ന്യുദല്ഹി: പ്രധാനമന്ത്രി നരേന്ദ്ര മോദി അധികാരത്തില് വന്നതോടെ ഇന്ത്യയുടെ പ്രതിച്ഛായ മാറിക്കൊണ്ടിരിക്കുകയാണെന്ന് പ്രശസ്ത ഗായിക ലതാ മങ്കേഷ്കര്. തനിക്ക് നവതിയാശംസകള് നേരാന് ഫോണില് വിളിച്ച നരേന്ദ്ര മോദിയോടു സംസാരിക്കുകയായിരുന്നു ലതാ മങ്കേഷ്കര്. പ്രധാനമന്ത്രിയുടെ യുഎസ് പര്യടണത്തിനു മുമ്പാണ് ഫോണ് സംഭാഷണം നടത്തിയത്.
മോദിജിയുടെ ഫോണ് വരും എന്നു കേട്ടപ്പോഴേ വളരെ സന്തോഷം തോന്നിയെന്ന് മങ്കേഷ്കര് പറഞ്ഞു. പ്രായം കൊണ്ട് താന് മുതിര്ന്നതാണെങ്ങിലും ചിലര് തങ്ങളുടെ പ്രവര്ത്തികള്കൊണ്ട് മുതിര്ന്നവരാകുന്നു. അങ്ങനെയുള്ളവരുടെ ആശീര്വ്വാദം കിട്ടുകയെന്നത് വലിയ കാര്യമാണെന്നും ലതാ മങ്കേഷ്കര് വ്യക്തമാക്കി. (‘ആപ്കെ ആനെ സേ ഭാരത് കാ ചിത്ര ബാദല് റാഹ ഹായ്… മുജെ ബഹുത് ഖുഷി ഹോതി ഹായ് …’) താങ്ങള് കാരണം ഇന്ത്യയുടെ പ്രതിച്ഛായ മാറുകയാണെന്നും ഇത് എനിക്ക് വളരെയധികം സന്തോഷം നല്കുന്നുവെന്നും മങ്കേഷ്കര് സംഭാഷണത്തില് പറഞ്ഞു.
ഇന്നെനിക്കൊപ്പം ഒരു പ്രത്യേക അതിഥിയുണ്ടാകുമെന്ന് പ്രധാനമന്ത്രിയുടെ പ്രതിമാസ റേഡിയോ പരിപാടിയുടെ മുന്നോടിയായി അദ്ദേഹം ട്വീറ്റ് ചെയ്തിരുന്നു. ഇന്നത്തെ മന് കീ ബാത്- ല് രാജ്യത്തെ ഒരു മഹനീയയായ വ്യക്തിയെക്കുറിച്ച് സംസാരിച്ചു തുടങ്ങാം. നാം ഭാരതീയരുടെയെല്ലാം മനസ്സില് ആ വ്യക്തിത്വത്തോട് വളരെ ആദരവുണ്ട്, മമതയുണ്ട്. രാജ്യത്തിന്റെ ഓരോരോ ചുവടുവയ്പ്പിനും ഓരോരോ കാലഘട്ടത്തിനും അവര് സാക്ഷിയാണ്. നാം ആ മഹതിയെ ദീദി എന്നു പറയുന്നു, ലതാ ദീദി. ഈ സെപ്റ്റംബര് 28 ന് ലതാ ദീദിക്ക് 90 വയസ്സാവുകയാണെന്ന് പറഞ്ഞാണ് പ്രധാനമന്ത്രി പരിപാടി ആരംഭിച്ചത്.
ഇതുപോലുള്ള വ്യക്തിപരമായ സംഭാഷണങ്ങളെക്കുറിച്ച് സാധാരണയായി പോതുവേദികളി സംസാരിക്കാറില്ല, പക്ഷേ ഇന്ന് നിങ്ങളും ലതാദീദിയുടെ വാക്കുകള് കേള്ക്കണമെന്ന് താന് ആഗ്രഹിക്കുന്നുവെന്നും മോദി പറഞ്ഞു. പ്രായത്തിന്റെ ഈ അവസ്ഥയിലും ലതാദീദി രാജ്യവുമായി ബന്ധപ്പെട്ട എല്ലാ കാര്യങ്ങളിലും എത്രത്തോളം ആകാംക്ഷയും, താത്പര്യവും വച്ചു പുലര്ത്തുന്നുവെന്ന് ഒരോര്ത്തരും മനസിലാക്കണമെന്നും അദ്ദേഹം പറഞ്ഞു.
മംഗേഷ്കറുമായി ഗുജറാത്തി ബന്ധത്തെക്കുറിച്ച് പ്രധാനമന്ത്രി മോദിയും സംഭാഷണം നടത്തി. അമ്മ ഗുജറാത്തിയായിരുന്നു എന്ന് ലതാജി അഭിമാനത്തോടെ പറയുമ്പോള് എനിക്കു സന്തോഷമുണ്ടെന്ന് മോദി പറഞ്ഞു. ലതാജിയുടെ അടുത്തു വന്നപ്പോഴൊക്കെ എനിക്ക് ഗുജറാത്തി ഭക്ഷണം എന്തെങ്കിലും കഴിക്കാന് തന്നിട്ടുണ്ട്. ഓര്മകള് പങ്കുവച്ചു ഇരുവരു സംസാരിച്ചു. ലതാ മങ്കേഷ്കറിന്റെ മറുപടിയിലെ വിനയത്തെയും അദ്ദേഹം പ്രകീര്ത്തിച്ചു. അവിടുത്തെ ഈ വിനയം പുതിയ തലമുറയ്ക്ക് വലിയ പാഠമാണ്. ദീദി ജീവിതത്തില് ഇത്രയെല്ലാം നേടിയിട്ടും അവിടത്തെ മാതാപിതാക്കളുടെ സംസ്കാരത്തിനും അവരോടുള്ള വിനയത്തിനും എന്നും പ്രാമുഖ്യം നല്കിയിട്ടുണ്ടെന്നത് എല്ലാവര്ക്കും പ്രചോദനമാണെന്നും മോദി വ്യക്തമാക്കി.
പ്രധാനമന്ത്രി മോദിയുടെ അമേരിക്കന് സന്ദര്ശനത്തിന്റെ പ്രത്യേകത ഞായറാഴ്ച ഹ്യൂസ്റ്റണില് നടന്ന ‘ഹൗഡി മോഡി’ പരിപാടി ആയിരുന്നു. വ്യാപാരം, വികസനം, ഭീകരവിരുദ്ധ പ്രവര്ത്തനങ്ങള് എന്നിവയുമായി ബന്ധപ്പെട്ട് പ്രവര്ത്തിക്കാന് അദ്ദേഹവും യുഎസ് പ്രസിഡന്റ് ഡൊണാള്ഡ് ട്രംപും തീരുമാനിച്ചു. കാലാവസ്ഥാ വ്യതിയാനം, വികസനം, ഭീകരവാദം തുടങ്ങി നിരവധി വിഷയങ്ങളില് യുഎന്ജിഎയില് വെള്ളിയാഴ്ച പ്രധാനമന്ത്രി മോദി 17 മിനിറ്റ് പ്രസംഗിച്ചു.
ലോകനേതാക്കളായാലും, വ്യവസായികളായാലും, ജീവിതത്തിന്റെ നാനാതുറകളിലുള്ള പൗരന്മാരായാലും അവര്ക്കെല്ലാം ഇന്ന് ഇന്ത്യയില് വലിയ പ്രതീക്ഷയുണ്ടെന്ന് മോദി ട്വിറ്റില് കുറിച്ചു. ഡൊണാള്ഡ് ട്രംപ് മുതല് ഇന്ത്യയിലെ ജനങ്ങള് വരെ എല്ലാവരോടും നന്ദി അറിയിച്ചുകൊണ്ട് ട്വീറ്റുകളിലൂടെ പ്രധാനമന്ത്രി ഒരാഴ്ച നീണ്ടുനിന്ന അമേരിക്കന് സന്ദര്ശനം അവസാനിപ്പിച്ചു.
