കൊച്ചി: അല്ഷിഫ ആശുപത്രി ഉടമ ഷാജഹാന് യൂസഫ് വ്യാജനെന്നു തെളിഞ്ഞു. ഒരു വനിതാ ഡോക്ടറിന്റെ ലൈസന്സ് ഉപയോഗിച്ചാണ് ഇയാള് ഇന്ത്യന് മെഡിക്കല് കൗണ്സിലില് രജിസ്ട്രേഷന് ചെയ്തിരിക്കുന്നത്. ഇതേത്തുടര്ന്ന് ആഭ്യന്തര വിജിലന്സിനോട് കേസെടുക്കാന് കൗണ്സില് നിര്ദേശം നല്കി. ഷാജഹാന് യൂസഫിന്റെ മെഡിക്കല് രജിസ്ട്രേഷന് റദ്ദാക്കുകയും ചെയ്തു.
ഷാജഹാന് നടത്തിയ നിരവധി ശസ്ത്രക്രിയപിഴവുകളെ സംബന്ധിച്ച പരാതികള് ലഭിച്ചിട്ടും എളമക്കര പോലീസ് ഒരു നടപടിയും സ്വീകരിച്ചിരുന്നില്ല. ഷാജഹാന്റെ വിദ്യാഭ്യാസ യോഗ്യതാ സര്ട്ടിഫിക്കറ്റുകളില് പൊരുത്തക്കേടുകളുണ്ടെന്ന് ഐ.എം.എ നടത്തിയ അന്വേഷണത്തില് നേരത്തേ കണ്ടെത്തിയിരുന്നു. ഇതേത്തുടര്ന്നാണ് ട്രാവന് കൂര് കൊച്ചി മെഡിക്കല് കൗണ്സിലിനും മെഡിക്കല് കൗണ്സില് ഓഫ് ഇന്ത്യക്കും പരാതി നല്കിയത്. മെഡിക്കല് കൗണ്സില് നടത്തിയ പരിശോധനയില് ഷാജഹാന് നല്കിയ രജിസ്ട്രേഷന് നമ്പറില് മറ്റൊരു വനിതാ ഡോക്ടറുണ്ടെന്ന് കണ്ടെത്തി. മെഡിക്കല് കൗണ്സിലിന്റെ കണ്ടെത്തലിനെ തുടര്ന്ന് ഷാജഹാന്റെ മെഡിക്കല് രജിസ്ട്രേഷന് ട്രാവന്കൂര് കൊച്ചിന് മെഡിക്കല് കൗണ്സില് റദ്ദാക്കി.
