കൊച്ചി: ഉപതെരഞ്ഞെടുപ്പ് നടക്കുന്ന സംസ്ഥാനത്തെ അഞ്ച് നിയമസഭാ മണ്ഡലങ്ങളിലും ബിജെപിക്ക് അനുകൂലമായ സാഹചര്യമാണെന്ന് സുരേഷ് ഗോപി എംപി. എറണാകുളത്തെ ബിജെപി സ്ഥാനാര്ഥി സി.ജി. രാജഗോപാലിന്റെ തെരഞ്ഞെടുപ്പ് പ്രചാരണത്തില് പങ്കെടുത്ത് സംസാരിക്കുകയായിരുന്നു അദ്ദേഹം.
ബിജെപി ഭരണത്തില്, രാജ്യമെങ്ങും വികസനക്കുതിപ്പാണ്. കേന്ദ്ര സര്ക്കാര് സര്വമേഖലകളിലും വിവിധ തരത്തിലുള്ള പദ്ധതികള് നടപ്പാക്കുന്നു. ജനങ്ങള് മോദി സര്ക്കാരിനൊപ്പമാണ്. രാജ്യത്തെ അഴിമതി മുക്തമാക്കി വികസനക്കുതിപ്പിലേക്ക് നരേന്ദ്ര മോദി നയിച്ചു. ശബരിമല യുവതീ പ്രവേശന വിഷയത്തില് സംസ്ഥാന സര്ക്കാരും പ്രതിപക്ഷവും കേന്ദ്ര സര്ക്കാരിനെ കുറ്റപ്പെടുത്തുകയാണെന്നും സുരേഷ് ഗോപി പറഞ്ഞു. ഒന്നര വര്ഷത്തേക്കുള്ള ഈ തെരഞ്ഞെടുപ്പില് പരീക്ഷണമെന്ന നിലയിലെങ്കിലും ജനങ്ങള് ബിജെപി സ്ഥാനാര്ഥികളെ വിജയിപ്പിക്കണമെന്നും അദ്ദേഹം അഭ്യര്ഥിച്ചു.
അവഗണനയുടെ ദുരിതം പേറി ജീവിക്കുന്ന നഗരത്തിലെ മച്ചോട് നികത്തില് കോളനിയിലാണ് രാജഗോപാലിനൊപ്പം വോട്ട് അഭ്യര്ത്ഥിക്കാന് സുരേഷ്ഗോപി ആദ്യമെത്തിയത്. പിന്നീട് തേവര കോളേജിലും തുടര്ന്ന് എളമക്കരയില് സംഘടിപ്പിച്ച കുടുംബസംഗമത്തിലും പങ്കെടുത്തു.
ചേരാനെല്ലൂരില് നിന്ന് കച്ചേരിപ്പടിയിലേക്ക് നടത്തിയ റോഡ് ഷോയിലും സുരേഷ് ഗോപി രാജഗോപാലിനൊപ്പം പങ്കെടുത്തു. ബിജെപി ജില്ലാ പ്രസിഡന്റ് വി.എന്. വിജയന്, എന്ഡിഎ നേതാക്കളായ പി.സി. തോമസ്, അഹമ്മദ് തോട്ടത്തില്, ബിജെപി നേതാക്കളായ എം.എന്. മധു, കെ.എസ്. ഷൈജു, പത്മജ എസ്. മേനോന് എന്നിവരും ഒപ്പമുണ്ടായിരുന്നു.
