ചാവക്കാട്: ആര്എസ്എസ് പ്രവര്ത്തകനായിരുന്ന കുന്നംകുളം തൊഴിയൂര് സുനില് വധക്കേസില് രണ്ട് പേര് കൂടി പിടിയില്. കൊളുത്തൂര് സ്വദേശി ഉസ്മാന്, അഞ്ചങ്ങാടി സ്വദേശി യൂസഫലി എന്നിവരാണ് പിടിയിലായത്.
1994 ഡിസംബറിലാണ് സുനില് കൊല്ലപ്പെട്ടത്. അതിനുശേഷം പ്രതികള് ഒളിവില് പോവുകയായിരുന്നു. വിദേശത്തു നിന്നെത്തിയ യൂസഫലി നെടുമ്പാശ്ശേരി വിമാനത്താവളത്തില് നിന്നാണ് പിടിയിലായത്. നേരത്തെ കേസുമായി ചാവക്കാട് സ്വദേശി മൊയ്നുദ്ദീന് 25 വര്ഷങ്ങള്ക്ക് ശേഷം അറസ്റ്റിലായത്.
കേസില് ഇനി അഞ്ച് പേരെയാണ് കൂടി ക്രൈംബ്രാഞ്ചിന് പിടികൂടാനുണ്ട്. ഇവര്ക്ക് വേണ്ടിയുള്ള അന്വേഷണം ഊര്ജ്ജിതമാക്കിയിരിക്കുകയാണ്. ടി.പി. സെന്കുമാറിന്റെ നേതൃത്വത്തിലുള്ള ഭീകരവിരുദ്ധ സ്ക്വാഡ് 2011ല് നടത്തിയ അന്വേഷണത്തില് ഭീകരവാദ സംഘടനകള് നടത്തിയ ആക്രമണമാണ് സുനിലിന് നേരെ ഉണ്ടായതെന്ന് കണ്ടെത്തിയിരുന്നു.
ഈ വിവരങ്ങള് ബോധ്യമായതോടെ ഹൈക്കോടതി ശിക്ഷ അനുഭവിച്ചു കൊണ്ടിരുന്ന പ്രതികളെ വെറുതെ വിടുകയും കേസില് പുനരന്വേഷണം വേണമെന്നും കോടതി ആവശ്യപ്പെട്ടു. തുടര്ന്ന് 2017ല് തൃശൂര് ക്രൈം ബ്രാഞ്ച് സുനില് വധക്കേസ് വീണ്ടും അന്വേഷിക്കുകയായിരുന്നു. ഇന്ന് പിടിയിലായ രണ്ട് പേരും പെരുമ്പടപ്പിലാണുള്ളത്. രണ്ട് പേരെയും ഉച്ചയോടെ തൃശ്ശൂരിലേക്ക് കൊണ്ടുവരും. വിശദമായ ചോദ്യം ചെയ്യലിന് ശേഷം ഉടന് തന്നെ അറസ്റ്റ് രേഖപ്പെടുത്തും.
1994 ഡിസംബര് നാലിന് പുലര്ച്ചെ രണ്ട് മണിയോടെയാണ് തൊഴിയൂര് സുനില് എന്ന ആര്എസ്എസ് പ്രവര്ത്തകനെ വെട്ടിക്കൊല്ലുന്നത്. ലോക്കല് പോലീസ് കേസന്വേഷിച്ചപ്പോള്, സിപിഎം പ്രവര്ത്തകരായ മൂന്ന് പേരെയാണ് അറസ്റ്റ് ചെയ്തത്. കേസിലാദ്യം ലോക്കല് പോലീസ് ഒമ്പത് പേരെ പ്രതികളാക്കി കേസെടുത്തു. ഇതില് നാല് പേരെ, 1997 മാര്ച്ചില് ജീവപര്യന്തം തടവ് ശിക്ഷയ്ക്ക് വിധിച്ചു. മുതുവട്ടൂര് സ്വദേശികളായ വി.ജി ബിജി, രായംമരയ്ക്കാര് വീട്ടില് റഫീഖ്, തൈക്കാട് ബാബുരാജ്, ഹരിദാസന് എന്നിവര് ജയിലിലായി. എന്നാല് 2012-ല് ഈ ശിക്ഷ റദ്ദാക്കി പുനരന്വേഷണത്തിന് ഉത്തരവിട്ടത് ഹൈക്കോടതിയാണ്.
