ന്യൂയോര്ക്ക്: ജീവകാരുണ്യ പ്രവര്ത്തനങ്ങള്ക്കുള്ള ഫണ്ട് രാഷ്ട്രീയ പ്രവര്ത്തനങ്ങള്ക്ക് വകമാറ്റിച്ചെലവഴിച്ചെന്ന് ചൂണ്ടിക്കാട്ടി യുഎസ് പ്രസിഡന്റ് ഡൊണാള്ഡ് ട്രംപിന് പിഴ. ന്യൂയോര്ക്ക് കോടതി 20 ലക്ഷം ഡോളര് പിഴയൊടുക്കാനാണ് ട്രംപിനോട് ആവശ്യപ്പെട്ടിരിക്കുന്നത്.
ഡോണള്ഡ് ട്രംപിന്റേയും മക്കളായ ഇവാങ്ക, എറിക് എന്നിവരുടേയും മേല്നോട്ടത്തില് പ്രവര്ത്തിക്കുന്ന ട്രംപ് ഫൗണ്ടേഷനെതിരെയാണ് ന്യൂയോര്ക്ക് കോടതി ജഡ്ജി സാലിയാന് സ്ക്രാപ്പുല ശിക്ഷാ നടപടി സ്വീകരിച്ചത്. ജീവ കാരുണ്യ പ്രവര്ത്തനങ്ങള്ക്കുള്ള ഫണ്ട് രാഷ്ട്രീയ പ്രവര്ത്തനങ്ങള്ക്കായി വകമാറ്റി ചെലവഴിച്ചു എന്നുള്ളതാണ് കേസ്.
കഴിഞ്ഞ വര്ഷം അടച്ചുപൂട്ടുന്നതിന് തൊട്ടുമുമ്പ് വരെ ട്രംപിന്റെ രാഷ്ട്രീയ പ്രചാരണങ്ങള്ക്കുള്ള ചെക്ക്ബുക്ക് എന്ന രീതിയിലാണ് ഈ ഫൗണ്ടേഷന് പ്രവര്ത്തിച്ചിരുന്നതെന്ന പ്രോസിക്യൂഷന് വാദം കോടതി അംഗീകരിച്ചു. ട്രംപ് ഫൗണ്ടേഷന് രാഷ്ട്രീയത്തില് ഇടപെടാന് അവകാശമില്ലെന്ന് ചൂണ്ടിക്കാട്ടിയാണ് 20 ലക്ഷം ഡോളര് പിഴയടയ്ക്കാന് ജഡ്ജി ഉത്തരവിട്ടത്.
അതേസമയം ഇവാങ്കയും എറികും ഫൗണ്ടേഷനില് പങ്കാളികളാണെങ്കിലും ട്രംപ് ഒറ്റയ്ക്ക് തന്നെ ഈ തുക അടയ്ക്കണമെന്നും ഉത്തരവില് പറയുന്നു. ട്രംപിന് പങ്കാളിത്തമില്ലാത്ത എട്ട് ജീവകാരുണ്യ സ്ഥാപനങ്ങള്ക്ക് ഫൗണ്ടേഷന്റെ പണം കൈമാറാനും കോടത നിര്ദ്ദേശിച്ചിട്ടുണ്ട്.
മുതിര്ന്ന ഡെമോക്രാറ്റിക് നേതാവും രാഷ്ട്രീയ എതിരാളിയുമായി ജോ ബൈഡനെതിരെ അന്വേഷണത്തിന് സമ്മര്ദം ചെലുത്തിയെന്ന ആരോപണത്തില് ട്രംപിനെ ഇംപീച്ച് ചെയ്യുന്നതിനുള്ള നടപടി നേരിടുന്നതിനിടയിലാണ് പിഴയും ചുമത്തിയിരിക്കുന്നത്. അതേസമയം രാഷ്ട്രീയലക്ഷ്യം വച്ച് ഡെമാക്രാറ്റുകള് സൃഷ്ടിച്ച കേസാണിതെന്നാണ് ട്രംപിന്റേയും അദ്ദേഹത്തിന്റെ അഭിഭാഷകരുടേയും വാദം.
