പത്തനംതിട്ട: സര്ക്കാരിന്റെയും സിപിഎമ്മിന്റെയും പിന്തുണയോടെ ബിന്ദു അമ്മിണി വീണ്ടും ശബരിമലയിലേക്ക് എത്തുമെന്ന് റിപ്പോര്ട്ട്. ഇതിന്റെ ഭാഗമായി നാളെ ഉച്ചയ്ക്ക് ഇവര് പത്തനംതിട്ട പ്രസ്ക്ലബില് പത്രസമ്മേളനം വിളിച്ചു. തുലമാസ പൂജകള്ക്കായി നട തുറന്നിരിക്കുന്ന ഇപ്പോള് ശബരിമല ചവിട്ടുകയെന്ന ലക്ഷ്യത്തോടെയാണ് ബിന്ദു വീണ്ടുമെത്തുന്നതെന്നാണ് പുറത്തുവരുന്ന റിപ്പോര്ട്ട്. ഇത്തരം ഒരു വിവരം പുറത്തുവന്നതോടെ മുന്കാലങ്ങളെ അപേക്ഷിച്ച് ശബരിമലയിലും പമ്പയിലും പോലീസ് സുരക്ഷ ശക്തമാക്കി. 500 പോലീസുകാരെ മൂന്ന് എസ്.പിമാരുടെ കീഴിലാണ് ശബരിമല പൂങ്കാവനത്തില് വിന്യസിച്ചിരിക്കുന്നത്. ബിന്ദു അമ്മിണി പത്തനംതിട്ടയില് നാളെ രാവിലെ എത്തുമെന്നും അവര്ക്ക് വേണ്ട സുരക്ഷ നല്കുമെന്നും പോലീസ് അധികൃതര് ജന്മഭൂമിയോട് പറഞ്ഞു.
എന്നാല്, ബിന്ദു അമ്മിണിയുടെ പത്തനംതിട്ടയിലെ പരിപാടികള് വെളിപ്പെടുത്താന് പോലീസ് തയാറായിട്ടില്ല. മണിയാര് എആര് ക്യാമ്പില നിന്നുള്ള പോലീസുകാരെയും നാളെ പത്തനംതിട്ട നഗരത്തില് വിന്യസിക്കാന് തീരുമാനിച്ചിട്ടുണ്ട്. ബിന്ദു വീണ്ടും പത്തനംതിട്ടയില് വരുമെന്ന് പ്രഖ്യാപിച്ചതോടെ നിലയ്ക്കല്, പമ്പ, സന്നിധാനം എന്നിവിടങ്ങളിലാണ് എസ്പിമാര് ക്യാമ്പ് ചെയ്ത് പ്രവര്ത്തനങ്ങള് ഏകോപിപ്പിക്കുന്നത്. കഴിഞ്ഞ മണ്ഡല കാലത്ത് രാത്രിയുടെ മറവില് വേഷം കെട്ടിച്ച് ബിന്ദുവിനെയും കനകദുര്ഗയെയും മലചവിട്ടിച്ചത് കേരള പോലീസും സര്ക്കാരും ചേര്ന്നായിരുന്നു. എന്തു പ്രത്യാഘാതം ഉണ്ടായാലും ഇവര്ക്ക് സുരക്ഷ ലഭിക്കുമെന്ന ഉറപ്പിന്മേലായിരുന്നു ബിന്ദുവിന്റെയും കനകദുര്ഗയുടെയും ശബരിമല ദര്ശനം. ഇത്തവണയും പത്തനംതിട്ടയില് എത്തുന്ന ബിന്ദുവിന് സുരക്ഷ നല്കുമെന്ന് പോലീസ് വ്യക്തമാക്കി. ബിന്ദു ശബരിമലയുടെ പവിത്രത തകര്ക്കാന് വീണ്ടും ശ്രമിക്കുകയാണെങ്കില് ശക്തമായി തടയുമെന്ന് വിശ്വാസികള് അറിയിച്ചു.
