യുണൈറ്റഡ് നേഷന്സ്: യുഎന് കാലാവസ്ഥ ഉച്ചകോടിയില് ലോകനേതാക്കളോട് രോഷാകുലയായി 16വയസുകാരി ഗ്രേറ്റ തുന്ബര്ഗ്. ആഗോളതാപനത്തിനിടയാക്കുന്ന ഹരിതഗൃഹ വാതകങ്ങളുടെ ബഹിര്ഗമനത്തെ നിയന്ത്രിക്കുന്നതില് പരാജയപ്പെട്ട നിങ്ങള് എന്റെ തലമുറയെ വഞ്ചിക്കുകയാണെന്ന് ഉച്ചകോടിയില് പങ്കെടുത്ത ലോക നേതാക്കളോട് ഗ്രേറ്റ പറഞ്ഞു. സമ്പത്തിക വളര്ച്ചയെ കുറിച്ചുള്ള കെട്ടുകഥകള് പറയാന് നിങ്ങള്ക്കെങ്ങനെ ധൈര്യം വരുന്നുവെന്നും ഗ്രേറ്റ ചോദിക്കുന്നു.
കാലാവസ്ഥാ പ്രതിസന്ധിക്കെതിരായി നടപടികള് സ്വീകരിക്കണമെന്നാവശ്യപ്പെട്ട് ലോകമെമ്പാടുമുള്ള യുവതയുടെ പ്രക്ഷോഭത്തിന്റെ മുഖമായി മാറിയിരിക്കുകയാണ് ഗ്രേറ്റ തുന്ബര്ഗ് എന്ന സ്വീഡിഷ് പെണ്കുട്ടി. ഗ്രേറ്റയുടെ നേതൃത്വത്തില് നടന്ന കാലാവസ്ഥാ സമരത്തില് 139 രാജ്യങ്ങളില്നിന്നുള്ള വിദ്യാര്ഥികളാണ് പങ്കെടുത്തത്. എല്ലാ വെള്ളിയാഴ്ചകളിലും സ്കൂളില് നിന്ന് അവധി എടുത്ത് സ്വീഡിഷ് പാര്ലമെന്റിന് മുന്നില് പരിസ്ഥിതിക്കായി സമരം ഇരുന്നാണ് ഗ്രേറ്റയെ ലോകം ശ്രദ്ധിച്ചത്. പരിസ്ഥിതി സംരക്ഷിക്കുന്നതിന്റെ ആവശ്യകതയെ കുറിച്ച് അവബോധം സൃഷ്ടിക്കാന് ഒരു വര്ഷം സ്കൂളില് നിന്നും അവധി എടുത്തിരിക്കുകയാണ് ഗ്രേറ്റ തുന്ബര്ഗ്.
കാലാവസ്ഥയ്ക്കും പരിസ്ഥിതിക്കും വേണ്ടി രാജ്യാന്തര തലത്തില് അടിയന്തിര ഇടപെടല് വേണമെന്നാണ് ഗ്രേറ്റ ആവശ്യപ്പെടുന്നത്. വിവിധ രാജ്യങ്ങളിലായി നാലായിരത്തിലധികം പരിപാടികള് സമരത്തിന്റെ ഭാഗമായി നടന്നു കഴിഞ്ഞു. ഇക്കാര്യത്തില് അടിയന്തിര നടപടികള് കൈക്കൊള്ളാന് രാഷ്ട്രീയ പാര്ട്ടികള്ക്ക് മേല് സമ്മര്ദംചെലുത്തുകയായിരുന്നു പ്രതിഷേധത്തിന്റെ ലക്ഷ്യം.
