കൊച്ചി : സുപ്രീംകോടതി ഭൂരിപക്ഷ വിധിയോടെ ശബരിമല വിഷയം ഭരണഘടനാ ബെഞ്ചിന് വിട്ടത് വിശ്വാസികളുടെ വിജയമാണെന്ന് ശബരിമല കര്മ്മസമിതി. കോടാനുകോടി അയ്യപ്പഭക്തരുടെ പ്രാര്ത്ഥനയുടെ ഫലമായും അയ്യപ്പസ്വാമിയുടെ അനുഗ്രഹത്താലുമാണ് ഇത്തരം ഒരു തീരുമാനം നേടാനായതെന്ന് ശബരിമല കര്മ്മ സമിതി.
ശബരിമലയില് മാത്രമല്ല, എല്ലാ മതവിഭാഗങ്ങളുടെ വിശ്വാസങ്ങളെത്തന്നെയും പൂര്ണ്ണമായും കോടതിയുടെ ഇടപെടലുകളില് നിന്നും മുക്തമാക്കുന്ന നടപടികളിലേക്ക് വരെ എത്തിച്ചേരാനുള്ള സാധ്യത ഈ വിധിയിലുണ്ട്. ദൂരവ്യാപകമായ പ്രത്യാഘാതങ്ങള് ഉണ്ടാക്കാന് സാധ്യതയുള്ളതും കോടതി തീര്പ്പ് കല്പ്പിക്കേണ്ട ഒരു വിഷയമാണോ എന്നു പോലും ചിന്തിക്കേണ്ട ഒരു വിഷയത്തെ സംബന്ധിച്ച ഒരു കേസ് ഒരു അഞ്ചംഗ ഭരണഘടനാ ബെഞ്ചാണോ തീര്പ്പ് കല്പ്പിക്കേണ്ടത് എന്ന ഒരു നിരീക്ഷണവും ഈ വിധിയിലുണ്ടെന്ന് ശബരിമല കര്മ്മ സമിതി സംസ്ഥാന ജനറല് കണ്വീനര് എസ്.ജെ.ആര്. കുമാര് അറിയിച്ചു.
ഇതെല്ലാം കണക്കിലെടുത്താണ് ഏഴോ അതിലധികമോ അംഗങ്ങളുള്ള ബെഞ്ച് ഈ കേസിന്റെ വാദം കേള്ക്കണമെന്ന നിഗമനത്തിലേക്ക് കോടതി എത്തിച്ചേര്ന്നത്. 1950 ല് സുപ്രീം കോടതിയില് ആകെ 7 ജഡ്ജിമാര് മാത്രമുണ്ടായിരുന്നപ്പോള് സ്ഥാപിതമായ അഞ്ചംഗങ്ങള് ഉള്ള ഭരണഘടനാ ബെഞ്ച് ഇപ്പോള് നിലവിലുള്ള സുപ്രീം കോടതി ജഡ്ജിമാരുടെ അംഗസംഖ്യയുമായി താരതമ്യം ചെയ്യുമ്പോള് സുപ്രധാന വിഷയങ്ങളില് തീരുമാനമെടുക്കുന്നതിന്റെ അനൗചിത്യവും ഈ വിധിയില് ചൂണ്ടിക്കാട്ടിയിട്ടുണ്ട്.
2018 സെപ്തംബര് 28 ന് സ്ത്രീ പ്രവേശനത്തിന് അനുകൂലമായി അഞ്ചംഗ ഭരണഘടനാ ബെഞ്ചിന്റെ ഭൂരിപക്ഷ വിധിയുടെ പോരായ്മയെ തന്നെയാണ് ചൂണ്ടിക്കാട്ടുന്നത്. ഏത് കാരണത്താലാണോ ശബരിമല കേസില് ഭക്തജനങ്ങളുടെ വിശ്വാസത്തെ തീര്ത്തും അവഗണിച്ചുകൊണ്ട് യുവതീ പ്രവേശനം നടത്താമെന്ന അഞ്ചംഗ ബെഞ്ച് ഭൂരിപക്ഷ വിധി പ്രസ്താവിച്ചത് അതേ സാഹചര്യം നിലനില്ക്കുന്ന മറ്റ് മതസ്ഥരുടെ ആരാധനാലയങ്ങളുമുണ്ട് എന്നും ഇത്തരം വിഷയങ്ങളില് സുപ്രീം കോടതിയില് വത്യസ്തങ്ങളായ കേസുകള് നില നില്ക്കുമ്പോള് അത് വെവ്വേറെ പരിഗണിക്കുന്നതിലുള്ള അസാംഗത്യവും ഈ വിധിയില് ചൂണ്ടിക്കാണിക്കപ്പെടുന്നു.
സുപ്രീംകോടതി തന്നെ മുമ്പ് പ്രസ്താവിച്ചിട്ടുള്ള പല വിധികളേയും ചൂണ്ടിക്കാണിച്ചു കൊണ്ട് മതപരമായ വിശ്വാസങ്ങളുടെ വിഷയങ്ങളില് കോടതികളാണോ തീരുമാനങ്ങള് എടുക്കേണ്ടത് അതോ ആ മതത്തില്പ്പെട്ടവര് ആണോ എന്ന ഒരു പുനര്വിചിന്തനത്തിനും ഈ വിധി വഴി തുറക്കുന്നു.
വിശ്വാസ സംരക്ഷണത്തിന്റെ ഒരു പുതുയുഗപ്പിറവിക്ക് നാന്ദിക്കുറിക്കുന്ന ഈ വിധി ശ്രീ അയ്യപ്പസ്വാമിയുടെ ശക്തിയുടെ വിജയമാണ്. ശരീരവും മനസ്സും പൂര്ണ്ണമായി അര്പ്പിച്ച് വിശ്വാസ സംരക്ഷണത്തിനായി നാമജപം നടത്തിയും പ്രക്ഷോഭങ്ങളില് പങ്കെടുത്തും പോലീസിന്റെ ക്രൂരമായ മര്ദ്ദനങ്ങളും ജയില് വാസവും ഏറ്റുവാങ്ങുകയും ബലിദാനികളാകുകയും ചെയ്തിട്ടുള്ള സാധാരക്കാരായ വിശ്വാസികളുടെ വിജയമാണഇതെന്നും ശബരിമല കര്മ്മ സമിതി അറിയിച്ചു.
വിശ്വാസ സംരക്ഷണത്തിനായി പ്രവര്ത്തിച്ച എല്ലാ അമ്മമാരെയും ഭക്തജനങ്ങളെയും സാമുദായിക, സാംസ്കാരിക, ധാര്മ്മിക സംഘടനകളെയും പങ്കെടുപ്പിച്ചു കൊണ്ട് ശനിയാഴ്ച 2019 നവംബര് 16ന് വൈകിട്ട് കേരളത്തിന്റെ തെരുവീഥികള് അയ്യപ്പ മന്ത്രത്താല് മുഖരിതമാകുന്ന സമാധാനപരമായ നാമജപ ഘോഷയാത്രകള് സംഘടിപ്പിക്കും. ഈ നാമജപ ഘോഷയാത്രയില് എല്ലാ വിശ്വാസികളുടെയും സഹകരണവും സാന്നിദ്ധ്യവും ഉണ്ടാകണമെന്നും എസ്.ജെ.ആര് കുമാര് അഭ്യര്ത്ഥിച്ചു.
