പന്തളം: ശബരിമലയെയും ആചാരങ്ങളെയും തകര്ക്കാന് ശ്രമിച്ച സംസ്ഥാന സര്ക്കാരിനും പാര്ട്ടിക്കും തിരിച്ചടി നേരിട്ടപ്പോള് വീണ്ടുവിചാരവും കുറ്റബോധവും തോന്നിത്തുടങ്ങിയെന്ന് ആര്എസ്എസ് സംസ്ഥാന കാര്യകാരി സദസ്യന് വത്സന് തില്ലങ്കേരി പറഞ്ഞു. ശബരിമല അയ്യപ്പസേവാ സമാജത്തിന്റെ നേതൃത്വത്തില് നടക്കുന്ന അയ്യപ്പധര്മ്മ പ്രചാരണ രഥയാത്രയുടെ ഉദ്ഘാടന സഭയില് മുഖ്യപ്രഭാഷണം നടത്തുകയായിരുന്നു അദ്ദേഹം. ഭരണാധികാരികള് പ്രജാഹിതം മാനിക്കാതിരുന്നാല് പരാജയപ്പെടുമെന്നതിന് ഉദാഹരണമാണ് ശബരിമല വിഷയം. കോടിക്കണക്കിനു വിശ്വാസികളുടെ വികാരത്തെ ഇല്ലാതാക്കാനായി സംസ്ഥാന സര്ക്കാര് ചോദിച്ചു വാങ്ങിയതാണ് സുപ്രീം കോടതി വിധി. ഇത് ആചാരങ്ങളെയും അതോടൊപ്പം ഹിന്ദുധര്മ്മത്തെയും ഇല്ലാതാക്കാനുള്ള ബോധപൂര്വ്വമായ ശ്രമമാണ് ഇതിലൂടെ സര്ക്കാര് നടത്തിയത്. ആക്ടിവിസ്റ്റുകളുടെ സഹായത്തോടെയാണ് സര്ക്കാര് ശബരിമലയെ തകര്ക്കാന് ശ്രമിച്ചത്. എന്നാല് കോടിക്കണക്കിനു വിശ്വാസികള് ഒന്നായി നിന്നെതിര്ത്തതോടെ സര്ക്കാര് പരാജയപ്പെടുകയായിരുന്നു.
ചട്ടമ്പിസ്വാമികളും ശ്രീനാരായണ ഗുരുദേവനും അയ്യങ്കാളിയും കാട്ടിത്തന്ന വഴികളിലൂടെ, ടി.കെ. മാധവനും മന്നത്തു പത്മനാഭനും നേതൃത്വം നല്കി ഹിന്ദു സമൂഹത്തിലെ അനാചാരങ്ങള് ഇല്ലാതാക്കി സമൂഹത്തെ ഒന്നാക്കി. ആ പാത പിന്തുടര്ന്നു കൊണ്ടാണ് എല്ലാ സമുദായങ്ങളും ഒറ്റക്കെട്ടായി ആചാര സംരക്ഷണത്തിനായി പോരാടിയത്. കഴിഞ്ഞ വര്ഷം ഒക്ടോബര് 2ന് പന്തളം കൊട്ടാരം നേതൃത്വം നല്കി ആചാര സംരക്ഷണത്തിനായി പന്തളത്തു നടത്തിയ നാമജപ ഘോഷയാത്ര ലോകത്തെമ്പാടുമുള്ള അയ്യപ്പ വിശ്വാസികള്ക്ക് ആവേശവും പ്രേരണയും നല്കിയെന്നും അദ്ദേഹം പറഞ്ഞു.
