ഇന്ത്യാക്കാരുടെ മനസില്‍ മോദി കഴിഞ്ഞാല്‍ ധോണി; സച്ചിന്റേയും കോലിയുടേയും സ്ഥാനം ഇങ്ങനെ

ന്യൂദല്‍ഹി: ഇന്ത്യാക്കാരുടെ മനസില്‍ പ്രധാന മന്ത്രി നരേന്ദ്ര മോദി കഴിഞ്ഞാല്‍ മുന്‍ ക്രിക്കറ്റ് ക്യാപ്റ്റന്‍ എം എസ് ധോണി. യുഗോവ് എന്ന ഇന്റര്‍നെറ്റ് മാര്‍ക്കറ്റിങ് റിസര്‍ച്ച് കമ്പനി വിവിധ രാജ്യങ്ങളില്‍ നിന്നുള്ള 42,000 പേരെ ഉള്‍പ്പെടുത്തി നടത്തിയ സര്‍വെയിലാണ് ധോണി അസൂയാവഹമായ ഈ നേട്ടം കൈവരിച്ചത്. പട്ടികയിൽ രണ്ടാം സ്ഥാനത്താണ് ധോണി. വനിതകളില്‍ ബോക്സിങ് താരം മേരി കോം ആണ് ഒന്നാമത്.

8.58 ശതമാനം വോട്ട് നേടിയാണ് ധോണി രണ്ടാമതെത്തിയത്. ഏറ്റവും കൂടുതല്‍ ആരാധിക്കപ്പെടുന്ന കായികതാരവും ധോണി തന്നെയാണ്. പ്രധാന മന്ത്രി നരേന്ദ്ര മോദിക്ക് 15.66 ശതമാനം വോട്ടുണ്ട്. ഇന്ത്യയില്‍ നിന്ന് ക്രിക്കറ്റ് ഇതിഹാസം സച്ചിന്‍ തെണ്ടുല്‍ക്കര്‍ (5.81%) ഏഴാം സ്ഥാനത്തും നിലവിലെ ഇന്ത്യന്‍ ക്രിക്കറ്റ് ക്യാപ്റ്റന്‍ വിരാട് കോലി (4.46%) എട്ടാം സ്ഥാനത്തുമാണ്. 

പ്രമുഖ വ്യവസായി രത്തന്‍ ടാറ്റ(8.02%)യാണ് ധോണിക്കു പിന്നില്‍. അമിതാഭ് ബച്ചന്‍ (6.55%) നാലാം സ്ഥാനത്തുണ്ട്. ലോകത്തിലെ പ്രമുഖരെ എടുത്താല്‍ ബരാക് ഒബാമ (7.36%), ബില്‍ ഗേറ്റ്സ് (6.96%) എന്നിവരെല്ലാം ധോണിക്ക് പിന്നിലാണ്. പട്ടികയിൽ പോര്‍ച്ചുഗീസ് ഫുട്ബോള്‍ താരം ക്രിസ്റ്റിയാനോ റൊണാള്‍ഡോ (2.95%) 13ാം സ്ഥാനത്തും അര്‍ജന്റീനയുടെ ലിയോണല്‍ മെസി (2.32%) പതിനാറാം സ്ഥാനത്തുമാണ്.