തിരുവനന്തപുരം: ഭൗതിക വാദം പറഞ്ഞുനടന്ന സിപിഎം ഇപ്പോള് അമ്പലത്തെയും വിശ്വാസത്തെക്കുറിച്ചും പറയുന്നുവെന്ന് മുന് മിസോറാം ഗവര്ണ്ണര് കുമ്മനം രാജശേഖരന്. അതാണ് അരൂരില് മഞ്ഞക്കൊടി പിടിച്ചതിലൂടെ കണ്ടത്. ഉടന് തന്നെ സിപിഎം കാവിക്കൊടി പിടിക്കുമെന്നും കുമ്മനം പറഞ്ഞു. കേന്ദ്ര സര്ക്കാര് നല്കിയ കോടികള് കേരളം വക മാറ്റി ചിലവഴിക്കുകയാണ്. തൊഴിലുറപ്പ് പദ്ധതിക്കായി കേന്ദ്രം നല്കിയ പണം കേരളം പാഴാക്കി. ഇതുസംബന്ധിച്ച് കേരളം കേന്ദ്രത്തിന് റിപ്പോര്ട്ട് നല്കുകയോ സോഷ്യല് ഓഡിറ്റ് നടത്തുകയോ ചെയ്തിട്ടില്ല. കേന്ദ്രം നല്കിയ പണം കേരള സര്ക്കാര് എന്ത് ചെയ്തെന്നും കുമ്മനം ചോദിച്ചു.
വികസനവും വിശ്വാസ സംരക്ഷണവുമാണ് ഈ തെരഞ്ഞെടുപ്പ് ചര്ച്ച ചെയ്യുന്നത്. വിശ്വാസ സംരക്ഷകരെങ്കില് എന്താണ് സിപിഎം എംഎല്എമാര് ഈശ്വര നാമത്തില് പ്രതിജ്ഞ ചെയ്യാത്തത്. ശബരിമല വിഷയത്തില് യുഡിഫ് കാഴ്ചക്കാര് മാത്രമാണ്. ശബരിമലയില് ഇപ്പോള് നട തുറക്കുമ്പോള് നിരോധനാജ്ഞ പ്രഖ്യാപിക്കാത്തതെന്തെന്ന് സര്ക്കാര് പറയണം. ശബരിമലയില് ഇപ്പോഴും മുമ്പത്തെ സാഹചര്യം തന്നെയാണുള്ളത്. തെരഞ്ഞെടുപ്പിലടക്കം വിശ്വാസ സംരക്ഷണം പ്രകടന പത്രികയില് ഉള്പ്പെടുത്തിയത് ബിജെപി മാത്രമാണ്.
ശബരിമല മുന് നിര്ത്തി എല്ഡിഎഫ് വോട്ട് തേടുന്നത് ബാലിശമാണ്. ദേവസ്വം ബോര്ഡിനെ കടക്കെണിയെലെത്തിച്ചത് ഇടത് സര്ക്കാരാണ്. എന്എസ്എസ് യുഡിഎഫിനുവേണ്ടി വോട്ട് ചോദിക്കുമെന്ന് കരുതുന്നില്ല. മത സമുദായ വികാരം ഇളക്കി വോട്ട് ചോദിക്കരുത്. ശബരിമല വിഷയം മനുഷ്യാവകാശ പ്രശ്നമാണെന്നും കുമ്മനം പറഞ്ഞു.
