അടിമാലി: പ്രളയത്തെ തുടര്ന്ന് ഉണ്ടായ മണ്ണിടിച്ചിലിലും മലവെള്ളപ്പാച്ചിലിലും പൂര്ണ്ണമായി തകര്ന്ന് റോഡ് ഗതാഗതം പുനസ്ഥാപിക്കാന് കഴിയാത്തതിനാല് ഇപ്പോഴും ദുരിതത്തിലാണ് മാങ്കുളം ആറാം മൈല്, അമ്പതാം മൈല് മേഖലയിലെ രണ്ടായിരത്തോളം വരുന്ന കുടുംബങ്ങളും രണ്ട് വനവാസി കുടികളും. റോഡ് ഗതാഗതം പുനഃസ്ഥാപിക്കുന്നത് കോടികള് ചിലവഴിക്കുന്നതിനൊപ്പം മാസങ്ങളും വേണ്ടിവവരും.
ഇത്തവണത്തെ പ്രളയക്കെടുതില് ഏറ്റവും കൂടുതല് നാശ നഷ്ടം നേരിട്ടത് മാങ്കുളം ഗ്രാമ പഞ്ചായത്തിലാണ്. ഇതില് ഏറ്റവും വലിയ പ്രതിസന്ധിയായി നില്ക്കുന്നത് മാങ്കുളത്തെ റോഡ് ഗതാഗതം പുനസ്ഥാപിക്കാന് കഴിഞ്ഞിട്ടില്ല എന്നതും. നല്ലതണ്ണിയാര് കരകവിഞ്ഞതോടെ ആനക്കുളം റോഡില് നിന്നും ആറാംമൈല്, അമ്പതാംമൈല് മേഖലയിലേയ്ക്കുള്ള റോഡ് അരകിലോമീറ്ററോളം പൂര്ണ്ണമായി ഒലിച്ചുപോയി. ഇതോടെ ഈ മേഖലയിലെ രണ്ടായിരത്തോളം വരുന്ന കുടുംബങ്ങളും സിങ്കുകുടി, പാറക്കുടി, കള്ളക്കുട്ടികുടി തുടങ്ങിയ വനവാസി മേഖലകളും ഒറ്റപ്പെട്ടു.
ഇതോടൊപ്പം തന്നെ റോഡിന്റെ നിരവധി ഇടങ്ങളില് മണ്ണിടിച്ചിലില് പൂര്ണ്ണമായി തകരുക കൂടി ചെയ്തതോടെ റോഡ് ഗതാഗതം പൂര്ണ്ണമായി നിലച്ചു. വാഹനം പുറത്തേയ്ക്ക് എത്തിയ്ക്കാന് കഴിയാത്തതിനാല് ടാക്സി തൊഴിലാളികളും ഉപജീവന മാര്ഗം വഴിമുട്ടി പട്ടിണിയുടെ നടുവിലാണ്. ശക്തമായ മഴവെള്ളപ്പാച്ചിലില് കവിതക്കാട് മേഖലയിലുള്ള നൂറ് കണക്കിന് കുടുംബങ്ങള്ക്ക് ആശ്രയമായ പാലം നല്ലതണ്ണിയാറിന്റെ കുത്തൊഴുക്കില് ഒലിച്ച് പോയതോടെ സ്കൂള് കുട്ടികളുടെ അടക്കം പഠനം മുടങ്ങുന്ന അവസ്ഥയിലാണുള്ളത്.
നിലവില് മേഖലയിലെ ആളുകള്ക്ക് പുറംലോകവുമായി ബന്ധപ്പെടുന്നതിന് താല്ക്കാലികമായി നാട്ടുകാര് ചേര്ന്ന് മണ്റോഡ് വെട്ടിയുണ്ടാക്കിയെങ്കിലും ഇതുവഴിയുള്ള യാത്രയും ദുഷ്കരമാണ്. ഫോര്വീല് ജീപ്പുകള് മാത്രമാണ് ഇതുവഴി കടന്നുപോകുക. സര്ക്കാര് സംവിധാനങ്ങള് മാങ്കുളത്തിന്റെ പുനരധിവാസ പ്രവര്ത്തനങ്ങള് വേഗത്തിലാക്കണമെന്നതാണ് നാട്ടുകാരുടെ ആവശ്യം.
