കൊച്ചി: കേരളത്തിലെ പള്ളികളിലെ യാക്കോബായ- ഓര്ത്തഡോക്സ് തര്ക്കത്തിന് അറുതിയില്ല. സംസ്കാര ചടങ്ങിനെ ചൊല്ലി തര്ക്കം രൂക്ഷമായതോടെ മനംമടുത്ത് വൃദ്ധയുടെ മൃതദേഹം ആയുര്വേദ മെഡിക്കല് കോളേജിന് ദാനം നല്കാന് തീരുമാനിച്ചു ബന്ധുക്കള്. കൊച്ചി സെന്റ് ജോണ്സ് മലങ്കര പള്ളിയിലാണ് ദൗര്ഭാഗ്യകരമായ സംഭവം അരങ്ങേറിയത്. 86 കാരിയായ കൊച്ചി സ്വദേശിയ സാറ വര്ക്കിയുടെ ശവസംസ്കാര ചടങ്ങിനിടെയാണു ഓര്ത്തഡോക്സ്- യാക്കോബായ തര്ക്കം ഉടലെടുത്തത്.
ഹൈക്കോടതി വിധി പ്രകാരം ഈ പള്ളിയില് ഇരു വിഭാഗങ്ങള്ക്കും ചടങ്ങുകള് നടത്താനും പ്രാര്ഥിക്കാനും തുല്യ അവകാശമാണ് ഉണ്ടായിരുന്നത്. യാക്കോബായ വിശ്വാസ പ്രകാരം സംസ്കാരചടങ്ങുകള്ക്ക് യാക്കോബായ പുരോഹിതന് എത്തിയതോടെയാണു തര്ക്കമുണ്ടായത്.ഓര്ത്തഡോക്സ് വിഭാഗത്തിലെ പുരോഹിതരും വിശ്വാസികളും സാറയുടെ ബന്ധുക്കളുമായി തര്ക്കമുണ്ടാവുകയായിരുന്നു. യാക്കോബായ പുരോഹിതനെ പള്ളിയില് ചടങ്ങുകള് നടത്താന് അനുവദിക്കില്ലെന്നായിരുന്നു ഇവരുടെ നിലപാട്. ഹൈക്കോടതി വിധി അടക്കം ബന്ധുക്കള് ഉന്നയിച്ചെങ്കിലും മറുവിഭാഗം ഇതു കേള്ക്കാന് കൂട്ടാക്കിയില്ല. സംസ്കാരം നടത്തുന്നതിന് എതിരല്ലെന്നും എന്നാല് അതു യാക്കോബായ പുരോഹിതന് നടത്താന് അനുവദിക്കില്ലെന്നുമായിരുന്നു ഓര്ത്തഡോക്സ് പുരോഹിതരുടെ നിലപാട്. തര്ക്കം രൂക്ഷമായതോടെ സാറയുടെ മൃതദേഹം കൊച്ചിയിലെ ആയുര്വേദ മെഡിക്കല് കോളേജിനു ദാനം ചെയ്യാന് ബന്ധുക്കള് തീരുമാനിക്കുകയായിരുന്നു.
