്വാസികളുടെ സൗകര്യത്തിനു വേണ്ടിയാണ് ഡിവൈഎഫ്ഐയുടെ സമരം. പുനലൂര് കെഎസ്ആര്ടിസി ഡിപ്പോയില് ഉപരോധസമരം നടത്തുകയാണ് സിപിഎം യുവജനസംഘടന. പമ്പലിയേക്ക് സര്വീസ് ആരംഭിക്കാത്തതിനാലാണു സമരം. അമ്പതോളം ഡിവൈഎഫ്ഐ പ്രവര്ത്തകരാണ് ഡിപ്പോയ്ക്കു മുന്നില് പന്തല് കെട്ടി സമരം നടത്തുന്നത്.
മണ്ഡലമകരവിളക്ക് മഹോത്സവത്തിന് തുടക്കംകുറിച്ച് ശബരിമല ഇന്നു വൈകിട്ടാണ് തുറക്കുക. ഉച്ചയ്ക്ക് രണ്ടു മുതല് മാത്രമേ ഭക്തരെ മല ചവിട്ടാന് അനുവദിക്കൂ. പ്രധാന ഇടത്താവളമായ നിലക്കലും പമ്പയിലും ഒരുക്കങ്ങള് അവസാന ഘട്ടത്തിലാണ്. ഇത്തവണയും പമ്പയിലേക്ക് കെഎസ്ആര്ടിസി ബസുകള് മാത്രം കടത്തിവിടാനാണ് അധികൃതരുടെ തീരുമാനം.
തീര്ത്ഥാടകരുടെ വാഹനങ്ങള് നിലക്കല് ബേസ് ക്യാമ്പില് പാര്ക്ക് ചെയ്യണം. ഇതിനായി കൂടുതല് പാര്ക്കിങ് സൗകര്യം തയ്യാറാക്കിയിട്ടുണ്ട്. പാര്ക്കിംഗിനായി 300 ഏക്കര് സ്ഥലമാണ് ലഭ്യമാക്കിയിട്ടുള്ളത്. കഴിഞ്ഞ വര്ഷം 17 പാര്ക്കിംഗ് ഗ്രൗണ്ടുകളിലായി ഒരേസമയം 9000 വാഹനങ്ങള്ക്കാണ് ഇവിടെ പാര്ക്ക് ചെയ്യാന് സൗകര്യമുണ്ടായിരുന്നത്. ഇത്തവണ ഇതിനുപുറമേ 20,000 മുതല് 30,000 വരെ ചതുരശ്ര മീറ്റര് വിസ്തൃതിയില് നിലയ്ക്കല് ഗോശാലയ്ക്ക് സമീപം പുതിയതായി പാര്ക്കിംഗ് സൗകര്യം ഏര്പ്പെടുത്തിയിട്ടുണ്ട്. ഈ ഭാഗത്തേക്ക് വാഹനങ്ങള്ക്ക് എത്തുന്നതിനു പ്രത്യേകം പാതയും ഒരുക്കുന്നുണ്ട്. ഈ പാര്ക്കിംഗ് സൗകര്യം ഉള്പ്പെടെ ഒരേസമയം ചെറുതും വലുതുമായ 12,000 മുതല് 15,000 വാഹനങ്ങള് നിലയ്ക്കലിലെ വിവിധ സ്ഥലങ്ങളില്
പാര്ക്ക് ചെയ്യാന് കഴിയുമെന്നാണ് കണക്കാക്കുന്നത്. നിലക്കല് നിന്ന് പമ്പയിലേക്ക് കെഎസ്ആര്ടിസി ബസുകള് മാത്രമാകും അനുവദിക്കുക. നിലക്കലില് തീര്ത്ഥാടകര്ക്കായി 970 ശൗചാലങ്ങള് നിര്മ്മിച്ചിട്ടുണ്ട്. കുടിവെള്ളത്തിനായി നിലക്കലില് 130 വാട്ടര് കിയോസ്ക്കുകള് സജ്ജമാക്കിയിട്ടുണ്ട്. തീര്ഥാടകര്ക്ക് വിരിവെക്കാനുള്ള സൗകര്യവും ഇവിടെ ഒരുക്കിയിട്ടുണ്ട്. മറ്റ് ജില്ലകളില് നിന്നും സംസ്ഥാനത്തിനു പുറത്തുനിന്നും ഉള്പ്പെടെ ചെറുതും വലുതുമായ ഒരു കോടിയോളം വാഹനങ്ങള് തീര്ത്ഥാടന കാലയളവില് നിലയ്ക്കല് ഭാഗത്തത്തേക്ക് എത്തുമെന്നാണു പ്രതീക്ഷിക്കുന്നത്.
തീര്ത്ഥാടകരുടെ യാത്ര സുരക്ഷിതമാക്കുന്നതിന് 400 കിലോമീറ്റര് വ്യാപ്തിയില് സേഫ് സോണ് പദ്ധതിയും ആരംഭിച്ചിട്ടുണ്ട്. വാഹനാപകടങ്ങള് പരമാവധി കുറയ്ക്കുന്നതിനും അപകടത്തില്പ്പെടുന്നവര്ക്ക് അടിയന്തരമായി ചികിത്സ ലഭ്യമാക്കുന്നതിനും തകരാറുണ്ടാകുന്ന വാഹനങ്ങള് മാറ്റി ഗതാഗത തടസം ഒഴിവാക്കി അറ്റകുറ്റപ്പണി നടത്തുന്നതിനുള്ള സൗകര്യവും സേഫ് സോണ് പദ്ധതിയിലൂടെ ലഭ്യമാകും.
