കോഴിക്കോട്: കൂടത്തായിക്കേസിലെ പ്രതിയായ ജോളിയുടെ മുഖത്തിട്ട ഷാള് ബലമായി മാറ്റിയ സി.പി.എം. കൊയക്കാട് ബ്രാഞ്ച് സെക്രട്ടറി പോലീസ് കസ്റ്റഡിയില്. പോലീസിന്റെ കസ്റ്റഡിയലുള്ള പ്രതിയുടെ ഷാള് മാറ്റാന് ശ്രമിച്ച ഉള്ള്യേരി കൊയക്കട് ഷാജു രാരോത്തി(44)നെയാണ് കസ്റ്റഡിയില് എടുത്തത്. ചികിത്സയ്ക്കായി ജോളിയെ കൊയിലാണ്ടി താലൂക്ക് ആശുപത്രിയില് കൊണ്ടുവന്നപ്പോഴായിരുന്ന സംഭവം. വയറുവേദനയെത്തുടര്ന്നാണ് പോലീസ് ബസില് ജോളിയെ താലൂക്ക് ആശുപത്രിയില് കൊണ്ടുവന്നത്. ജോളിയെ കാണാന് ആശുപത്രി പരിസരത്ത് ജനങ്ങള് കൂടിനിന്നിരുന്നു. ഭാര്യയ്ക്കും അമ്മയ്ക്കുമൊപ്പമാണു ഷാജു ആശുപത്രിയിലെത്തിയിരുന്നത്.
ജോളിയെ ബസില്നിന്ന് ഇറക്കിയപ്പോള് ക്യാമറാമാന്മാരും ഫോട്ടോഗ്രാഫര്മാരും തിരക്കുകൂട്ടി. മൊബൈല് ഫോണില് ദൃശ്യം പകര്ത്തുന്നവരുമുണ്ടായിരുന്നു. ഷാജുവും ഫോണില് പകര്ത്തുകയായിരുന്നു. തിക്കുംതിരക്കും വന്നപ്പോള് പോലീസുകാര് എല്ലാവരെയും തള്ളിമാറ്റി. ജോളി അപ്പോള് ഷാജുവിനടുത്തായി.
ജോളി ചുരിദാറിന്റെ ഷാള് ഇട്ട് മുഖം മറച്ചിരുന്നു. ഈ സമയം മൊബൈല് ഫോണില് പകര്ത്താന് ജോളിയുടെ മുഖത്തുനിന്ന് ഷാജു ഷാള് എടുത്തുനീക്കാന് ശ്രമിക്കുകയായിരുന്നു. ഉടന്തന്നെ പോലീസ് ഇയാളെ പിടിച്ചുമാറ്റി കസ്റ്റഡിയിലെടുത്ത് കൊയിലാണ്ടി സ്റ്റേഷനിലേക്കു കൊണ്ടുപോയി. ഇന്നലെ പുലര്ച്ചെ ഒന്നരയ്ക്കും വയറുവേദനയെത്തുടര്ന്നു ജോളിയെ ഇവിടെ കൊണ്ടുവന്നിരുന്നു.
