ഭുവനേശ്വര്: 3,500 കിലോമീറ്റര് സ്ട്രൈക്ക് റേഞ്ചുള്ള കെ-4 ആണവ മിസൈലിന്റെ കാര്യക്ഷമത പരീക്ഷിക്കാനൊരുങ്ങി ഇന്ത്യ. അന്തര്വാഹിനികളില് നിന്ന് ശത്രുക്കളെ ആക്രമിക്കുന്നതിന്റെ ശക്തി വര്ധിപ്പിക്കുന്നതിന്റെ ഭാഗമായണ് ഈ പരീക്ഷണം നടത്തുന്നത്. ഇന്ത്യ നിര്മിക്കുന്ന അരിഹന്ത് ക്ലാസ് ന്യൂക്ലിയര് അന്തര്വാഹിനികള്ക്കായി ഡിആര്ഡിഒയാണ് മിസൈല് സംവിധാനം വികസിപ്പിക്കുന്നത്.
ഈ അന്തര്വാഹിനികള് ഇന്ത്യയുടെ ആണവ കൂട്ടായ്മയുടെ മുഖ്യ അജണ്ടയായിരിക്കും. പദ്ധതി പ്രകാരം വെള്ളിയാഴ്ച വിശാഖപട്ടണം തീരത്തെ അണ്ടര്വാട്ടര് പ്ലാറ്റ്ഫോമില് നിന്ന് കെ -4 ആണവ മിസൈല് പരീക്ഷണാടിസ്ഥാനത്തില് ഡിആര്ഡിഒ വിക്ഷേപിക്കും. ഡിആര്ഡിഒ മിസൈലിലെ നൂതന സംവിധാനങ്ങള് പരീക്ഷിക്കുകയും ചെയ്യുമെന്ന് ഔദ്യോഗിക വൃത്തങ്ങള് വ്യക്തമാക്കി.
നിലവില് വികസിപ്പിച്ചുകൊണ്ടിരിക്കുന്ന രണ്ട് അണ്ടര്വാട്ടര് മിസൈലുകളില് ഒന്നാണ് കെ-4. ഇതുകൂടതെ 700 കിലോമീറ്ററിലധികം സ്ട്രൈക്ക് റേഞ്ചുള്ള ബിഒ-5 മിസൈലും വികസിപ്പിക്കുന്നുണ്ട്. മിസൈലിനെ പൂര്ണ്ണ സ്ട്രൈക്ക് റേഞ്ചിലാണൊ ഹ്രസ്വ റേഞ്ചിലാണൊ പരീക്ഷിക്കുകയെന്ന് ഇതുവരെ വ്യക്തമായിട്ടില്ല. എന്നാല്, ദീര്ഘദൂര മിസൈല് പരീക്ഷണങ്ങള്ക്കുള്ള മുന്നറിയിപ്പുകള് ഇതിനകം തന്നെ ഇന്ത്യ നല്കിയിട്ടുണ്ട്. കെ-4 മിസൈലിന്റെ പരീക്ഷണം കഴിഞ്ഞ മാസം ആസൂത്രണം ചെയ്തിരുന്നെങ്കിലും മാറ്റിവയ്ക്കുകയായിരുന്നുവെന്നും വരും ആഴ്ചകളില് അഗ്നി -3, ബ്രഹ്മോസ് മിസൈലുകള് പരീക്ഷിക്കാന് ഡിആര്ഡിഒ പദ്ധതിയിടുന്നുണ്ടെന്നും റിപ്പോര്ട്ടുകള് പറയുന്നു.
