കൊച്ചി: കൊച്ചി റിഫൈനറിയുടെ രണ്ട് കിലോമീറ്റര് ചുറ്റളവില് പറക്കല് നിരോധിത മേഖലയായി കളക്ടറുടെ ഉത്തരവ്. ഡ്രോണ്, വിളക്കു പട്ടങ്ങള് തുടങ്ങിയവയടക്കമുള്ള വ്യോമ സാമഗ്രികള്ക്കാണ് കളക്ടര് എസ്. സുഹാസ് നിരോധനമേര്പ്പെടുത്തിയത്.
റിഫൈനറിയുടെ ആഭ്യന്തര പരിശോധനയുടെ ഭാഗമായി ഇവ ഉപയോഗിക്കുന്നതില് ഇളവ് നല്കിയിട്ടുണ്ട്. രണ്ട് മാസത്തേക്കാണ് നിരോധനം. റിഫൈനറി പരിധിയില് കഴിഞ്ഞ ജൂണ് ഒമ്പതിന് അനധികൃതമായി ഡ്രോണ് പറന്നതുമായി ബന്ധപ്പെട്ട് അമ്പലമേട് പോലീസ് കേസ് രജിസ്റ്റര് ചെയ്തിരുന്നു. ഇത്തരം സാഹചര്യങ്ങള് ദേശവിരുദ്ധ ശക്തികളോ സാമൂഹ്യ വിരുദ്ധരോ മുതലെടുക്കാനിടയുള്ള സാഹചര്യം ചൂണ്ടിക്കാട്ടിയാണ് കളക്ടറുടെ നടപടി.
ഉത്തരവ് ലംഘിക്കുന്നവര് ഐപിസി 188 വകുപ്പനുസരിച്ച് ശിക്ഷാര്ഹരായിക്കും. ഉത്തരവിന്റെ പകര്പ്പ് ബന്ധപ്പെട്ട പോലീസ് സ്റ്റേഷന്, ഗ്രാമപഞ്ചായത്ത് – താലൂക്ക് – വില്ലേജ് ഓഫീസുകള് അടക്കമുള്ള പൊതു സ്ഥലങ്ങളില് പതിക്കണമെന്നും നിര്ദ്ദേശിച്ചിട്ടുണ്ട്.
