തിരുവനന്തപുരം : മാധ്യമപ്രവര്ത്തകന്റെ മരണത്തിനിടയാക്കിയ വാഹനാപകടം നടക്കുമ്പോള് കാറോടിച്ചിരുന്നത് സര്വ്വേ ഡയറക്ടര് ശ്രീറാം വെങ്കിട്ടരാമന് തന്നെയെന്ന് സ്ഥിരീകരണം. ശ്രീറാമാണ് കാറോടിച്ചിരുന്നതെന്ന് ഒപ്പമുണ്ടായിരുന്ന സുഹൃത്ത് വഫ ഫീറോസ് പോലീസിന് മൊഴി നല്കിയിട്ടുണ്ട്.
കവടിയാര് വരെ താനാണ് വാഹനം ഓടിച്ചതെന്നും പിന്നീട് ശ്രീറാമാണ് ഓടിച്ചതെന്നുമാണ് യുവതി മൊഴി നല്കിയിരിക്കുന്നത്. ശ്രീറാമിനെതിരെ മനപൂര്വ്വമല്ലാത്ത നരഹത്യക്ക് പോലീസ് ആരേയും പ്രതിചേര്ക്കാതെ കേസെടുത്തിട്ടുണ്ട്. അറസ്റ്റ് ഉടന് ഉണ്ടായേക്കുമെന്ന് സൂചന.
അപകടം നടന്ന ശേഷം കാറിന്റെ ഡ്രൈവിങ് സീറ്റില് നിന്നും പുറത്തിറങ്ങിയത് ഒരു പുരുഷനാണെന്ന് സംഭവസ്ഥലത്ത് ആദ്യമെത്തിയ ഓട്ടോ ഡ്രൈവര്മാരും വെളിപ്പെടുത്തിയിട്ടുണ്ട്. ശ്രീറാമാണ് വാഹനം ഓടിച്ചതെന്ന് പോലീസുദ്യോഗസ്ഥരും ഇപ്പോള് സ്ഥിരീകരിക്കുന്നുണ്ട്. ശ്രീറാമിനെ കേസില് പ്രതി ചേര്ക്കുമെന്നും അദ്ദേഹത്തെ തിരുവനന്തപുരം ഡിസിപി നേരിട്ട് ചോദ്യം ചെയ്യുമെന്നും പോലീസ് വൃത്തങ്ങള് അറിയിച്ചു.
ശ്രീറാമിന്റെ രക്തസാംപിളുകള് ശേഖരിക്കാനുള്ള നടപടികളും ഉടന് തുടങ്ങുമെന്ന് ഉന്നത പോലീസുദ്യോഗസ്ഥര് അറിയിച്ചു. അപകടത്തിന്റെ കൂടുതല് ദൃശ്യങ്ങള് ലഭിക്കാനായി പോലീസ് പ്രദേശത്തെ വ്യാപാരസ്ഥാപനങ്ങളിലെ സിസിടിവി ദൃശ്യങ്ങള് പരിശോധിച്ചു കൊണ്ടിരിക്കുകയാണ്. അപകടമുണ്ടായ കാറില് ഫോറന്സിക് വിദഗ്ദ്ധര് പരിശോധന നടത്തി.
അതിനിടെ അപകടശേഷം ആശുപത്രിയിലെത്തിച്ച ശ്രീറാമിന്റെ രക്തസംപിളുകള് എടുക്കാന് പോലീസ് ആവശ്യപ്പെട്ടില്ലെന്ന് അദ്ദേഹത്തെ പരിശോധിച്ച ഡോക്ടര് അറിയിച്ചു. അപകടത്തിനുശേഷം ശ്രീറാമിനെ പരിശോധിച്ച തിരുവനന്തപുരം ജനറല് ആശുപത്രിയിലെ ഡോക്ടര് രാഗേഷാണ് ഇക്കാര്യം വെളിപ്പെടുത്തിയത്.
ശ്രീറാം പരിശോധനയ്ക്കായി ഇരുന്നപ്പോള് മദ്യപിച്ചിട്ടുണ്ടെന്ന് തനിക്ക് തോന്നി ഇക്കാര്യം താന് അദ്ദേഹത്തെ കൊണ്ടു വന്ന പോലീസുദ്യോഗസ്ഥരോട് പറഞ്ഞെങ്കിലും രക്തസാംപിളുകള് ശേഖരിക്കാന് ആവശ്യപ്പെട്ടില്ല. അതേസമയം ജനറല് ആശുപത്രിയില് പരിശോധനയ്ക്ക് കൊണ്ടുവന്ന ശ്രീറാമിന്റെ സുഹൃത്ത് വഫ ഫിറോസിന്റെ രക്തസാംപിളുകള് പോലീസ് ശേഖരിച്ചു. ഇവരുടെ രക്തത്തില് മദ്യത്തിന്റെ അംശം കണ്ടെത്തിയിട്ടില്ല.
ഇന്ന് പുലര്ച്ചെ ഒരു മണിയോടെയാണ് സിറാജ് പത്രത്തിന്റെ തിരുവനന്തപുരം ബ്യൂറോ ചീഫ് കെ.എം. ബഷീറിന്റെ ബൈക്കില് ശ്രീറാമിന്റെ കാര് ഇടിച്ച് അപകടം നടക്കുന്നത്. പഠനാവശ്യത്തിനായുള്ള അവധിക്ക് ശേഷം കഴിഞ്ഞ ദിവസാണ് ഇദ്ദേഹത്തെ സര്വ്വേ ഡയറക്ടറായി നിയമിച്ചുകൊണ്ട് മന്ത്രിസഭ തീരുമാനം എടുക്കുന്നത്.
അതേസമയം അപകടമുണ്ടാക്കിയത് ഉന്നത ഉദ്യോഗസ്ഥനാണ് എന്ന് വ്യക്തമായതോടെ അദ്ദേഹത്തെ സംരക്ഷിക്കുന്ന തരത്തിലുള്ള നിലപാടാണ് മ്യൂസിയം പോലീസ് ആദ്യം സ്വീകരിച്ചതെന്നും ആരോപണമുണ്ട്. തിരുവനന്തപുരം ജനറല് ആശുപത്രിയില് എത്തിയ ശ്രീറാമിനെ ദേഹപരിശോധനയ്ക്ക് ശേഷം ഓണ്ലൈന് ടാക്സില് പോലീസ് പറഞ്ഞുവിട്ടു. ഇതിനെതിരെ മാധ്യമ പ്രവര്ത്തകരില് നിന്നുള്ള പ്രതിഷേധം ശ്ക്തമായതിനെ തുടര്ന്നാണ് പോലീസ് നടപടിയെടുക്കുന്നത്.
പോലീസ് സ്റ്റേഷനില് നിന്നും നേരെ നഗരത്തിലെ ഒരു സ്വകാര്യ ആശുപത്രിയില് പോയി അദ്ദേഹം അഡ്മിറ്റായി. എന്നാല് ആശുപത്രിയില് പ്രവേശിപ്പിക്കാന് തക്ക പരിക്കുകളൊന്നും ശ്രീറാമിനോ സുഹൃത്തിനോ ഉണ്ടായിട്ടില്ലെന്നാണ് അദ്ദേഹത്തെ പരിശോധിച്ച ഡോക്ടര്മാര് പറയുന്നത്.
