ഹരിയാന: പാകിസ്ഥാനിലേക്ക് ഒഴുകുന്ന നദീജലം ഉടന് തന്നെ ഹരിയാന, രാജസ്ഥാന് സംസ്ഥാനങ്ങളിലെ കാര്ഷിക മേഖലകളിലേക്ക് തിരിച്ചുവിടുമെന്ന് പ്രധാനമന്ത്രി നരേന്ദ്ര മോദി. ഇതിനായി മുഖ്യമന്ത്രി മനോഹര് ലാല് ഖട്ടറിന്റെ നേതൃത്വത്തില് ബിജെപി പോരാടും. ഹരിയാനയിലെ ചാര്ക്കി ദാദ്രിയില് ബിജെപിയുടെ പ്രചാരണ റാലിയെ അഭിസംബോധന ചെയ്തു സംസാരിക്കുകയായിരുന്നു അദ്ദേഹം.
70 വര്ഷമായി ഹരിയാനയിലെ കര്ഷകര്ക്കും ജനങ്ങള്ക്കും അവകാശപ്പെട്ട ജലം പാക്കിസ്ഥാനിലേക്ക് ഒഴുക്കുന്നു. എന്നാല്, ഇനി അതുണ്ടാകില്ല, ആ നദീജലം ഇന്നാനാട്ടിലെ കര്ഷകര്ക്ക് ലഭിക്കുമെന്ന് നരേന്ദ്ര മോദി വ്യക്തമാക്കി. സിന്ധു നദീജല ഉടമ്പടി പ്രകാരമാണ് ഇന്ത്യ പാകിസ്ഥാനുമായി വെള്ളം പങ്കിടുന്നത്. പതിറ്റാണ്ടുകളായി നിലനില്ക്കുന്ന കരാര് സര്ക്കാര് പുഃനപരിശോധിക്കുമെന്നും അദേഹം വ്യക്തമാക്കി.
സര്ക്കാര് ജോലികളിലെ അഴിമതി തടയുന്നതില് ഹരിയാനയിലെ ബിജെപി സര്ക്കാര് വിജയിച്ചു. ഇപ്പോള് യോഗ്യത ഉള്ളവര്ക്ക് മാത്രമാണ് ജോലി ലഭിക്കുക. ഉദ്യോഗസ്ഥരുടെ ബന്ധുജനങ്ങള്ക്ക് സര്ക്കാര് ജോലി നല്കുന്ന പാരമ്പര്യവും ബിജെപി സര്ക്കാര് അവസാനിപ്പിച്ചുവെന്ന് മോദി പറഞ്ഞു. ആര്ട്ടിക്കിള് 370 സംബന്ധിച്ച നിലപാട് കോണ്ഗ്രസ് നേതാക്കള് വ്യക്തമാക്കണം. മുതലകണ്ണീരൊഴുക്കി ജനങ്ങളെ കബളിപ്പിക്കാനാക്കില്ലെന്നും മോദി പറഞ്ഞു. കോണ്ഗ്രസ് നേതാകള് എനിക്കെതിരെ കുപ്രചാരണങ്ങള് നടത്തുന്നുണ്ട്. അവര്ക്ക് അതു തുടരാം, പക്ഷേ പൊതുജനത്തെ പുറകില് നിന്നു കുത്തുന്ന നയം സ്വീകരിക്കരുതെന്നും നരേന്ദ്ര മോദി വ്യക്തമാക്കി.
