കോഴിക്കോട്: തൃശ്ശൂര് പുന്നയില് കോണ്ഗ്രസ് പ്രവര്ത്തകനായ നൗഷാദിനെ കൊലപ്പെടുത്തിയത് മാസങ്ങള്ക്ക് മുന്പ് നടന്ന ആസൂത്രണങ്ങള്ക്ക് ശേഷം. ഇതുസംബന്ധിച്ചുള്ള എസ്ഡിപിഐ പ്രവര്ത്തകരുടെ ഫേസ്ബുക്ക് പോസ്റ്റുകളും പുറത്ത്.
എസ്ഡിപിഐ കേരളം എന്ന ഫേസ്ബുക്ക് ഗ്രൂപ്പില് നൗഷാദിനെ കൊലപ്പെടുത്തണം എന്ന് ആഹ്വാനം ചെയ്തതിന്റെ വിവരങ്ങളാണ് പുറത്തുവന്നിരിക്കുന്നത്.
‘ഇവന്റെ ബ്ലഡ് ഏതാണെന്ന് നോക്കിയിട്ട് ഹിറാ സെന്ററില് അറിയിക്കാന് ജ. അമീര് പറഞ്ഞിട്ടുണ്ട് എന്നാണ് ഒരാളുടെ കമന്റ്. എത്രയും പെട്ടെന്ന് അവിടെ ജിന്നുകള് ഇറങ്ങട്ടെ അപ്പോള് ശരിയാവും, ഇവനെയൊന്നും ഈ ഭൂമിക്ക് ഇനി വേണ്ടല്ലോ എന്നും എസ്ഡിപിഐ ഗ്രൂപ്പില് കമന്റ് ചെയ്തിട്ടുണ്ട്.
ചാവക്കാട് പുന്ന ബൂത്ത് പ്രസിഡന്റ് നൗഷാദ് ബുധനാഴ്ചയാണ് അക്രമിസംഘത്തിന്റെ വെട്ടേറ്റ് മരിച്ചത്. 14 പേരടങ്ങുന്ന സംഘമാണ് ആക്രമണം നടത്തിയത്. നൗഷാദിന് കഴുത്തിനും കൈയ്ക്കും കാലിനുമടക്കം ശരീരത്തിലാകമാനം വെട്ടേറ്റിട്ടുണ്ട്. കൊലപ്പെടുത്തുക എന്ന ഉദ്ദേശ്യത്തോടെ തന്നെയാണ് ആക്രമണമെന്നാണ് ഡോക്ടര്മാര് പറയുന്നത്.
നൗഷാദിനൊപ്പമുണ്ടായിരുന്ന ബിജേഷ്, നിഷാദ്, സുരേഷ് എന്നിവര് അപകടനില തരണം ചെയ്തതായി ആശുപത്രി അധികൃതര് അറിയിച്ചു.
