തളിപ്പറമ്പ്: സ്വബോധാവസ്ഥയിലിരിക്കെ തലച്ചോറിലെ മുഴ വിജയകരമായി നീക്കം ചെയ്ത് പരിയാരം മെഡിക്കല് കോളേജിലെ ഡോക്ടര്മാര്. ആശുപത്രിയിലെ ന്യൂറോ സര്ജറി വിഭാഗത്തില് ചികിത്സതേടിയ 39 കാരിയായ കാസര്ഗോഡ് സ്വദേശിനിക്കാണ് അപൂര്വ ശസ്ത്രക്രിയ നടത്തിയത്.
39 കാരിയുടെ ജീവന് രക്ഷിക്കുന്നതിന് തലച്ചോറിലെ മുഴ നീക്കം ചെയ്യണമെന്ന് ഡോക്ടര്മാര് നിര്ദ്ദേശിച്ചു. ഹൃദയസംബന്ധമായ അസുഖമുള്ളതിനാല് അനസ്തേഷ്യ നല്കുന്നത് രോഗിയുടെ ജീവനെത്തന്നെ ബാധിക്കുമെന്ന സ്ഥിതി വലിയ പ്രതിസന്ധി സൃഷ്ടിച്ചു. ഇത്തരമൊരു സാഹചര്യത്തിലാണ് സ്വബോധാവസ്ഥയില് തന്നെ തലച്ചോറിലെ മുഴ വിജയകരമായി മെഡിക്കല് കോളേജ് അധികൃതര് നീക്കം ചെയ്തത്. സ്വകാര്യ ആശുപത്രികളില് രണ്ട് ലക്ഷത്തിലേറെ രൂപ ചെലവ് വരുന്നതാണ് ചികിത്സ. പ്രിന്സിപ്പാള് ഡോ.എന്. റോയിയുടെ നിര്ദ്ദേശപ്രകാരവും കാരുണ്യാ ആരോഗ്യ സുരക്ഷാ പദ്ധതിയില് ഉള്പ്പെടുത്തി സൗജന്യമായാണ് പരിയാരത്ത് ഓപ്പറേഷന് നടത്തിയത്.
സര്ക്കാര് ഏറ്റെടുത്തശേഷം ഇതാദ്യമായാണ് ഇത്തരത്തിലൊരു അതിസങ്കീര്ണ്ണ ശസ്ത്രക്രിയ മെഡിക്കല് കോളേജ് ന്യൂറോ സര്ജ്ജറി വിഭാഗം നടത്തിയത്. അസഹ്യമായ തലവേദന കാരണമാണ് രോഗി മംഗലാപുരത്തെ ഒരു സ്വകാര്യ ആശുപത്രിയില് ആദ്യം ചികിത്സ തേടിയത്. തലച്ചോറിലെ മുഴ കണ്ടെത്തിയെങ്കിലും ഹൃദയസംബന്ധമായ ഗുരുതര പ്രശ്നം കാരണം ജനറല് അനസ്തേഷ്യ നല്കാന് കഴിയില്ലെന്നതിനാല് സര്ജ്ജറി നടത്താതെ തിരിച്ചയക്കുകയായിരുന്നു. വേദനയ്ക്ക് ശമനമില്ലാതെ രോഗി ഗുരുതരാവസ്ഥയിലായതോടെയാണ് ചികിത്സതേടി പരിയാരം മെഡിക്കല് കോളേജ് ആശുപത്രിയില് എത്തിയത്. പരിശോധനയില് ജീവനുതന്നെ ഭീഷണിയുയര്ത്തി തലച്ചോറില് വളര്ന്ന വലിയ മുഴ കണ്ടെത്തി.
എന്നാല് സാധാരണപോലെ അനസ്തേഷ്യ നല്കി ശസ്ത്രക്രിയയ്ക്ക് വിധേയയാക്കുമ്പോള് ഹൃദയത്തിലെ ദ്വാരം മറ്റൊരു രീതിയില് പ്രതിസന്ധിയും സൃഷ്ടിച്ചു. ഈ സാഹചര്യത്തിലാണ് ന്യൂറോ സര്ജറി വിഭാഗത്തിലെ ഡോ. സുരേഷ്, ഡോ. പ്രേംലാല് എന്നിവരുടെ നേതൃത്വത്തില് അനസ്തേഷ്യാ വിഭാഗം മേധാവി ഡോ. ചാള്സ്, ഡോ. ഗീത എന്നിവരുടെ പൂര്ണ്ണ സഹകരണത്തോടെ രോഗിയുടെ ജീവന് രക്ഷിക്കാനായി സ്വബോധത്തില്ത്തന്നെ രണ്ടര മണിക്കൂറോളം നീണ്ടു നിന്ന ശസ്ത്രക്രിയ വിജയകരമായി പൂര്ത്തിയാക്കിയത്. രോഗിയുടെ സംസാരശേഷിയേയും ശരീരചലനത്തെപ്പോലും പ്രതികൂലമായി ബാധിക്കാനിടയുള്ള ഏറെ സങ്കീര്ണ്ണമായ ശസ്ത്രക്രിയയാണ് പ്രതിസന്ധികളെ മുഴുവന് തരണം ചെയ്ത് ന്യൂറോ സര്ജറി വിഭാഗം ഡോക്ടര്മാരുടെ നേതൃത്വത്തില് വിജയകരമായി പൂര്ത്തിയാക്കിയത്.
