വട്ടിയൂര്‍ക്കാവ്: വട്ടിയൂര്‍ക്കാവ് മണ്ഡലത്തിലെ വെള്ളേക്കടവ് പാണാങ്കരയില്‍ വോട്ടുചോദിച്ചെത്തിയ യൂണിവേഴ്‌സിറ്റി കോളേജിലെ എസ്എഫ്‌ഐക്കാര്‍ വോട്ടറുടെ തലയടിച്ചുപൊട്ടിച്ചു. പാണാങ്കര മഹേഷ്ഭവനില്‍ മോഹന(61)നെയാണ് എസ്എഫ്‌ഐക്കാര്‍ ആക്രമിച്ചത്. മോഹനന്റെ തലയില്‍ എസ്എഫ്‌ഐക്കാര്‍ കരിങ്കല്‍കൊണ്ടടിച്ചു പൊട്ടിക്കുകയായിരുന്നു. മോഹനന്റ ഭാര്യ ഉഷയെയും എസ്എഫ്‌ഐ സംഘം ക്രൂരമായി മര്‍ദ്ദിച്ചു.
ഇന്നലെ ഉച്ചതിരിഞ്ഞ് മൂന്ന് മണിയോടെ എല്‍ഡിഎഫ് സ്ഥാനാര്‍ത്ഥി വി.കെ പ്രശാന്തിന് വോട്ട് തേടിയാണ് യൂണിവേഴ്‌സിറ്റി കോളേജിലെ വനിതാ എസ്എഫ്‌ഐ പ്രവര്‍ത്തകര്‍ ഉള്‍പ്പെടെ പ്രദേശത്തെത്തിയത്. മോഹനന്റെ വീട്ടിലെത്തിയ സംഘം കയ്യില്‍ കരുതിയിരുന്ന ലഘുലേഖ അദ്ദേഹത്ത് കൈമാറി വോട്ട് ചെയ്യണമെന്നഭ്യര്‍ത്ഥിച്ചു. ജനങ്ങള്‍ക്കുവേണ്ടി ഒരു രാഷ്‌ട്രീയ പാര്‍ട്ടിയും പ്രവര്‍ത്തിക്കുന്നില്ലെന്ന് മോഹനന്‍ പറഞ്ഞതോടെ സംഘത്തിലുണ്ടായിരുന്നവര്‍ ഇതിനെ എതിര്‍ത്തു. തുടര്‍ന്ന് വാക്കുതര്‍ക്കമായി.
ഈ സമയം വീടിന് പുറത്ത് നില്‍ക്കുകയായിരുന്നു എസ്എഫ്‌ഐ സംഘത്തിലെ കുറച്ചുപേര്‍ കോമ്പൗണ്ടിനുള്ളില്‍ കയറി സമീപത്ത് കിടന്നിരുന്ന കരിങ്കല്ലുകൊണ്ട് മോഹനന്റെ തലയ്‌ക്കടിക്കുകയായിരുന്നു. എതിര്‍ക്കാന്‍ ശ്രമിച്ച മോഹനന്റെ ഭാര്യ ഉഷയെയും സംഘം മര്‍ദ്ദിച്ചു. ഉഷയുടെ നിലവിളകേട്ട് ഓടിക്കൂടിയ നാട്ടുകാര്‍ പോലീസില്‍ വിവരം അറിയിച്ചു. പോലീസ് എത്തി മോഹനനെ മെഡിക്കല്‍കോളേജ് ആശുപത്രിയിലേയ്‌ക്ക് മാറ്റി. പാണാങ്കരയിലെ ഡിവൈഎഫ്‌ഐ യൂണിറ്റ് സെക്രട്ടറി കണ്ണനും യൂണിവേഴ്‌സിറ്റി കോളേജിലെ വിദ്യാര്‍ത്ഥികളോടൊപ്പം ഉണ്ടായിരുന്നതായി നാട്ടുകാര്‍ ആരോപിക്കുന്നു.
തോല്‍വി മുന്നില്‍ കണ്ടതോടെ കഴിഞ്ഞ ദിവസങ്ങളിലൊക്കെ മണ്ഡലത്തിലുടനീളം സംഘര്‍ഷമുണ്ടാക്കാനാണ് സിപിഎം ശ്രമിക്കുന്നത്. ഇതിന്റെ ഭാഗമായിട്ടാണ് ഇന്നലത്തെയും സംഘര്‍ഷമെന്നാണ് സൂചന. പരമാവധി സ്ഥലങ്ങളില്‍ സംഘര്‍മുണ്ടാക്കി വോട്ടിംഗ് ശതമാനം കുറയ്‌ക്കുക എന്നതാണ് എല്‍ഡിഎഫിന്റെ ഇപ്പോഴത്തെ തീരുമാനം. ഇതിനായി ജില്ലയുടെ പലഭാഗത്ത് നിന്നുമുള്ള സിപിഎം ഡിവൈഎഫ്‌ഐ ഗുണ്ടകളെ വട്ടിയൂര്‍ക്കാവില്‍ എത്തിച്ചിരിക്കുകയാണ് സിപിഎം ജില്ലാ നേതൃത്വം. നാളെ നടക്കുന്ന കൊട്ടിക്കലാശത്തിലും സിപിഎം സംഘര്‍മുണ്ടാക്കാനുള്ള സാധ്യത പോലീസ് തള്ളിക്കളയുന്നില്ല.
