തിരുവനന്തപുരം : കേരളത്തില് നിര്ബന്ധിത മത പരിവര്ത്തനം നടക്കുന്നുണ്ട്. മുഖ്യമന്ത്രി പിണറായി വിജയന് യാഥാര്ത്ഥ്യം മറച്ചുവെയ്ക്കുകയാണെന്നും ദേശീയ വനിതാ കമ്മിഷന് ആക്ടിങ് ചെയര്പേഴ്സണ് രേഖ ശര്മ്മ കുറ്റപ്പെടുത്തി. തിരുവനന്തപുരം തൈക്കാട് ഗസ്റ്റ് ഹൗസില് സ്വകാര്യ മാധ്യമത്തോട് സംസാരിക്കവേയാണ് ഇക്കാര്യം തുറന്നടിച്ചത്.
സ്വന്തം തലയില് മണ്ണില് കുഴിച്ചുമൂടുന്ന ഒട്ടകപ്പക്ഷിയെപ്പോലെയാണ് പിണറായി വിജയന്. താന് മുഖ്യമന്ത്രിയായിട്ടുള്ള സംസ്ഥാനത്ത് ഇത്രയും അധികം നിര്ബന്ധിത മത പരിവര്ത്തനം നടന്നിട്ടും അതൊന്നും അറിയാത്തപോലെയാണ് മുഖ്യമന്ത്രിയുടെ നടപടികള്. സംസ്ഥാനത്തിന്റേത് അടിയന്തിര നടപടി സ്വീകരിക്കേണ്ട വിഷയമാണ്. കുറച്ചു ദിവസം കേരളത്തില് താമസിച്ചിരുന്നു. ഈ കാലയളവിലാണ് സംസ്ഥാനത്തെ നിര്ബന്ധിത മത പരിവര്ത്തനങ്ങള് ശ്രദ്ധയില് പെട്ടിട്ടുള്ളത്. എത്ര കേസുകള് റിപ്പോര്ട്ട് ചെയ്താലും എല്ലാം ശരിയാകുമെന്നാണ് പിണറായി സംസ്ഥാനത്തെ സംഭവങ്ങളെ നേരിടുന്നതെന്നും അവര് കുറ്റപ്പെടുത്തി.
സംസ്ഥാനത്തെ ഇത്തരം സംഭവങ്ങളെ ഗൗരവത്തില് എടുത്ത് വിഷയത്തില് അന്വേഷണം നടത്തണം. കൂടാതെ ഇത്തരത്തില് മത പരിവര്ത്തനം നടത്തുന്നതിനുള്ള പണം എവിടെ നിന്നാണ് ലഭിക്കുന്നത് എന്നു കൂടി അന്വേഷിച്ച് കണ്ടെത്തേണ്ടതാണ്. സംസ്ഥാനത്ത് വ്യക്തികള് കേന്ദ്രീകരിച്ചല്ല മത പരിവര്ത്തനങ്ങള് നടക്കുന്നത്. മറിച്ച് ചില സ്ഥാപനങ്ങളും മതപരിവര്ത്തനങ്ങള്ക്ക് പ്രോത്സാഹനം നല്കുന്നുണ്ട്. ഇവ കേന്ദ്രീകരിച്ചും അന്വേഷണം നടത്തേണ്ടതാണ്.
അതേസമയം മത പരിവര്ത്തനങ്ങളില് പോപ്പുലര് ഫ്രണ്ട് ഓഫ് ഇന്ത്യയ്ക്ക് പങ്കാളിത്തമുണ്ടോയെന്ന ചോദ്യത്തിന് മലപ്പുറത്തെ സത്യസരണിയുടെ ഉള്പ്പടെ ഇ പേരുകള് കേട്ടിട്ടുണ്ട്. ഇതുസംബന്ധിച്ച് അന്വേഷണം നടത്തേണ്ടതാണെന്നും രേഖ അറിയിച്ചു.
അതിനിടെ ഐഎസില് ചേരുന്നതിനായി മത പരിവര്ത്തനം ചെയ്യപ്പെട്ട നിമിഷയുടെ (ഫാത്തിമ) അമ്മ ബിന്ദു സമ്പത്ത് ദേശീയ വനിതാ കമ്മീഷനുമായി കൂടിക്കാഴ്ച്ച നടത്തി നിവേദനം നല്കി. ഇസ്ലാമിലേക്ക് മത പരിവര്ത്തനം നടത്തി വിവാഹം ചെയ്തശേഷം ഭര്ത്താവുമൊത്ത് ഐഎസില് ചേരുന്നതിനായി നിമിഷ അഫ്ഗാനിസ്ഥാനിലേക്ക് കടക്കുകയായിരുന്നു.
അഫ്ഗാനിസ്ഥാനിലേക്ക് കടന്ന ഇവര്ക്ക് എന്ത് സംഭവിച്ചു എന്നാണ് അറിയാന് സാധിച്ചിട്ടില്ല.ഇപ്പോള് ഒരുവര്ഷവും അഞ്ച് മാസത്തോളവുമായി നിമിഷയെ കാണാതായിട്ട്. ഇതുസംബന്ധിച്ച് സംസ്ഥാന സര്ക്കാരിന് നിരവധി തവണ പരാതി നല്കിയിട്ടും കണ്ടെത്താനായില്ലെന്ന് നിമിഷയുടെ അമ്മ അറിയിച്ചു.
